រដ្ឋាភិបាលកម្ពុជានិងអ.ស.ប ប្តេជ្ញាជាថ្មី ដើម្បីដំណើរការកាត់ទោសអតីតមេខ្មែរក្រហម
មន្ត្រីជាន់ខ្ពស់រដ្ឋាភិបាលកម្ពុជា និងគណៈប្រតិភូជាន់ខ្ពស់អង្គការសហប្រជាជាតិ ពាក់ព័ន្ធនឹងអង្គជំនុំជម្រះវិសាមញ្ញក្នុងតុលាការកម្ពុជា ដែលគេស្គាល់ថា ជាតុលាការកាត់ទោសមេខ្មែរក្រហម បានជួបប្រជុំ ដោយបិទទ្វារ កាលថ្ងៃទី២៧មករា នៅភ្នំពេញ។ លទ្ធផលនៃកិច្ចប្រជុំ ដែលរដ្ឋាភិបាលកម្ពុជា ប្រកាសថ្ងៃទី២៨មករានេះ បង្ហាញថា កម្ពុជានិងអង្គការសហប្រជាជាតិ បានឯកភាពបន្តកិច្ចសហប្រតិបត្តិការជាមួយគ្នា លើរាល់បញ្ហាពាក់ព័ន្ធនឹងតុលាការខ្មែរក្រហម។ ភាគីទាំងពីរ ក៏បានបង្ហាញពីការតាំងចិត្ត ក្នុងការជម្នះនូវបញ្ហាប្រឈមផ្នែកថវិកា ដែលតុលាការចម្រុះកំពុងជួបប្រទះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
កិច្ចប្រជុំ ដែលរដ្ឋាភិបាលកម្ពុជា ចាត់ទុកថា ជាកិច្ចប្រជុំប្រកបដោយស្ថាបនា ត្រូវបានប្រព្រឹត្តទៅ កាលពីថ្ងៃចន្ទ ទី២៧មករា រវាងលោក សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររបស់រាជរដ្ឋាភិបាលកម្ពុជា ដើម្បីបង្កើតសាលាក្តីខ្មែរក្រហម និងគណៈប្រតិភូជាន់ខ្ពស់ អ.ស.ប. ដឹកនាំដោយ លោក Miguel de Serpa Saores អគ្គលេខាធិការរង អ.ស.ប. ទទួលបន្ទុកផ្នែកច្បាប់ អមដោយលោកស្រី Maria Eugenia Casar ឧបការីអគ្គលេខាធិការ និងជាអគ្គហិរញ្ញិក អ.ស.ប និងលោកឯកអគ្គរដ្ឋទូត ដេវីដ សេហ្វ័រ អ្នកជំនាញការពិសេសរបស់អគ្គលេខាធិការ អ.ស.ប ទទួលបន្ទុកសាលាក្តីខ្មែរក្រហម។
សេចក្តីថ្លែងការណ៍រួម ដែលបានចេញផ្សាយនៅថ្ងៃទី២៨មករានេះ បង្ហាញថា តំណាងរដ្ឋាភិបាលកម្ពុជា និងគណៈប្រតិភូជាន់ខ្ពស់ អ.ស.ប បានឯកភាពបន្តកិច្ចសហប្រតិបត្តិការជាមួយគ្នាលើរាល់បញ្ហាពាក់ព័ន្ធនឹងសាលាក្តីកាត់ទោសមេដឹកនាំខ្មែរក្រហម និងបានគូសបញ្ជាក់នូវការប្តេជ្ញាចិត្តរបស់ខ្លួនសាជាថ្មី ក្នុងការបញ្ចប់និរទណ្ឌភាពលើអំពើឃោរឃៅ ដែលបានកើតឡើងក្នុងអតីតរបបខ្មែរក្រហម។ ភាគីទាំងពីរ បានបង្ហាញពីការតាំងចិត្តក្នុងការជម្នះនូវបញ្ហាប្រឈមផ្នែកថវិកា ដែលសាលាក្តីចម្រុះ កំពុងជួបប្រទះ ដើម្បីចៀសវាងការពន្យារពេលណាមួយ នៅក្នុងនីតិវិធីតុលាការ និងធានាបាននូវសុខុមាលភាពរបស់បុគ្គលិកទាំងភាគីជាតិ និងអន្តរជាតិ។
លោក សុខ អាន បានឯកភាពថា រាជរដ្ឋាភិបាលកម្ពុជា នឹងមានលទ្ធភាពផ្តល់ថវិកាចំនួន ១,១ លានដុល្លារអាមេរិក សម្រាប់បើកប្រាក់បៀវត្សរ៍ជូនដល់មន្ត្រីបុគ្គលិកភាគីជាតិ រួមទាំងចៅក្រម ព្រះរាជអាជ្ញាផងដែរ សម្រាប់ត្រីមាសទី១ ឆ្នាំ២០១៤នេះ។ កម្ពុជាគាំទ្រលើគម្រោងសំណើបច្ចុប្បន្នរបស់គណៈកម្មការទី៥នៃមហាសន្និបាត ក្នុងកិច្ចប្រជុំរបស់ខ្លួន នៅកំឡុងខែមីនា ឆ្នាំ២០១៤ខាងមុខនេះ ដើម្បីអនុម័តលើការផ្តល់ឧបត្ថម្ភធន ដល់សាលាក្តីខ្មែរក្រហម ដែលបានមកពីវិភាគទានទៀងទាត់របស់ អ.ស.ប។
ចំណែកគណៈប្រតិភូជាន់ខ្ពស់ របស់ អ.ស.ប បានឯកភាពថា លោក ដេវីត សេហ្វ័រ នឹងខិតខំប្រឹងប្រែងជាអតិបរមាដោយធ្វើការងារជាមួយតំណាងរាជរដ្ឋាភិបាលកម្ពុជា ដើម្បីកៀងគរជំនួយហិរញ្ញវត្ថុ សម្រាប់បង្គ្រប់ថវិកាភាគីជាតិ នៃ អ.វ.ត.ក នៅក្នុងឆ្នាំ ២០១៤ នេះ។
ថវិកាសម្រាប់ភាគីជាតិ នៅឆ្នាំ២០១៤ ត្រូវបានលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បញ្ជាក់ថា ភាគីកម្ពុជាត្រូវការចំនួន ៦,៤ លានដុល្លារ។ រីឯគម្រោងថវិកា ឆ្នាំ២០១៤ និងឆ្នាំ២០១៥ សម្រាប់ភាគីជាតិ និងអន្តរជាតិ មានចំនួនជាង ៥១ លានដុល្លារ។
លោកនេត្រភក្ត្រា បញ្ជាក់ថា នៅពេលសព្វថ្ងៃ សាលាក្តីខ្មែរក្រហម កំពុងធ្វើកិច្ចការសំខាន់ពីរ គឺទី១-អង្គជំនុំជម្រះសាលាដំបូង កំពុងរៀបចំសរសេរសាលក្រមលើសំណុំរឿង០០២ ដំណាក់កាលទី១ ដែលគ្រោងនឹងប្រកាសនៅពាក់កណ្តាលឆ្នាំនេះ និងកិច្ចការទី២ តុលាការត្រៀមនឹងរៀបចំសវនាការកាត់ទោសមេដឹកនាំចាស់ជរា លោកខៀវ សំផន និងលោកនួន ជា ក្នុងសំណុំរឿង០០២ ដំណាក់កាលទី២ តែមិនទាន់កំណត់ពេលជាក់លាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ