ប្រយ័ត្ន! ចូលឆ្នាំខ្មែរកំពុងប្រែធាតុ
ចុះផ្សាយនៅថ្ងៃ៖
ស្តាប់ - ០៤:៥៧
ការប្រារព្ធពិធីបុណ្យចូលឆ្នាំថ្មីនៅតែជាប្រពៃណីដ៏រឹងមាំរបស់ខ្មែរដដែល។ ជាក់ស្តែង បុណ្យចូលឆ្នាំថ្មីឆ្នាំនេះ ពលរដ្ឋខ្មែរគ្រប់ទិសទីនាំគ្នាទទួលអំណឆ្នាំថ្មីដូចរៀងរាល់ឆ្នាំដែរ។ សំឡេងចម្រៀង ល្បែង របាំប្រជាប្រិយនៅតែលាន់លឺកងរំពងមិនដាច់តាមរយៈប្រព័ន្ធផ្សាយព័ត៌មាន។ ប៉ុន្តែ ទន្ទឹមនឹងនោះ ក៏លេចចេញចំណុចអវិជ្ជមានកាន់តែច្រើនដែរ។ ល្បែង របាំប្រជាប្រិយខ្មែរហាក់កំពុងរសាត់ឆ្ងាយបន្តិចម្តងៗពីអារម្មណ៍របស់ យុវជន រីឯការជួបជុំសប្បាយជាមួយគ្រឿងស្រវឹងនិងល្បែងស៊ីសងហាក់កើនឡើងខ្លាំងជាលំដាប់។ និន្នាការនេះអាចធ្វើឲ្យបុណ្យចូលឆ្នាំខ្មែរប្រែធាតុប្រសិនបើគេមិននាំគ្នាប្រយ័ត្នទេនោះ។
ពីមួយឆ្នាំទៅមួយឆ្នាំ ពិធីបុណ្យចូលឆ្នាំខ្មែររយៈពេលបីថ្ងៃបានស្តែងឲ្យឃើញចំណុចវិជ្ជមានផងនិងអវិជ្ជមានផង។ ចំណុចវិជ្ជមានគួរឲ្យរីករាយគឺ ពិធីបុណ្យប្រពៃណីជាតិដ៏ធំមួយនេះនៅតែជាទំនាមទម្លាប់ខ្មែរដែលមិនអាចសាបរលាបបានឡើយ។ ចូលឆ្នាំថ្មី ជាតំណាងនៃការសប្បាយរីករាយនិងការជួបជុំដែលផ្សារភ្ជាប់ដោយវប្បធម៌ប្រពៃណីជាតិយ៉ាងស៊ីជម្រៅ។
ឆ្នាំនេះក៏ដូចជាឆ្នាំមុនៗដែរ ភាពអធឹកអធមក្នុងពេលបុណ្យចូលឆ្នាំថ្មីនៅតែស្តែងឡើងយ៉ាងពិតប្រាកដ។ ទីក្រុងភ្នំពេញក្លាយជាស្ងាត់ជ្រងំ ខណៈដែលទីរមណីដ្ឋាននានាមានមនុស្សកកកុញស្ទើររកកន្លែងឲ្យភ្ញៀវស្នាក់នៅមិនបាន។ មន្ត្រីរាជការ បុគ្គលិក និងកម្មករជាទូទៅត្រូវបានអនុញ្ញាតឲ្យឈប់សម្រាកពីការងារ។
នៅតាមបណ្តាញផ្សាយព័ត៌មានជាពិសេសវិទ្យុនិងទូរទស្សន៍ ចម្រៀងនិងល្បែង របាំប្រជាប្រិយខ្មែរនៅតែលាន់លឺកងរំពងក្នុងអំឡុងពេលបុណ្យចូលឆ្នាំថ្មី។ សកម្មភាពសិល្បៈបុរាណនិងសម័យក៏ត្រូវបានរៀបចំនៅទីសាធារណៈជាច្រើនដែរ។ នេះសបញ្ជាក់ឲ្យឃើញថា ពិធីបុណ្យចូលឆ្នាំប្រពៃណីខ្មែរពិតជាចាក់ឫសយ៉ាងរឹងមាំក្នុងមនុស្សខ្មែរគ្រប់គ្នានិងគ្រប់ជំនាន់មិនអាចសាបសូន្យបានឡើយ។
ប៉ុន្តែ ទន្ទឹមនឹងនោះ ពិធីបុណ្យចូលឆ្នាំខ្មែរក៏លេចចេញចំណុចអវិជ្ជមានកាន់តែខ្លាំងឡើងដែរ។ ជាក់ស្តែង ចម្រៀង និងល្បែង របាំប្រជាប្រិយខ្មែរហាក់កាន់តែរសាត់ឆ្ងាយបន្តិចម្តងៗពីអារម្មណ៍របស់យុវវ័យ។ ពួកគេមិនសូវចូលចិត្តពិធីបែបបុរាណនេះទេ ហើយបែជាចូលចិត្តស្តាប់ចម្រៀងសម័យទំនើបៗដែលភាគច្រើនចម្លងពីបរទេសទៅវិញ។ នៅតាមភូមិដ្ឋាននានាទៀតសោតក៏មិនសូវមានសកម្មភាពអ៊ូអរក្នុងការលេងល្បែងប្រជាប្រិយនៅមុននិងក្នុងអំឡុងពេលបុណ្យចូលឆ្នាំដូចកាលពីមុនដែរ។
មនុស្សម័យនេះបែរជាចូលចិត្តយកពិធីបុណ្យធំៗជាពិសេសបុណ្យចូលឆ្នាំធ្វើជាពិធីសប្បាយរីករាយជាមួយគ្រឿងស្រវឹងឬល្បែងស៊ីសងទៅវិញ។ តាមពិតវាមិនមែនជារឿងថ្មីទេសម្រាប់សង្គមខ្មែរដែលគ្រឿងស្រវឹងនិងអបាយមុខផ្សេងៗត្រូវបានមនុស្សជាច្រើនយកធ្វើជាត្រីមុខនោះ។ ចំណែកការជួបជុំគ្នាដើម្បីសប្បាយដោយមានគ្រឿងស្រវឹងជាជំនួយក៏មិនមែនជារឿងដាច់ដោយឡែករបស់ខ្មែរតែឯងនោះដែរ។
ប៉ុន្តែ អ្វីដែលគួរឲ្យកត់សម្គាល់នោះគឺ គ្រឿងស្រវឹងមិនត្រូវបានគេប្រើត្រឹមតែសប្បាយប៉ុណ្ណោះទេ។ មនុស្សជាច្រើនបានប្រើវាហួសហេតុរហូតបង្កបញ្ហាច្រើនយ៉ាង៖ បញ្ហាសុខភាព អំពើហិង្សា និងគ្រោះថ្នាក់ចរាចរណ៍ជាដើមសុទ្ធសឹងជាផលវិបាកជាក់ស្តែងដែលកើតឡើងពីគ្រឿងស្រវឹង។ នេះនៅមិនទាន់រាប់បញ្ចូលល្បែងស៊ីសងដែលជាប្រភពជម្លោះនិងភាពក្រីក្រនោះផងទេ។ ម្យ៉ាងទៀត ល្បែងជះទឹក ប៉ាតម្យ៉ៅ ឬវាយនឹងរំពាត់ដែលប្រាស់ចាកប្រពៃណីក៏កំពុងរីកដុះដាលខ្លាំងណាស់ដែរ។
ពិតណាស់ វប្បធម៌ ប្រពៃណី និងទំនាមទម្លាប់ គឺជាអត្តសញ្ញាណរបស់ជាតិសាសន៍នីមួយៗ ។ សម្រាប់ជាតិសាសន៍ខ្មែរ ល្បែង របាំប្រជាប្រិយ បទចម្រៀង និងសម្លៀកបំពាក់ប្រពៃណីសម្រាប់បុណ្យចូលឆ្នាំថ្មីគឺជាសម្បត្តិវប្បធម៌ដ៏មានតម្លៃដែលដូនតាខ្មែរបានបន្សល់ទុកឲ្យកូនចៅជំនាន់ក្រោយ។ សម្បត្តិវប្បធម៌ទាំងនោះគួរត្រូវបានអភិរក្សឲ្យបានគង់វង្សបើទោះជាមនុស្សចាំបាច់ត្រូវការភាពទំនើបក៏ដោយ។ សូមកុំភ្លេចថា ទេសចរបរទេសដែលចូលមកកម្ពុជាប្រាថ្នាចង់ឃើញអត្តសញ្ញាណរបស់ខ្មែរជាជាងឃើញភាពទំនើបដែលពួកគេធ្លាប់ឃើញឡើងស៊ាំភ្នែកទៅហើយនោះ។
ក្នុងន័យនេះ មិនថាតែល្បែង របាំ ប្រជាប្រិយ ឬសម្លៀកបំពាក់ទេ តែសូម្បីស្ថាបត្យកម្មសំណង់លំនៅដ្ឋានឬអាគារសាធារណៈផ្សេងៗក៏គួរត្រូវបានអភិរក្សផងដែរពីព្រោះវាជាទ្រព្យសម្បត្តិមិនអាចកាត់ថ្លៃបានរបស់ខ្មែរ។ ពិតណាស់ថា មនុស្សត្រូវការភាពទំនើប ប៉ុន្តែ ភាពទំនើបមិនគួរក្លាយជាឧបសគ្គនៃការអភិរក្សអ្វីដែលជាបុរាណនោះឡើយ។ រីឯសិទ្ធិសេរីភាពរបស់បុគ្គលក្នុងការជ្រើសរើសក៏មិនគួរក្លាយជាលេសដើម្បីការពារអសមត្ថភាពរបស់ស្ថាប៍នមានសមត្ថកិច្ចនោះដែរ។
សរុបមកវិញ ជារូបភាព បុណ្យចូលឆ្នាំប្រពៃណីនៅតែជាពិធីអធិកអធមមួយដដែលសម្រាប់សង្គមខ្មែរ។ ប៉ុន្តែ ជាខ្លឹមសារវិញ ពិធីនេះកំពុងប្រែធាតុគួរឲ្យព្រួយបារម្ភ។ គឺប្រែធាតុពីបុណ្យដែលបង្ហាញពីវប្បធម៌ ប្រពៃណីជាតិ ទៅជាបុណ្យនៃគ្រឿងស្រវឹងនិងអបាយមុខផ្សេងៗទៅវិញ។ នេះជាអ្វីដែលគេមិនត្រូវមើលរំលងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ