សហរដ្ឋអាមេរិកផ្តល់ថវិកាជាង ១លានដុល្លារដល់សាលាក្តីខ្មែរក្រហម
ទោះបីជាសហចៅក្រមស៊ើបអង្កេតអន្តរជាតិនៃសាលាក្តីខ្មែរក្រហម លោក Siegfried Blunkទើបតែបានលាលែងចេញពីតំណែងកាលពីដើមសប្តាហ៍នេះក៏ដោយ ក៏សហរដ្ឋអាមេរិកបានប្រកាសផ្តល់ជំនួយថវិកាជាង ១លាន ៦ សែនដុល្លារដល់សាលាក្តីនេះជាបន្តទៀត។ ប៉ុន្តែ ទន្ទឹមនឹងការផ្តល់ជំនួយនេះ ទីក្រុងវ៉ាស៊ីនតោនក៏បានអំពាវនាវឲ្យមានតម្លាភាព និងឯករាជភាពរបស់តុលាការកូនកាត់នេះផងដែរ។
ចុះផ្សាយនៅថ្ងៃ៖
ស្តាប់ - ០២:២២
សហរដ្ឋអាមេរិកបានប្រកាសនៅចុងសប្តាហ៍នេះថា នឹងផ្តល់ជំនួយថវិកា១,៦៥ លានដុល្លារដល់សាលាក្តីខ្មែរក្រហម។ ជំនួយនេះត្រូវបានប្រកាសដោយលោក Stephen J. Rapp ឯកអគ្គរដ្ឋទូតទទួលបន្ទុកឧក្រិដ្ឋកម្មសង្គ្រាមរបស់ទីក្រុងវ៉ាស៊ីនតោនកាលពីល្ងាចថ្ងៃទី១៤តុលា។ សេចក្តីប្រកាសរបស់លោក Stephen J. Rapp បានបញ្ជាក់ថា សហរដ្ឋអាមេរិកគាំទ្រយ៉ាងពេញទំហឹងដំណើរការកាត់ទោសអតីតមេដឹកនាំជាន់ខ្ពស់ខ្មែរក្រហមដែលបានធ្វើឲ្យប្រជាជនកម្ពុជាជិត២លាននាក់ស្លាប់ដោយអំពើឃោរឃៅ។
ការប្រកាសផ្តល់ជំនួយថ្មីដល់សាលាក្តីខ្មែរក្រហមបានធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីសហចៅក្រមស៊ើបអង្កេតអន្តរជាតិ លោក Siegfried Blunk បានលាលែងចេញពីតំណែងក្រោមហេតុផលថា រដ្ឋាភិបាលកម្ពុជាបានជ្រៀតជ្រែកចូលកិច្ចការផ្ទៃក្នុងរបស់តុលាការ។ ប៉ុន្តែ ទន្ទឹមនឹងការប្រកាសផ្តល់ជំនួយបន្ថែមដល់សាលាក្តីខ្មែរក្រហមនៅពេលនេះ ទីក្រុងវ៉ាស៊ីនតោនក៏មិនភ្លេចអំពាវនាវឲ្យមានឯករាជភាពរបស់តុលាការផងដែរ។ លោក ឯកអគ្គរដ្ឋទូតផ្នែកឧក្រិដ្ឋកម្មសង្គ្រាមអាមេរិកបានបញ្ជាក់ថា ដើម្បីឲ្យជនរងគ្រោះក្នុងរបបខ្មែរក្រហមទទួលបានយុត្តិធម៌ ការកាត់ទោសអតីតមេដឹកនាំខ្មែរក្រហមត្រូវប្រព្រឹត្តទៅដោយតម្លាភាព និងឯករាជភាព។
ក្នុងសេចក្តីប្រកាសនោះទីក្រុងវ៉ាស៊ីនតោនក៏បានអំពាវនាវឲ្យគ្រប់ភាគីទាំងអស់ដែលពាក់ព័ន្ធជាមួយសាលាក្តីត្រូវប្រកាសជាថ្មីម្តងទៀតអំពីជំហររបស់ខ្លួនដែលគាំទ្រដល់ឯករាជភាពរបស់តុលាការដោយចៀសឲ្យបាននូវការជ្រៀតជ្រែកមិនថាពីមជ្ឈដ្ឋានណាឡើយ។ បន្ទាប់ពីការលាលែងរបស់សហចៅក្រមអន្តរជាតិកាលពីដើមសប្តាហ៍ ក្រសួងការបរទេសកម្ពុជាបានបដិសេធការចោទប្រកាន់ថា ខ្លួនបានលូកដៃជ្រៀតជ្រែកចូលកិច្ចការផ្ទៃក្នុងរបស់តុលាការ។ ទីក្រុងភ្នំពេញបញ្ជាក់ថា ខ្លួនបានយល់ច្បាស់អំពីបុព្វសិទ្ធិរបស់តុលាការដែលចង់ចោទឬមិនចោទជនសង្ស័យណាម្នាក់។ យ៉ាងណាក៏ដោយ រដ្ឋាភិបាលកម្ពុជានៅតែការពារយ៉ាងម៉ឺងម៉ាត់តម្លៃនៃសន្តិភាព ការផ្សះផ្សាជាតិ ដែលតុលាការនេះមិនអាចធ្វើឲ្យបែកធ្លាយបានទេ។
សូមបញ្ជាក់ថា តុលាការខ្មែរក្រហមនឹងត្រូវអស់ថវិកាដំណើរការរបស់ខ្លួនចាប់ពីចុងឆ្នាំ២០១១នេះប្រសិនបើគ្មានជំនួយថ្មីធ្លាក់មកទេនោះ។ យ៉ាងណាក៏ដោយ សហរដ្ឋអាមេរិកបានផ្តល់ថវិកា២លានដុល្លារសម្រាប់ឆ្នាំ២០០៨ និងសន្យាផ្តល់៥លានដុល្លារទៀតសម្រាប់ឆ្នាំសារពើពន្ធ២០១១នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ