អង្គការក្រៅរដ្ឋាភិបាល និងសកម្មជនដីធ្លី ជួបជុំសាទរទិវាលំនៅឋានពិភពលោក
នៅព្រឹកថ្ងៃច័ន្ទ ទី៣តុលានេះ ក្រុមអង្គការក្រៅរដ្ឋាភិបាល និងសកម្មជនដីធ្លី មកពីសហគមន៍ទាំង ៤២ នៅក្នុងទីក្រុងភ្នំពេញ ជាពិសេសក្រុមអ្នកភូមិបឹងកក់ បានជួបជុំនៅរោងមហោស្រពចេនឡា ដើម្បីប្រារព្ធខួបលើកទី២៦ ទិវាលំនៅឋានពិភពលោក ក្រោមប្រធានបទ ទីក្រុង និងការប្រែប្រួលអាកាសធាតុ។ អង្គវេទិកានៅព្រឹកមិញ បានផ្ញើសារទៅកាន់រដ្ឋាភិបាល ឲ្យគិតគូរ ពីគម្រោងអភិវឌ្ឍន៍ទីក្រុង ដែលមានការចាក់ដីលុបបឹងយ៉ាងច្រើន នាពេលសព្វថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
នៅក្នុងសករាជទីក្រុងថ្មីនាពេលនេះ មានមនុស្សម្នាយ៉ាងច្រើនកំពុងរស់នៅក្នុងទីក្រុង និងទីប្រជុំជន ដូច្នេះរដ្ឋាភិបាលត្រូវតែចងចាំថា ភយន្តរាយប៉ះពាល់ដ៏ធ្ងន់ធ្ងរបំផុត ដែលជាលទ្ធផលនៃការប្រែប្រួលអាកាសធាតុ គឺកើតឡើងហើយបញ្ចប់ទៅវិញនៅក្នុងទីក្រុង។ ការអភិវឌ្ឍន៍ទីក្រុង មានឥទ្ធិពលយ៉ាងធំធេងលើការប្រែប្រួលអាកាសធាតុ។ នេះគឺជាសារសំខាន់ ដែលអង្គការសហប្រជាជាតិ បានប្រកាសចេញ នៅទិវាលំនៅឋានពិភពលោក នៅថ្ងៃច័ន្ទនេះ។
សម្រាប់ប្រទេសកម្ពុជានៅឆ្នាំនេះ អង្គការសង្គមស៊ីវិល និងបណ្ដាញសហគមន៍ ដែលធ្វើការងារទាក់ទងនឹងការអភិវឌ្ឍន៍ និងវិស័យផ្សេងៗ ជាពិសេសវិស័យលើកកំពស់ការគោរពសិទ្ធិលំនៅឋានដីធ្លី មុខរបរការងារ និងក្រុមអ្នកភូមិបឹងកក់ ដែលប្រឈមនឹងការបណ្តេញចេញ បានជួបជុំប្រារព្ធទិវាលំនៅឋានពិភពលោក ក្រោមប្រធានបទ ស្ដីអំពី “ ទីក្រុង និងការប្រែប្រួលអាកាសធាតុ ” ។
ក្នុងពិធីនៅរោងមហោស្រពចេនឡា នៅទីក្រុងភ្នំពេញ ព្រឹកមិញ សកម្មជនដីធ្លី និងអង្គការសិទ្ធិមនុស្ស បានលើកឡើងថា រដ្ឋាភិបាលកម្ពុជា កំពុងរៀបចំការអភិវឌ្ឍន៍យ៉ាងសស្រាក់សស្រាំនៅតាមទីក្រុង និងទីប្រជុំជននានាទូទាំងប្រទេស ដើម្បីបង្ហាញប្រាប់ពិភពលោកអំពីការរីកចម្រើនរបស់ខ្លួន។ ប៉ុន្តែការអភិវឌ្ឍន៍ទាំងនោះ មិនបានការពារទៅដល់សិទ្ធិរបស់ប្រជាពលរដ្ឋមូលដ្ឋានទេ។ ម្យ៉ាងវិញទៀតថ្មីៗនេះ រដ្ឋាភិបាលបានប្រកាសជាសាធារណៈអំពីគម្រោងលុបបឹងធំៗនៅក្នុងទីក្រុង ដើម្បីយកទីតាំងសម្រាប់ការអភិវឌ្ឍន៍ផ្សេងៗ ដែលជាតម្រូវការនាពេលអនាគត។
តាមអង្គវេទិកានៅព្រឹកមិញ បដិវត្ដន៍នគរូបនីយកម្មដ៏ធំសម្បើម នឹងកើតឡើងនៅក្នុងទីក្រុង និងទីប្រជុំជននានា នៅក្នុងប្រទេសកំពុងអភិវឌ្ឍន៍ ដូចកម្ពុជា ប្រសិនបើមិនមានយន្ដការ និងគោលដៅកំណត់ច្បាស់លាស់ សម្រាប់ការអភិវឌ្ឍន៍ទាំងនោះទេ។
ក្រុមអ្នកចូលរួមពិធី ពាក់អាវយឺតពណ៌បៃតងដៃខ្លី បានអានសេចក្តីថ្លែងការណ៍ជាច្រើន។ ក្នុងនោះ ក្រុមអ្នកភូមិបឹងកក់ ដែលបានចូលរួមក្នុងពិធីនោះ ក៏បានថ្លែងការណ៍ និងច្រៀងពីការបណ្ថេញចេញទាំងបង្ខំពីលំនៅឋានផងដែរ។
តំណាងរដ្ឋាភិបាល មិនបានចូលរួមទិវាលំនៅឋានពិភពលោក នៅព្រឹកមិញទេ បើទោះបីជាមានកម្មវិធី ត្រូវឡើងធ្វើបទអន្តរាគមន៍ក៏ដោយ។
យ៉ាងណាក៏ដោយ នៅកន្លែងធ្វើបាតុកម្ម នៅសួនសេរីភាព ក្នុងទីក្រុងភ្នំពេញ នៅថ្ងៃ៣តុលា ទិវាលំនៅឋានពិភពលោក មានអតីតក្រុមអ្នកភូមិបឹងកក់មួយក្រុម បានឈរតវ៉ា លើកបដា និងរូបថតថ្នាក់ដឹកនាំទាំងបីរបស់គណបក្សប្រជាជន ព្រមទាំងរូបព្រះភ័ក្ត្រសម្តេចឪ នរោត្តមសីហនុ។ អតីតអ្នកភូមិបឹងកក់ ដែលបានទទួលយកសំណង ផ្ទះល្វែង និងលុយ៨៥០០ ដុល្លារ ដើម្បីចាកចេញពីបឹងកក់ក្នុងពេលកន្លងមក បានទាមទារឲ្យប្រមុខរដ្ឋាភិបាល អន្តរាគមន៍ ទៅកាន់ក្រុមហ៊ុនស៊ូកាគូអ៊ិន ដើម្បីបន្ថែមសំណង ព្រោះពួកគេប្រឈមនឹងជីវភាពខ្វះខាតនាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ