តួនាទីប្រធានអាស៊ានឆ្នាំ២០១២ជាវិញ្ញាសាសាកល្បងសមត្ថភាពកម្ពុជា
ចុះផ្សាយនៅថ្ងៃ៖
ស្តាប់ - ០៤:២៩
អគ្គលេខាធិការអាស៊ានលោក ស៊ូរិន ពិតស៊ូវណ្ណ ទើបតែបានបញ្ចប់ទស្សនកិច្ចនៅកម្ពុជានៅចុងសប្តាហ៍នេះបន្ទាប់ពីបានស្ថិតនៅលើទឹកដីកម្ពុជារយៈពេល៣ថ្ងៃ។ ដំណើរទស្សនកិច្ចរបស់លោក ស៊ូរិន ពិតស៊ូវណ្ណ បានធ្វើឡើងក្នុងបំណងផ្តល់ការគាំទ្រ និងជួយប្រទេសកម្ពុជាក្នុងការត្រៀមខ្លួនធ្វើប្រធានប្តូរវេនអាស៊ាននៅឆ្នាំ២០១២ខាងមុខនេះ។ កាលពីសប្តាហ៍កន្លងទៅក្រុមលេខាធិការដ្ឋានជាតិអាស៊ានកម្ពុជាក៏បានបើកកិច្ចប្រជុំរួចហើយដែរដើម្បីត្រៀមលក្ខណៈរៀបចំកិច្ចប្រជុំជាច្រើនដែលកម្ពុជាធ្វើជាម្ចាស់ផ្ទះ។ តើរដ្ឋាភិបាលភ្នំពេញអាចបង្ហាញសមត្ថភាពរបស់ខ្លួនក្នុងការបំពេញតួនាទីជាអន្តរជាតិបានកម្រិតណាសម្រាប់ឆ្នាំ២០១២ខាងមុខ?
ពេលវេលាដ៏សំខាន់មួយសម្រាប់កម្ពុជាបានឈានចូលមកដល់ហើយ! សម្រាប់តួនាទីជាប្រធានប្តូរវេនអាស៊ានក្នុងឆ្នាំ២០១២ខាងមុខនេះ កម្ពុជានឹងទទួលរៀបចំកិច្ចប្រជុំកំពូលអាស៊ានចំនួន២លើក រួមទាំងកិច្ចប្រជុំផ្សេងៗជាច្រើនទៀតក្នុងក្របខណ្ឌតំបន់។ កិច្ចប្រជុំកំពូលអាស៊ានលើកទី១នឹងត្រូវធ្វើឡើងនៅក្នុងអំឡុងខែមេសាខាងមុខនេះ រីឯកិច្ចប្រជុំកំពូលលើកទី២ នឹងត្រូវធ្វើនៅក្នុងអំឡុងខែវិច្ឆិកា។
ដូចជាយើងបានដឹងស្រាប់ហើយថា កិច្ចប្រជុំកំពូលទាំងនេះ ក្រៅតែពីការចូលរួមពីសំណាក់ប្រមុខរដ្ឋ និងប្រមុខរដ្ឋាភិបាលប្រទេសអាស៊ានទាំង១០ ក៏មានការចូលរួមផងដែរពីសំណាក់បណ្តាមេដឹកនាំសំខាន់ៗមកពីប្រទេសធំៗផ្សេងទៀតនៅលើពិភពលោកដែលជាដៃគូអាស៊ាន ដែលមានដូចជា សហរដ្ឋអាមេរិក ចិន ជប៉ុន កូរ៉េ ឥណ្ឌា និងអូស្រ្តាលី ជាដើម។ ដូច្នេះ ភារកិច្ចជាអន្តរជាតិដែលកម្ពុជាត្រូវទទួលខុសត្រូវនៅឆ្នាំ២០១២ខាងមុខនេះមានទំហំធំធេងណាស់។ គឺភារកិច្ចដ៏ធំធេងនេះហើយដែលទាមទារឲ្យប្រមុខការទូតកម្ពូជា លោក ហោ ណាំហុង អញ្ជើញលោក ស៊ូរិន ពិតស៊ូវណ្ណ អគ្គលេខាធិការអាស៊ានឲ្យមកទស្សនកិច្ចនៅកម្ពុជាពេលនេះដើម្បីពិភាក្សាអំពីការងារចំពោះមុខដែលកម្ពុជាត្រូវធ្វើ។
ទស្សនកិច្ចរបស់លោក ស៊ូរិន ពិតស៊ូវណ្ណ ក៏មានអត្ថន័យជាការលើកទឹកចិត្តដល់ទីក្រុងភ្នំពេញដើម្បីឲ្យទទួលជោគជ័យក្នុងការបំពេញកាតព្វកិច្ចជាអន្តរជាតិនេះផងដែរ។ ជាក់ស្តែង លោក
ស៊ូរិន ពិតស៊ូវណ្ណ បានសន្យាថា នឹងបញ្ជូនក្រុមលេខាធិការអាស៊ានមកកម្ពុជាដើម្បីធ្វើការរួមគ្នា ហើយលោកក៏បានពាំនាំនូវការគាំទ្ររបស់ប្រទេសជាសមាជិកអាស៊ានទាំងអស់ដល់តួនាទីរបស់កម្ពុជាទៀតផង។
ជាការពិតណាស់ កម្ពុជាក៏ធ្លាប់បានទទួលជោគជ័យរួចហើយក្នុងការទទួលធ្វើជាម្ចាស់ផ្ទះនៃកិច្ចប្រជុំកំពូលអាស៊ានកាលពីឆ្នាំ២០០២ ប៉ុន្តែ កម្ពុជាបានសម្តែងការព្រួយបារម្ភសម្រាប់តួនាទីជាប្រធានអាស៊ាននៅឆ្នាំនេះ ពីព្រោះប្រធានអាស៊ានក្នុងឆ្នាំ២០១២នេះ ខុសពី១០ឆ្នាំមុន ខុសគ្នានៅត្រង់ថា កាលណោះ អាស៊ាននៅមានទំហំតូចនៅឡើយ ហើយការរៀបចំកិច្ចប្រជុំក៏មិនសូវជាមានច្រើនដែរ។ តែសម្រាប់អាស៊ាននៅពេលនេះ កិច្ចប្រជុំកំពូលមានលក្ខណៈធំធេងពីព្រោះតែមានបណ្តាប្រទេសមហាអំណាចធំៗចូលរួមជាច្រើន។ ដូច្នេះ កម្ពុជាត្រូវការការគាំទ្រទាំងសម្ភារៈនិងស្មារតី ពីប្រទេសជិតខាង និងប្រទេសនៅក្នុងតំបន់ និងជាពិសេសពីលេខាធិការដ្ឋានអាស៊ានទាំងមូលយ៉ាងពេញទំហឹង។
ម្យ៉ាងទៀត តួនាទីរបស់អាស៊ានពេលនេះក៏កាន់តែមានលក្ខណៈសំខាន់ឡើងដែរពីព្រោះចូរកុំភ្លេចថា នៅសល់តែ៣ឆ្នាំទៀតប៉ុណ្ណោះ អាស៊ានត្រូវសម្រេចគោលដៅប្រកបដោយមហិច្ឆតារបស់ខ្លួនដែលបានគ្រោងទុក នោះគឺការកសាងសហគមន៍អាស៊ានមួយឲ្យបាននៅឆ្នាំ២០១៥។ នៅក្នុងបរិបទនេះ កម្ពុជាត្រូវតែបង្ហាញឲ្យឃើញនូវភាពប៉ិនប្រសប់របស់ខ្លួនក្នុងការឈានទៅសម្រេចគោលដៅរបស់អាស៊ាន។ ទាំងនេះគឺជាបន្ទុកដ៏ធ្ងន់ធ្ងរដែលកម្ពុជាត្រូវទទួលនៅក្នុងឆ្នាំ២០១២។ និយាយតាមបែបផ្សេង ឆ្នាំ២០១២គឺជាវិញ្ញាសាសាកល្បងដ៏សំខាន់សម្រាប់រដ្ឋាភិបាលក្រុងភ្នំពេញក្នុងការបង្ហាញសមត្ថភាពនៅចំពោះមុខតួនាទីជាអន្តរជាតិរបស់ខ្លួន។
ដើម្បីត្រៀមទទួលកិច្ចការដ៏ធំធេងនេះ ក្រុមលេខាធិការដ្ឋានជាតិអាស៊ានកម្ពុជាបានបើកកិច្ចប្រជុំរួចហើយ កាលពីថ្ងៃទី ១៤ធ្នូកន្លងទៅនេះ ដើម្បីត្រៀមលក្ខណៈជាស្រេច។ កិច្ចប្រជុំរដ្ឋមន្ត្រីការបរទេសចង្អៀតមួយនឹងត្រូវចាប់ផ្តើមធ្វើឡើងចាប់ពីថ្ងៃទី១០មករាខាងមុខនេះតទៅហើយនៅក្នុងខេត្តសៀមរាប។ ក្រសួងការបរទេសកម្ពុជាបានអះអាងថា បានត្រៀមលក្ខណៈរួចរាល់ហើយទាំងធនធានមនុស្ស និងធនធានសម្ភារៈដើម្បីបំពេញតួនាទីតំបន់ដ៏សំខាន់នេះ។ យ៉ាងណាក៏ដោយ គេកំពុងតែរង់ចាំមើលថា តើទីក្រុងភ្នំពេញអាចសម្រេចបានលទ្ធផលកម្រិតណាឲ្យអាស៊ាននៅក្នុងឋានៈជាប្រធានសមាគមថ្នាក់តំបន់មួយនេះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ