បុគ្គលិកអាជ្ញាធរអប្សរាទាមទារថ្នាក់ដឹកនាំដោះស្រាយបញ្ហាការប្តូរទីតាំងការិយាល័យ
តំណាងបុគ្គលិកអាជ្ញាធរអប្សារាបានជួបជុំគ្នាទីស្នាក់ការកណ្តាលក្នុងក្រុងសៀមរាបនៅព្រឹកថ្ងៃព្រហស្បតិ៍នេះ ដើម្បីទាមទារអោយថ្នាក់ដឹកនាំដោះស្រាយបញ្ហាមួយចំនួនដែលទាក់ទងនឹងការធ្វើដំណើរទៅធ្វើការនៅទីតាំងថ្មី។ ទីតាំងថ្មីរបស់អាជ្ញាធរអប្សរានឹងត្រូវផ្ទេរទៅអតីតបុរីរដ្ឋបាលរបស់សាលាខេត្តសៀមរាប ក្នុងស្រុកបាគង ដែលស្ថិតនៅប្រមាណ ២០ គីឡូម៉ែត្រពីក្រុងសៀមរាប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
បុគ្គលិកអាជ្ញាធរអប្សរាប្រមាណ២០០នាក់ តំណាងអោយបុគ្គលិកទាំងអស់៣០០០នាក់បានជួបជុំគ្នា ទាមទារអោយថ្នាក់ដឹកនាំរបស់អាជ្ញាធរដោះស្រាយបញ្ហា ចំណាយមួយចំនួន នៅពេលដែលពួកគេត្រូវប្តូរទៅធ្វើការនៅទីតាំងថ្មី។ ទីតាំងថ្មីដែលស្ថិតនៅក្នុងអតីតបុរីរដ្ឋបាលរបស់សាលាខេត្តសៀមរាប។
នៅព្រឹកថ្ងៃព្រហស្បតិ៍នេះ បន្ទាប់ពីមានការតវ៉ាទាមទារពី ក្រុមតំណាងបុគ្គលិក អគ្គនាយកអាជ្ញាធរអប្សរា លោក ប៊ុន ណារិទ្ធក៏បានជួបពួកគេដើម្បី ទទួលយកសំណើទៅដោះស្រាយ។ លោកអ៊ឹម សុខរិទ្ធី មន្ត្រីនាយកដ្ឋានផ្សព្វផ្សាយនៃអាជ្ញាធរអប្សរា បានរៀបរាប់ប្រាប់វិទ្យុបារាំងនៅព្រឹកមិញនេះថា ដោយសារតែទីកន្លែងធ្វើការនៅឆ្ងាយខ្លាំង បុគ្គលិកបានសំណូមពរអោយមានការគិតគូរអំពីការចំណាយលើការធ្វើដំណើរ និងអាហារផងដែរ។ បុគ្គលិកអាជ្ញាធរអប្សរាដដែល បានបញ្ជាក់អោយដឹងថា អគ្គនាយកអាជ្ញាធរអប្សរាបានទទួលយកសំណើរបស់ពួកគេទៅពិចារណា ហើយថាមានសំណើមួយចំនួនទៀត នឹងអាចបញ្ជូនដល់ថ្នាក់ដឹកនាំជាន់ខ្ពស់ ដើម្បីធ្វើសេចក្តីសម្រេច។
គួរបញ្ជាក់ថា បុគ្គលិកនៃអាជ្ញាធរអប្សរាមិនសប្បាយចិត្ត ខណៈមានការផ្លាស់ប្តូរទីស្នាក់ការរបស់អាជ្ញាធរអប្សរា ទៅទីតាំងនៃបុរីរដ្ឋបាលរបស់សាលាខេត្តសៀមរាប ស្ថិតនៅចំងាយជិត២០គីឡូម៉ែតពីក្រុងសៀមរាបនោះ។
គួរម្លឹកថា ការបង្កើតទីតាំងបុរីរដ្ឋបាលដែលត្រូវប្រមូលគ្រប់ស្ថានប័នចំណុះក្រសួងទាំងអស់នៅមួយកន្លែង នៅក្នុងស្រុកបាគងនោះ ធ្លាប់បានទទួលការរិះគន់ និងការខឹងសម្បាររបស់មន្ត្រីរាជការថ្នាក់ខេត្តម្តងហើយ។ នៅពេលនេះ គឺមានការផ្លាស់ប្តូរ ដោយការិយាល័យរដ្ឋបាលថ្នាក់ខេត្តទាំងនោះ នឹងត្រូវដាក់ទីតាំងនៅកន្លែងការិយាល័យរបស់អាជ្ញាធរអប្សរា ដែលនៅក្បែរក្រុងសៀមរាប ហើយអាជ្ញាធរអប្សរា ត្រូវទៅនៅទីតាំងអតីតបុរីរដ្ឋបាលវិញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ