ចលនាយុវជនកម្ពុជាកាន់តែច្រើនមានភាពក្លាហាន ហ៊ាននិយាយដោយចំហរពីរឿងគណបក្សនយោបាយ
ចុះផ្សាយនៅថ្ងៃ៖
ស្តាប់ - ០៤:២៤
ទាំងមុន និងក្នុងពេលយុទ្ធនាឃោសនាបោះឆ្នោតនៅក្នុងអាណត្តិទី៥ដែលកំពុងតែចាប់ផើ្តមនេះ គេសង្កេតឃើញយុវជនកម្ពុជា ហាក់ដូចជាមានសន្ទុះខ្លាំងក្លានៅក្នុងការចូលរួមឃោសនានេះនៅក្នុងគណបក្សនយោបាយនីមួយ។ ក្រៅពីចូលរួមឃោសនា ពួកគេហាក់បីដូចជាហ៊ានចេញមុខ ចេញមាត់ដោយផ្ទាល់ផងដែរនូវការប្រើប្រាស់សិទ្ធិផ្ទាល់ខ្លួនរបស់គេក្នុងការគាំទ្រ និងនិយាយរិះគន់ចំពោះគណបក្សនយោបាយទាំងអស់នោះ។ តើការចេញមុខគាំទ្រដោយចំហររបស់ក្រុមយុវជនចំពោះគណបក្សនយោបាយវាមានឥទ្ធិល និងផលប្រយោជន៏អ្វីខ្លះដល់យុវជន?
ជាការពិត នាពេលបច្ចុប្បន្ននេះ គេសង្កេតឃើញយុវជនភាគច្រើនហាក់ដូចជាមានភាពក្លាហ៊ានច្រើនជាងមុននៅក្នុងការចូលរួម និងការគាំទ្រដោយចេញមុខ ចេញមាត់ ចំពោះគណបក្សនយោបាយដែលខ្លួនស្រឡាញ់ ដែលខ្លួនពេញចិត្ត និងហ៊ាននិយាយដោយចំហរ និងរិះគន់ដោយចំពោះមុខថែមទៀតផងទៅលើបក្សនយោបាយទាំងអស់នោះ។
បើយើងប្រៀបធៀបទៅមើលកាលពីរយៈពេលជាង១០ឆ្នាំមុន នៅក្នុងប្រទេសកម្ពុជា ការចូលរួម ការគាំទ្រ និងការហ៊ាននិយាយដោយចំហរពាក់ព័ន្ធនឹងរឿងនយោបាយពីសំណាក់យុវជន ហាក់ដូចជាមិនមានសកម្មភាពផុលផុសច្រើនដូចពេលបច្ចុប្បន្ននេះទេ។ មូលហេតុអាចបណ្តាលមកពី ភាពភ័យខ្លាច ការមិនសូវចាប់អារម្មណ៏នឹងរឿងនយោបាយ និងការប្រើប្រាស់បច្ចេកវិទ្យាព័ត៌មានវិទ្យានៅមានកម្រិតឡើយ។ល។
បើតាមរបាយការណ៏អង្កេតរបស់អង្គការសង្គមស៊ីវិលមួយចំនួននៅកម្ពុជាបានបង្ហាញថា មានយុវជនប្រមាណ ៦០%ស្ថិតនៅក្នុងចំនួនអ្នកដែលអាចបោះឆ្នោតបាននៅក្នុងបញ្ជីឈ្មោះបោះឆ្នោត ដែលមានដល់ទៅជាងប្រាំបួនលាននាក់ ដែលក្នុងនោះយុវជនដែលមានអាយុពី ១៨ឆ្នាំដល់៣៥ឆ្នាំ មានរហូតដល់ ៥៤%។
ជាក់ស្តែង គេអាចមើលឃើញយ៉ាងច្បាស់ នៅក្នុងកំឡុងពេលយុទ្ធនាការឃោសនាបោះឆ្នោតក្នុងអាណត្តិទី៥នេះ ដែលគណបក្សនយោបាយធំៗដូចជា គណបក្សប្រជាជនកម្ពុជា គណបក្សសង្គ្រោះជាតិ គណបក្សសម្ព័ន្ធដើម្បីប្រជាធិបតេយ្យ និងបណ្តាបក្សនយោបាយមួយចំនួនទៀត គឺថា ក្បួនយុទ្ធនាការឃោសនាភាគរបស់គេច្រើនមានការចូលរួមពីសំណាក់យុវជន។ បើទោះបីជា ការចូលរួមរបស់ពួកគេស្ថិតក្នុងរូបភាពនៃការវាយតម្លៃណាមួយក៏ដោយចុះ។ ប៉ុន្តែនេះវាការបង្ហាញឲ្យឃើញនូវចលនាមួយ ក្នុងការចាប់អារម្មណ៏នឹងរឿងនយោបាយ ក៏ដូចជាបញ្ហាសង្គមផ្សេងៗ របស់ក្រុមយុវជន ទោះក្នុងកម្រិតមួយតិចឫច្រើនក៏ដោយ។
ក្រៅតែពីមានភាពក្លាហាន ហ៊ានបង្ហាញមុខចូលរួមគាំទ្រ និងហ៊ាននិយាយដោយចំហរចំពោះគណបក្សនយោបាយដែលខ្លួនស្រឡាញ់ ដែលខ្លួនពេញចិត្ត គឺក្រុមយុវជនទាំងអស់នោះ ក៏នៅបានប្រើប្រាស់ វេទិការសាធារណៈ និងបណ្តាញសង្គមមួយចំនួនទៀតដូចជា ហ្វេសប៊ុក ធ្វីតទើ និងការបង្កើតប្លក់នានា ដើម្បីនិយាយ និងសរសេររិះគន់ ព្រមទាំងបញ្ចេញនូវទស្សនៈយល់ឃើញរបស់ខ្លួនទៅលើគណបក្សនយោបាយទាំងអស់នោះថែមទៀតផង។
វាជារឿងល្អដែលយុវជន មានភាពក្លាហាន ហានបង្ហាញនូវជំហរគាំទ្រ និងការចូលរួមរបស់ខ្លួន នៅក្នុងបក្សនយោបាយណាមួយដោយចំហរមុខ ដែលខ្លួនបានចូលរួមដោយការស្រឡាញ់ និងពេញចិត្ត ហើយក៏ហាននិយាយរិះគន់ផងដែរចំពោះគណបក្សដែលខ្លួនមិនពេញចិត្តនោះ។
វាល្អនៅត្រង់ថា វាជាការរួមចំណែកមួយនៅក្នុងការកែប្រែសង្គមឲ្យមានការផ្លាស់ប្តូរ របៀបដឹកនាំរបស់គណបក្សនយោបាយ និងឥរិយាបទរបស់អ្នកនយោបាយ ពីព្រោះចូរកុំភ្លេចថា យុវជនជាកម្លាំងចលករមួយខ្លាំងទាំងផ្នែកបញ្ញា ស្មារតី និងការសម្រេចចិត្តដ៏មានឥទ្ធិលបំផុតទៅលើរឿងអ្វីមួយដែលកើតឡើងនៅក្នុងសង្គម នៅពេលដែលយុវជនរួមកំលាំងគ្នានោះ។
មួយវិញទៀត វាជាការជួយទប់ និងមិនបណ្តោយឲ្យមេដឹកនាំធ្វើការដឹកនាំតាមអំពើចិត្ត ឫតាមគោលការណ៏បក្សដ៏ដាច់ខាតនោះទេ។ ហើយវាក៏ជាការបង្ហាញឲ្យឃើញពីកំលាំងសាមគ្គីរបស់យុវជនដែលជាទំពាំងស្នងឫស្សី ក្នុងការជំរុញឲ្យប្រទេសជាតិមានការវិវឌ្ឍរីកចម្រើន។
ប៉ុន្តែទន្ទឹមនឹងនោះ យុវជន ក៏គួរមានការប្រុងប្រយ័ត្នផងដែរ ថ្វីត្បិតតែថា ការចូលរួមក្នុងបក្សនយោបាយ វាជាសិទ្ធិផ្ទាល់ខ្លួននោះ។ ផ្ទុយទៅវិញ យុវជនគួរយល់ថា ការចូលគាំទ្របក្សនយោបាយណាមួយនោះ មិនមែនគ្រាន់តែចូលទៅដើម្បីតែការបំរើឲ្យបក្សនយោបាយ ឫក៏ទទួលយកនូវគោលនយោបាយរបស់គណបក្សនោះយ៉ាងផ្កាប់មុខ ឫក៏ដើម្បីទទួលលាភសកា្ករៈ បុណ្យស័ក្តិ និងមុខតំណែង រួចហើយធ្វើការរិះគន់ វាយប្រហារទៅលើបក្សនយោបាយដ៏ទៃនោះទេ ប្រការសំខាន់នោះគឺយុវជនខ្លួនឯងគួរយកចំណេះដឹង ចំណេះធ្វើ និង ការយល់ឃើញរបស់ខ្លួនយកជួយកែលម្អ និងរិះគន់ដើម្បីស្ថាបនាឲ្យបក្សនយោបាយដែលខ្លួនបានចូលរួមនោះ។ ម្យ៉ាងទៀត ការបណ្តែតបណ្តោយខ្លួនឯងចូលប្រឡាក់ប្រឡូកជ្រៅខ្លាំងពេកក្នុងរឿងនយោបាយ ទៅតាមខ្សែរពាក់របស់អ្នកនយោបាយ ខណៈខ្លួននៅក្មេង វាជាប្រការដែលយុវជនមិនគួរមើលរំលងនោះឡើយ។
ដូច្នេះ ការពិនិត្យមើលលើគោលនយោបាយឲ្យបានស៊ីជម្រៅ ប្រកបដោយការថ្លឹងថ្លែងច្បាស់លាស់ និងពិនិត្យមើលការដឹកនាំរបស់គបក្សនយោបាយ វាជារឿងសំខាន់ចាំបាច់ គួរយុវជន ងាកមកចាប់អារម្មណ៏ មុននឹងសម្រេចចិត្តចូលរួមគាំទ្រគណបក្សនយោបាយណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ