ក្រុមគ្រូពេទ្យផ្នែកវិកលវិជ្ជា៤ រូបគឺកម្ពុជា ២ រូបនិងអន្តរជាតិ ២ រូប បានវាយតម្លៃជាឯកច្ឆ័ន្ទ
ក្រុមគ្រូពេទ្យផ្នែកវិកលវិជ្ជា ៤ រូប គឺកម្ពុជា ២ រូប និងអន្តរជាតិ ២ រូប បានវាយតម្លៃជាឯកច្ឆ័ន្ទក្នុងរបាយការណ៍រួមថា លោកស្រី អៀង ធីរិទ្ធ អាយុ ៧៩ ឆ្នាំ អតីតរដ្ឋមន្ត្រីក្រសួងសង្គមកិច្ច សម័យខ្មែរក្រហម មានការចងចាំ និងបញ្ញាស្មារតីធ្លាក់ចុះ។ អាការៈជំងឺរបស់លោកស្រី អៀង ធីរិទ្ធ ក៏អាចប៉ះពាល់ដល់សវនាការកាត់ទោសលើសំណុំរឿង០០២ ដែលមានជនជាប់ចោទចាស់ជរា ៤ រូបដែលនឹងត្រូវបើកការជំនុំជម្រះ នៅចុងខែវិច្ឆិកាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្នុងសវនាការនៅរសៀលថ្ងៃទី១៩តុលា ឆ្នាំ២០១១ គ្រូពេទ្យជំនាញពីររូប ក្នុងចំណោមអ្នកជំនាញ ៤ រូប គឺលោកវេជ្ជបណ្ឌិត ហួត លីណា ឯកទេសវិកលវិជ្ជា នៅមន្ទីរពេទ្យមិត្តភាពខ្មែរ-សូវៀត និងលោក Seena Fazel វេជ្ជបណ្ឌិតផ្នែកវិកលវិជ្ជា ជនជាតិអង់គ្លេស បានចូលឆ្លើយបំភ្លឺ ពីការរកឃើញរបស់អ្នកជំនាញ លើអាការៈសម្បទាសតិបញ្ញាស្មារតីរបស់លោកស្រី អៀង ធីរិទ្ធ។
គ្រូពេទ្យជំនាញទាំង ៤ រូប បានជួបធ្វើតេស្តវេជ្ជសាស្ត្រលើលោកស្រីអៀងធីរិទ្ធ ចំនួន ៣ ដង ចាប់តាំងពីថ្ងៃទី១២កញ្ញា ឆ្នាំ២០១១។ ក្រុមអ្នកជំនាញ ក៏បានជួបជាមួយគ្រូពេទ្យព្យាបាលលោកស្រី អៀង ធីរិទ្ធ នៅមន្ទីរពេទ្យកាល់ម៉ែត និងអ្នកយាមពន្ធនាគារ ដែលជាអ្នកនៅជិតលោកស្រីអៀងធីរិទ្ធ។
ចំពោះមុខអង្គសវនាការ លោកវេជ្ជបណ្ឌិត ហួត លីណា បានលើកឡើងថា ក្រុមអ្នកជំនាញបានរកឃើញជាឯកច្ឆ័ន្ទលើអាការៈសម្បទាបញ្ញាស្មារតីរបស់លោកស្រី អៀង ធីរិទ្ធ បានធ្លាក់ចុះនៃការចងចាំ និងមានភាពមិននឹងននៃអារម្មណ៍។
លោកវេជ្ជបណ្ឌិត ហួត លីណា បានបញ្ជាក់ថា ការចងចាំ និងការយល់ដឹងរបស់លោកស្រី អៀង ធីរិទ្ធ មានកម្រិត គឺចាំមុខ ភ្លេចក្រោយ ដូចអាការៈជំងឺវង្វេងវង្វាន់។ ពោលគឺលោកស្រី អៀងធីរិទ្ធ មិនដឹងពីថ្ងៃខែឆ្នាំ មិនចាំឈ្មោះសាលារៀន មិនចងចាំព្រះនាមព្រះមហាក្សត្រ មិនចាំចំនួនកូនប៉ុន្មាននាក់ សូម្បីតែស្វាមីរបស់គាត់ក៏មិនស្គាល់ ហើយថា លោកអៀងសារី ជាបងប្រុសរបស់លោកស្រីទៅវិញ។
ចំណែកលោកវេជ្ជបណ្ឌិត Seena Fazel បានលើកឡើងថា ក្នុងពេលជួប ធ្វើតេស្តលោកស្រីអៀងធីរិទ្ធ គឺមិនឃើញមានចំណុចណាមួយ ដែលលោកស្រីអៀងធីរិទ្ធ ដែលមានអាយុ ៧៩ ឆ្នាំ បានធ្វើពុតជាវង្វេងវង្វាន់ ដើម្បីបានរួចខ្លួនពីការចោទប្រកាន់នោះទេ។ តែលោកស្រីអៀងធីរិទ្ធ បានយល់ដឹងពីបទចោទប្រកាន់មួយចំនួនលើរូបគាត់។ លោកស្រី ក៏អាចចូលរួមផ្តល់សក្ខីកម្ម ក្នុងសវនាការកាត់ទោសលើសំណុំរឿង០០២ នៅខែក្រោយបានផងដែរ។
ក៏ប៉ុន្តែអ្នកជំនាញអង់គ្លេសរូបនេះ បានគូសបញ្ជាក់ថា អាការៈជំងឺសតិបញ្ញាស្មារតីរបស់លោកស្រី អៀង ធីរិទ្ធ អាចប៉ះពាល់សវនាការ ដោយសារតែការចងចាំ មិនទៀងទាត់។ ហេតុដូច្នេះ សតិបញ្ញាស្មារតីរបស់លោកស្រីអៀងធីរិទ្ធ អាចជាការរារាំង និងបង្អាក់ដំណើរសវនាការ។
កាលពីខែសីហា ឆ្នាំ២០១១ អ្នកជំនាញវេជ្ជសាស្ត្រ លោក ចន ខាំប៊ែល រកឃើញថា លោកស្រី អៀងធីរិទ្ធ មានបញ្ហាខាងស្មារតី និងប្រព័ន្ធសរសៃប្រសាទ ដែលមិនអាចចូលរួមពេញលេញ ក្នុងការជំនុំជម្រះក្តីបានទេ។ ក្នុងបន្ទប់សវនាការ មានវត្តមានរបស់លោកស្រី អៀង ធីរិទ្ធ និងលោក អៀង សារី អង្គុយនៅក្រោយខ្នងសហមេធាវី។
សវនាការ កាលពីព្រឹកថ្ងៃទី១៩តុលា ឆ្នាំ២០១១ ក្រុមសហមេធាវីការពារជនរងគ្រោះ ក៏បានលើកឡើងពីការទាមទារសំណងជាក់លាក់ សម្រាប់ដើមបណ្តឹងរដ្ឋប្បវេណី នៅក្នុងសំណុំរឿង០០២។ នោះគឺ គម្រោងការរម្លឹក និងការគោរពវិញ្ញាណក្ខន្ធ ការស្តារនីតិសម្បទា ការចងក្រងឯកសារ និងការអប់រំ ដោយក្រុមជនរងគ្រោះ បានស្នើសុំឲ្យតុលាការខ្មែរក្រហម បង្កើតថ្ងៃចងចាំនៃឧក្រិដ្ឋកម្មសម្លាប់មនុស្សសម័យខ្មែរក្រហម ព្រមទាំងសាងសង់ស្តូប និងចេតិយរម្លឹកវិញ្ញាណក្ខន្ធ ជាដើម។ ចំណែកជនរងគ្រោះ ជាដើមបណ្តឹងរដ្ឋប្បវេណី ជនជាតិវៀតណាម បានស្នើសុំឲ្យតុលាការខ្មែរក្រហម ផ្តល់នូវសំណង ដោយសុំសញ្ជាតិខ្មែរ។រីឯដើមបណ្តឹងជាជនជាតិចាម បានស្នើសុំឲ្យមានការអភិរក្សវប្បធម៌របស់ជនជាតិចាម ជាដើម។
សវនាការសួរដេញដោលលើអ្នកជំនាញវេជ្ជសាស្ត្រ អំពីសតិបញ្ញាស្មារតីរបស់លោកស្រី អៀង ធីរិទ្ធ នឹងត្រូវធ្វើឡើងបន្ត នៅព្រឹកថ្ងៃទី២០តុលា ឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ