អង្គការសហប្រជាជាតិស្នើអោយកម្ពុជាបញ្ឈប់សេចក្តីព្រាងច្បាប់អង្គការ
អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្ស នៅកម្ពុជា លោក សុរិយា ស៊ុប៊ឺឌី បានថ្លែងស្នើអោយកម្ពុជាបញ្ឈប់ការតាក់តែងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល។ សេចក្តីថ្លែងរបស់តំណាងអង្គការសហប្រជាជាតិទទួលបន្ទុកសិទ្ធិមនុស្ស នៅកម្ពុជា ត្រូវបានធ្វើឡើងនៅក្នុងរបាយការណ៍ប្រចាំឆ្នាំរបស់ខ្លួនស្តីពី ស្ថានភាពសិទ្ធិមនុស្សនៅកម្ពុជាដែលត្រូវផ្ញើទៅក្រុមប្រឹក្សា សិទ្ធិមនុស្សរបស់អង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
បើទោះជាក្រសួងមហាផ្ទៃបានសម្រេចពិនិត្យឡើងវិញនូវសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលយ៉ាងណាក៏ដោយ សកម្មភាពនេះនៅតែមិនទាន់គ្រប់គ្រាន់ឡើយសម្រាប់អង្គការក្រៅរដ្ឋាភិបាល។ ការតាក់តែងសេចក្តីព្រាងច្បាប់សមាគម និងអង្គការមិនមែនរដ្ឋាភិបាលត្រូវបានលើកឡើងទៅដល់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិទៀតតាមរយៈលោកសុរិយា ស៊ុប៊ឺឌី។
លោកសុរិយា ស៊ូប៊ឺឌីអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានធ្វើរបាយការណ៍ស្តីពីស្ថានភាពសិទ្ធិមនុស្សប្រចាំឆ្នាំដោយបង្ហាញពីការព្រួយបារម្ភថា សេចក្តីព្រាងច្បាប់នេះអាចបង្អាក់ដល់ការងារស្របច្បាប់របស់អង្គការមិនមែនរដ្ឋាភិបាលនានានៅកម្ពុជា ហើយលោកសុរិយា ស៊ូប៊ឺឌីបានអត្ថាធិប្បាយបន្តប្រាប់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិថា រដ្ឋាភិបាលកម្ពុជាពុំគួរបន្តធ្វើសេចក្តីព្រាងច្បាប់អង្គការមិនមែនរដ្ឋាភិបាលនេះនៅក្នុងបែបផែនបច្ចុប្បន្ននេះនោះទេ។
សម្រាប់អ្នករាយការណ៍ពិសេសតំណាងអង្គការសហប្រជាជាតិ អង្គការសង្គមស៊ីវិលជាច្រើននៅកម្ពុជាកំពុងដើរតួនាទីបំពេញបន្ថែមលើតួនាទីរបស់រដ្ឋ ដោយការជួយផ្តល់សេវាសង្គមកិច្ចសំខាន់ៗក្នុងវិស័យជាច្រើនដូចជា អប់រំ សុខាភិបាល បរិស្ថានជាដើម។
ការអត្ថាធិប្បាយរបស់តំណាងអង្គការសហប្រជាជាតិ វាជារឿងរបស់អង្គការសហប្រជាជាតិ។ ប៉ុន្តែបើអោយកម្ពុជាបញ្ឈប់ការតាក់តែងសេចក្តីព្រាងច្បាប់អង្គការក្រៅរដ្ឋាភិបាលនេះ គឺមិនអាចឡើយ។
នេះបើតាមការបញ្ជាក់របស់លោកឧត្តមសេនីយឯកខៀវ សុភ័គ អ្នកនាំពាក្យក្រសួងមហាផ្ទៃ។ អ្នកនាំពាក្យរូបនេះ ពន្យល់ថារដ្ឋាភិបាលកម្ពុជាបានតាក់តែងសេចក្តីព្រាងច្បាប់នេះ ទៅតាមស្មារតីនៃរដ្ឋធម្មនុញ្ញតែប៉ុណ្ណោះ។ សម្រាប់លោកខៀវ សុភ័គ ចំពោះសេចក្តីព្រាងច្បាប់នេះ វាមិនមែនមានតែអ្នកប្រឆាំងតែមួយនោះទេ។ ក៏មានដែលអ្នកដែលមានឆន្ទះចង់អោយមានច្បាប់អង្គការនេះ ដើម្បីប្រយោជន៍សង្គមកម្ពុជា។
គួរបញ្ជាក់ថា ក្រោយពីមានការតវ៉ាពីក្រុមអង្គការសង្គមស៊ីវិល ក្រសួងមហាផ្ទៃបានយល់ព្រមពិនិត្យឡើងវិញនូវមាត្រាមួយចំនួនដែលជាសំណូមពររបស់សង្គមស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ