ពលរដ្ឋមកពីខេត្តក្រចេះស្វែងរកអន្តរាគមន៍លើជម្លោះដីធ្លីតាមរយៈការដាក់ញត្តិតាមស្ថានទូត
ក្រុមប្រជាពលរដ្ឋជាង ២០០ នាក់ ដែលមានជម្លោះដីធ្លី មកពីស្រុកស្នួល ខេត្តក្រចេះ បាន លើកបដា ដើរដាក់ញត្តិ នៅព្រឹកថ្ងៃសុក្រ ទី១៦ឧសភា ទៅកាន់ស្ថានទូតប្រទេសមហាអំណាច សហភាពអឺរ៉ុប និងស្ថានទូតវៀតណាម។ ចាប់ផ្តើមដាក់ញត្តិដំបូង នៅស្ថានទូតអាមេរិក ក្រុមប្រជាពលរដ្ឋដែលមានជម្លោះដីធ្លី ជាមួយក្រុមហ៊ុនវៀតណាម បានទទូចសុំឲ្យប្រទេសមហាអំណាច ម្ចាស់ជំនួយសហភាពអឺរ៉ុប និងស្ថានទូតវៀតណាមផ្ទាល់ អន្តរាគមន៍ទៅកាន់រដ្ឋាភិបាលកម្ពុជា និងក្រុមហ៊ុនវៀតណាមកុំឲ្យយកដីរបស់ពួកគាត់។
ចុះផ្សាយនៅថ្ងៃ៖
ស្តាប់ - ០១:៤៣
កាលពីថ្ងៃចន្ទ ទី១២ឧសភា ក្រុមប្រជាពលរដ្ឋ អ្នកមានជម្លោះដីធ្លី នៅស្រុកស្នួល ខេត្តក្រចេះបានដាក់ញត្តិរួចហើយ ទៅកាន់ព្រឹទ្ធសភា ក្រសួងមហាផ្ទៃ និងក្រសួងរៀបចំដែនដី នគរូបនីយកម្ម និងសំណង់។
នៅព្រឹកថ្ងៃសុក្រនេះ ក្រុមអ្នកភូមិជាង ២០០ នាក់ បានប្រមូលផ្តុំ លើកបដា ដើរដាក់ញត្តិជាថ្មី ទៅកាន់ស្ថានទូតប្រទេសមហាអំណាច ដូចជា អាមេរិក បារាំង ជប៉ុន អង់គ្លេស អាល្លឺម៉ង់ ទូតអូស្ត្រាលី សហភាពអឺរ៉ុប និងស្ថានទូតវៀតណាម។
ក្រុមប្រជាពលរដ្ឋ ដែលមានជម្លោះដីធ្លី ជាមួយក្រុមហ៊ុនវៀតណាម នៅស្រុកស្នួល ខេត្តក្រចេះ បានដាក់ញត្តិ ទៅស្ថាប័នពាក់ព័ន្ធ និងអង្គទូត ដើម្បីស្នើសុំអន្តរាគមន៍ ស្វែងរកដំណោះស្រាយលើបញ្ហាដីធ្លី។ បញ្ហាវិវាទដីធ្លី រវាងប្រជាពលរដ្ឋ ជាមួយក្រុមហ៊ុនវៀតណាម ឈ្មោះ ប៊ិញ ភឿក២ លើទំហំដីជាង ២ ពាន់ហិកតា។
ក្រុមប្រជាពលរដ្ឋ បានឡើងមករង់ចាំដំណោះស្រាយយូរថ្ងៃមកហើយ បានអះអាងថា ពួកគាត់ បានរស់នៅលើដីជម្លោះ នៅភូមិពាមប៉ោអូរបី ឃុំឃ្សឹម ស្រុកស្នួល ខេត្តក្រចេះ ចាប់តាំងពីឆ្នាំ២០០៨ បន្តរហូតដល់ដើមឆ្នាំ២០១២ មានចំនួនជាង ៤០០ គ្រួសារ។
ប៉ុន្តែថ្មីៗនេះ អាជ្ញាធរខេត្តក្រចេះ បានរឹបអូសយកដីទាំងនោះ ប្រគល់ឲ្យក្រុមហ៊ុនវៀតណាម។ អាជ្ញាធរ អះអាងថា ដីដែលមានជម្លោះនោះ គឺជាដីព្រៃរបស់រដ្ឋ ដែលតាមច្បាប់ រដ្ឋត្រូវដកហូតមកវិញ។
ក្រុមប្រជាពលរដ្ឋ ដែលមានជម្លោះ បានឡើងមកភ្នំពេញ ដើម្បីស្វែងរកការជួយអន្តរាគមន៍ពីលោកនាយករដ្ឋមន្ត្រី ហ៊ុន សែន កាលពីដើមខែឧសភា។ ប៉ុន្តែមន្ត្រីខុទ្ទកាល័យនាយករដ្ឋមន្ត្រី បានឲ្យក្រុមប្រជាពលរដ្ឋ ត្រលប់ទៅចរចាជាមួយអាជ្ញាធរខេត្តក្រចេះ។ ប៉ុន្តែកិច្ចប្រជុំ កាលពីថ្ងៃទី៧ឧសភា មិនមានលទ្ធផលអ្វី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ