អាជ្ញាធរថៃខេត្តអ៊ូប៊ុនដោះលែងពលរដ្ឋខ្មែរ៧នាក់
អាជ្ញាធរថៃខេត្តអ៊ូប៊ុន បានសម្រេចដោះលែងពលរដ្ឋខ្មែរ៧នាក់ អោយមានសេរីភាពវិញនៅថ្ងៃ២៩សីហានេះ។ ការសម្រេចដោះលែងពលរដ្ឋខ្មែរនៅពេលនេះ ត្រូវបានអ្នកនាំពាក្យក្រសួងការបរទេសកម្ពុជាពន្យល់ថាដោយសារការខិតខំខ្នះខ្នែងរបស់មន្ត្រីទូតកម្ពុជានៅខេត្តស្រះកែវ។
ចុះផ្សាយនៅថ្ងៃ៖
ស្តាប់ - ០១:២៤
ពលដ្ឋខ្មែរចំនួន ៧ នាក់ដែលត្រូវបានប៉ូលីសថៃខេត្តអ៊ូប៊ុនចាប់ខ្លួនកាលពីថ្ងៃទី៧ ខែកក្កដាដោយចោទប្រកាន់អំពីការឆ្លងដែនខុសច្បាប់នោះ ត្រូវបានតុលាការថៃសម្រេចដោះលែងអោយមានសេរីភាពវិញហើយនៅថ្ងៃទី២៩សីហានេះ នេះបើតាមការបញ្ជាក់របស់លោកកុយ គួង អ្នកនាំពាក្យក្រសួងការបរទេសកម្ពុជា។ ពលរដ្ឋខ្មែរទាំង៧នាក់នឹងត្រូវបញ្ជូនមកដល់កម្ពុជានៅព្រឹកថ្ងៃអង្គារទី៣០សីហា។
លោកកុយ គួងបានអោយដឹងថា អគ្គកុងស៊ុលកម្ពុជាប្រចាំខេត្តស្រះកែវបានព្យាយាមធ្វើការងារនេះជាមួយអាជ្ញាធរថៃរបស់ខេត្តអ៊ូប៊ុន ដើម្បីអាចស្នើសុំអោយមានការដោះលែងពលរដ្ឋខ្មែរទាំង៧នាក់ ដែលគ្មានចេតនាឆ្លងដែនខុសច្បាប់ចូលទឹកដីថៃនោះទេ។
ពលរដ្ឋខ្មែរទាំង៧នាក់ជាអ្នកភូមិស្រុកជាំក្សាន្តខេត្តព្រះវិហារបានដើរបោចវល្លិ និងស្វែងរកអនុផលព្រៃឈើនៅតាមព្រំដែន ហើយក៏ត្រូវអាជ្ញាធរថៃចាប់ឃាត់ខ្លួន ក្រោមការចោទប្រកាន់ពីបទល្មើសផ្សេងៗ។
ទន្ទឹមគ្នានេះ កាសែតថៃរ៉ាត់បានផ្សាយអោយដឹងថា ប៉ូលិសថៃខេត្តស្រះកែវបានចាប់ខ្លួនពលរដ្ឋខ្មែរ១៣នាក់កាលពីថ្ងៃសៅរ៍ទី២៧សីហា នៅក្នុងខេត្តស្រះកែវ។ ក៏ប៉ុន្តែ មន្ត្រីទូតរបស់កម្ពុជានៅមិនទាន់ទទួលបានព័ត៌មានស្តីអំពីការ ការចាប់ខ្លួនពលរដ្ឋខ្មែរទាំង១៣នាក់នេះឡើយ ហើយថាមន្ត្រីអគ្គកុងស៊ុលកម្ពុជាកំពុងតាមដានស្វែងរកព័ត៌មាននេះ។
ពលករកម្ពុជាដែលគេបានធ្វើការចាប់ខ្លួននេះ មានប្រុសចំនួន៥នាក់ស្រី៥នាក់ និងក្មេងប្រុស៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ