ការបិទទីលានប្រជាធិបតេយ្យគឺជារបៀបវារៈនៃជំនួបអង្គការសហប្រជាជាតិ និងរដ្ឋាភិបាលកម្ពុជា
នៅរសៀលថ្ងៃអង្គារទី២៩ មេសានេះ រដ្ឋមន្ត្រីក្រសួងការបរទេសកម្ពុជា និងមន្ត្រីទទួលបន្ទុកសិទ្ធមនុស្សនៃអង្គការសហប្រជាជាតិបានជួបពិភាក្សាគ្នាជាច្រើនចំណុច។ នៅក្នុងនោះក៏មានដែរបញ្ហាការបិទទីលានបញ្ចេញមតិ និងការហាមប្រាមការជួបបញ្ចេញមតិ។ ក្រៅពីនោះ ភាគីទាំងពីរក៏បានពិភាក្សាស្តីពីការបន្តការអភិវឌ្ឍនៅកម្ពុជាផងដែរ។
ចុះផ្សាយនៅថ្ងៃ៖
ស្តាប់ - ០២:៤០
ការបិទទីលានប្រជាធិបតេយ្យ និងការហាមប្រាមការជួបជុំពីសំណាក់រដ្ឋាភិបាលកម្ពុជាដែលជាបញ្ហារសើបនោះ បានក្លាយជារបៀបវារៈមួយនៅរសៀលថ្ងៃអង្គារនេះ នៅក្រសួងការបរទេសកម្ពុជា។ ជាជំនួបរវាងលោក ហោ ណាំហុង ប្រមុខការទូតកម្ពុជានិង ប្រតិភូជាន់ខ្ពស់របស់អង្គការសហប្រជាជាតិ គឺលោកស្រី ផ្លាវីយ៉េ ប៉ង់ស៊ីយ៉េរី ឧត្តមស្នងការរងជាន់ខ្ពស់ អ.ស.ប ទទួលបន្ទុកសិទ្ធមនុស្ស និងលោក ហាវលាង ស៊ូ ឧបការីអគ្គលេខាធិការអង្គការសហប្រជាជាតិ។
មិនមានហេតុផលពន្យល់ណាមួយពីសំណាក់រដ្ឋាភិបាលទៅកាន់អង្គការសហប្រជាជាតិត្រូវបានរាយការណ៍ក្រោយកិច្ចប្រជុំនោះទេ។ សូមរំលឹកថា ក្រោយបាតុកម្មបង្ហូឈាមកាលពីដើមខែមករាកន្លងទៅដែលបានបណ្តាលឱ្យមានមនុស្សស្លាប់ រងរបួស និងជាប់ឃុំនោះ រដ្ឋាភិបាលកម្ពុជាបានប្រកាសបិទទីលានប្រជាធិបតេយ្យ និងហាមប្រាមការជួបជុំ។ និយាយទៅកាន់អ្នកសារព័ត៌មានក្រោយកិច្ចប្រជុំ លោក ស្រីឧត្តមស្នងការរងទទួលបន្ទុកសិទ្ធមនុស្ស បាននិយាយទៅកាន់អ្នកសារព័ត៌មានថារាល់ការអនុវត្តត្រូវភ្ជាប់ជាមួយច្បាប់។
ក្រៅពីរបៀបវារៈស្តីបញ្ហាសិទ្ធជួបជុំ កិច្ចការភិវឌ្ឍកម្ពុជាជាចីរភាពនោះ ក៏ជារបៀបវារៈដែលភាគីទាំងពីរបានដាក់លើតុជាមួយគ្នាផងដែរ។ អ្នកនាំពាក្យកិច្ចប្រជុំ លោកកុយ គួងបានបញ្ជាក់ថា ភាគីកម្ពុជាបានស្នើសុំឱ្យអង្គការសហប្រជាជាតិបន្តគម្រោងផ្តល់ជំនួយដល់កម្ពុជាពីឆ្នាំ២០១៥ខាងមុខជាបន្តទៀត។ ជាជំនួយដែលកម្ពុជាស្នើសុំលើអភិបាលកិច្ចល្អ បញ្ហាសុខាភិបាល សង្គមកិច្ច និងការអភិវឌ្ឍសិទ្ធមនុស្ស រួមទាំងបញ្ហាធ្វើឱ្យប្រសើរឡើងនៃស្ថានភាពពន្ធនាគារនៅកម្ពុជាផងដែរ។
សូមបញ្ជាក់ឱ្យដឹងផងដែរថា ដំណើរទស្សនៈកិច្ចរបស់ក្រុមគណៈប្រតិភូអង្គការ សហ ប្រជា ជាតិ នេះ គឺជាលើកទី២ហើយនៅលើទឹកដីកម្ពុជា។ លោកស្រី ផ្លាវីយ៉េ ប៉ង់ស៊ីយ៉េរី ឧត្តមស្នងការរងជាន់ខ្ពស់ អ.ស.ប ទទួលបន្ទុកសិទ្ធមនុស្ស និងលោក ហាវលាង ស៊ូ ឧបការីអគ្គលេខាធិការអង្គការសហប្រជាជាតិ នឹងបំពេញរយៈពេល៥ថ្ងៃនៅកម្ពុជាចាប់ពីថ្ងៃទី២៨មេសា ដល់ថ្ងៃទី២ ឧសភា។ ក្នុងដំណើរទស្សនៈកិច្ចនេះ គណៈប្រតិភូ នឹងជួបជាមួយមន្ត្រីរដ្ឋាភិបាល ក្រុមអង្គការសង្គមស៊ីវិល និងប្រជាពលរដ្ឋដែលត្រូវគេបណ្តេញចេញពីដីធ្លី រួមទាំងការទៅពិនិត្យស្ថានភាពពន្ធនាគារផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ