លោកហ៊ុន សែន កាត់ដី៧៥០ហិចតាជូនពលរដ្ឋខេត្តក្រចេះ ប៉ុន្តែពលរដ្ឋមិនទុកចិត្ត
តំណាងប្រជាពលរដ្ឋប្រមាណជាង១០០នាក់ ដែលមានជំលោះដីធ្លីមកពីឃុំឃ្សិម ខេត្តក្រចេះ បានធ្វើដំណើរវិលត្រលប់ទៅកាន់ខេត្តក្រចេះវិញ នៅថ្ងៃសៅរ៍នេះ ដើម្បីទៅពិនិត្យមើលដោយផ្ទាល់ នូវទីតាំង និងទំហំដី ៧៥០ហិចតា ដែលលោកនាយករដ្ឋមន្ត្រី ហ៊ុន សែន បានកាត់អោយ ជាថ្នូរនឹងការបញ្ចប់ការតវ៉ារបស់ពួកគេនៅក្នុងទីក្រុងភ្នំពេញ។ ប៉ុន្តែ ប្រជាពលរដ្ឋជាង២០០នាក់ទៀត ដែលកំពុងស្នាក់នៅក្នុងវត្តសាមគ្គីរង្ស៊ី មិនទាន់វិលត្រលប់ទៅខេត្តក្រចេះវិញតាមសំណូមពររបស់អាជ្ញាធរនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ដោយមិនមានទំនុកចិត្តលើអាជ្ញាធរ១០០ភាគរយនៅឡើយ ដូចនេះមានតែតំណាងពលរដ្ឋរងគ្រោះសហគមន៍ពាមប៉ោ ឃុំឃ្សឹម ស្រុកស្នួល ខេត្តក្រចេះ ចំនួនតែ១០០នាក់ប៉ុណ្ណោះ ដែលបានស្ម័គ្រចិត្តធ្វើដំណើរវិលត្រលប់ទៅកាន់ខេត្តក្រចេះវិញ នៅថ្ងៃសៅរ៍នេះ។ អាជ្ញាធរដែលរួមមានអភិបាលរងខេត្តក្រចេះលោក ខាន់ ចំណាន អភិបាលខ័ណ្ឌមានជ័យលោក គួច ចំរើន និងមន្ត្រីពាក់ព័ន្ធជាច្រើនទៀត បានចុះទៅសំរបសំរួលនិងបានយករថយន្តចំនួន៦គ្រឿងទៅដឹកប្រជាពលរដ្ឋដោយផ្ទាល់ពីវត្តសាមគ្គីរង្ស៊ី នៅព្រឹកថ្ងៃសៅរ៍នេះ ប៉ុន្តែមានតែប្រជាពលរដ្ឋជាង១០០នាក់ប៉ុណ្ណោះ ក្នុងចំនោមប្រជាពលរដ្ឋជាង៤០០គ្រួសារដែលបានចេញទៅ។
តំណាងប្រជាពលរដ្ឋទាំង១០០នាក់ ដែលអមដំណើរដោយព្រះគ្រូសូត្រវត្តសាមគ្គីរង្សី បណ្តាញព្រះសង្ឃ អង្គការសង្គមស៊ីវិល អ្នកសារព័ត៌មានជាតិនិងអន្តរជាតិផង នឹងពិនិត្យមើលជាក់ស្តែង ពីស្ថានភាពដីនៅភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ។ ជាដីទំហំ៧៥០ហិចតា ដែលលោកនាយករដ្ឋមន្ត្រី ហ៊ុន សែន បានកាត់ឲ្យប្រជាពលរដ្ឋជាថ្នូរនឹងការបញ្ចប់ការតវ៉ា និងការដើរហែក្បួនរបស់ពួកគេ នៅក្នុងរាជធានីភ្នំពេញ។
គួររំលឹកថា កាលពីថ្ងៃទី២៧ឧសភា លោកនាយករដ្ឋមន្ត្រីហ៊ុន សែន បានឯកភាព ឲ្យក្រសួងរៀបចំដែនដីនគរូបនីយកម្មនិងសំណង់ ប្រគល់ដីសម្បទានសង្គមកិច្ចទំហំ៧៥០ហិកតា នៅចំណុចត្រពាំងឈូក ភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ ជូនប្រជាពលរដ្ឋដែលបានបណ្តេញចេញ និងកំពុងស្នាក់នៅក្នុងវត្តសាមគ្គីរង្ស៊ីដើម្បីបញ្ចប់ការតវ៉ា។ ប៉ុន្តែលោក ងួន វិបុល តំណាងពលរដ្ឋមកពីខេត្តក្រចេះ បានអះអាងថា ប្រជាពលរដ្ឋមិនទាន់ជឿទុកចិត្ត១០០ភាគរយនៅឡើយទេ ដូច្នេះហើយទើបប្រជាពលរដ្ឋមកពីឃុំឃ្សឹម មិនទាន់សំរេចចិត្តវិលត្រលប់ទៅកាន់ខេត្តក្រចេះទាំងអស់។
យ៉ាងណាក៍ដោយ លោក សរ ចំរុង អភិបាលខេត្តក្រចេះបានបញ្ជាក់នៅក្នុងលិខិតរបស់លោកកាលពីថ្ងៃទី២៨ឧសភាថា ការសម្រេចឲ្យដីប្រជាពលរដ្ឋនេះ ជាការអនុគ្រោះរបស់ថ្នាក់ដឹកនាំ បើទោះបីដឹងថា ពលរដ្ឋទាំង៤០៥គ្រួសារនេះបានមករស់នៅលើដីរដ្ឋខុសច្បាប់មុនការបណ្តេញចេញក៏ដោយ។ បើតាមលោក សរ ចំរុង ដដែល ប្រជាពលរដ្ឋនឹងទៅជួបជុំគ្នានៅសាលាស្រុកស្នួលខេត្តក្រចេះ ដើម្បីបំពេញសំណុំបែបបទទទួលយកដីសម្បទានសង្គមកិច្ចនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ