UN សម្រេចឲ្យឈប់បាញ់ជាអចិន្ត្រៃយ៍ នៅព្រំដែនកម្ពុជា-ថៃ
ទីបំផុតទៅ ក្រុមប្រឹក្សាសន្តិសុខអង្គការសហប្រជាជាតិ បានសម្រេចក្នុងកិច្ចប្រជុំ កាលពីថ្ងៃទី១៤កុម្ភៈ ឆ្នាំ២០១១ ដើម្បីឲ្យមានការឈប់បាញ់ជាអចិន្ត្រៃយ៍ នៅតំបន់ព្រំដែនជម្លោះកម្ពុជា-ថៃ ជិតប្រាសាទព្រះវិហារ។ ក្រុមប្រឹក្សាសន្តិសុខអង្គការសហប្រជាជាតិ ក៏បានប្រគល់តួនាទីដល់អាស៊ាន ដើម្បីធ្វើជាភាគីទី៣ ចរចា ស្វែងរកដំណោះស្រាយ បញ្ចប់ជម្លោះព្រំដែនជិតប្រាសាទព្រះវិហារផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរពីភ្នំពេញ
ដោយសម្តែងក្តីបារម្ភយ៉ាងខ្លាំងលើព្រឹត្តិការណ៍ប៉ះទង្គិចប្រដាប់អាវុធ នាពេលថ្មីៗនេះ រវាងកម្ពុជា និងថៃ ក្រុមប្រឹក្សាសន្តិសុខអង្គការសហប្រជាជាតិ បានជំរុញដល់សមាគមអាស៊ាន ឲ្យបង្កើតយន្តការឈប់បាញ់ជាអចិន្ត្រៃយ៍នៅព្រំដែនព្រះវិហារ។ អាស៊ានក៏ត្រូវបើកកិច្ចប្រជុំ ដើម្បីពិភាក្សា ស្វែងរកដំណោះស្រាយដោយសន្តិវិធី លើជម្លោះព្រំដែនកម្ពុជា និងថៃ។
បន្ទាប់ពីកិច្ចប្រជុំ កាលពីថ្ងៃចន្ទ ទី១៤កុម្ភៈ លោកស្រី Maria Luiza Ribeiro Viotti ប្រធានក្រុមប្រឹក្សាសន្តិសុខរបស់អង្គការសហប្រជាជាតិ បានចេញសេចក្តីថ្លែងការណ៍ ដោយអំពាវនាវដល់ភាគីជម្លោះ កម្ពុជា និងថៃ ដើម្បីអត់ធ្មត់ជាអតិបរមា និងចៀសវាងរាល់សកម្មភាពទាំងឡាយណា ដែលអាចធ្វើឲ្យស្ថានការណ៍ព្រំដែនកាន់តែដុនដាប។
សមាជិកក្រុមប្រឹក្សាសន្តិសុខអង្គការសហប្រជាជាតិ ក៏បានជំរុញទៅកាន់គ្រប់ភាគីទាំងអស់ ឲ្យបង្កើតការឈប់បាញ់ជាអចិន្ត្រៃយ៍នៅតំបន់ព្រំដែនកម្ពុជា-ថៃ និងអនុវត្តយ៉ាងពេញលេញនូវសេចក្តីសម្រេចឈប់បាញ់ ព្រមទាំងស្វែងរកដំណោះស្រាយលើបញ្ហាព្រំដែនដោយសន្តិវិធី តាមរយៈការប្រជុំចរចា។
ភាពតានតឹងផ្នែកយោធារវាងកម្ពុជា និងថៃ នៅតំបន់ព្រំដែនព្រះវិហារ បានកើតឡើង ចាប់តាំងពីថ្ងៃទី១៥កក្កដា ឆ្នាំ២០០៨ គឺនៅពេលដែលកងទ័ពថៃ បានលើកទ័ពចូលឈ្លានពានទឹកដីកម្ពុជា។ ការប៉ះទង្គិចដោយអាវុធ បានកើតឡើងជាញឹកញាប់រវាងកងទ័ពទាំងពីរ នៅជិតប្រាសាទព្រះវិហារ។ ក្នុងនោះ ការប្រយុទ្ធ ដែលកម្ពុជា ចាត់ទុកថា ជាសង្គ្រាមឈ្លានពានរបស់ថៃ លើបូរណភាពទឹកដីកម្ពុជា បានកើតឡើងជាថ្មី ចាប់តាំងពីថ្ងៃទី៤កុម្ភៈ ដល់ថ្ងៃទី៧កុម្ភៈ ឆ្នាំ២០១១។ កងទ័ពកម្ពុជា និងប្រជាជនស៊ីវិលចំនួន ៦ នាក់ បានពលី និងស្លាប់ ព្រមទាំងរងរបួស ៧១ នាក់ផ្សេងទៀត។
ក្រុមប្រឹក្សាសន្តិសុខអង្គការសហប្រជាជាតិ ក៏បានបញ្ជាក់ពីការគាំទ្ររបស់ខ្លួនចំពោះអាស៊ាន លើកិច្ចខិតខំប្រឹងប្រែង ដើម្បីដោះស្រាយលើស្ថានភាពព្រំដែនរវាងកម្ពុជា និងថៃ។ក្រុមប្រឹក្សាសន្តិសុខអង្គការសហប្រជាជាតិ ក៏បានលើកទឹកចិត្តដល់គ្រប់ភាគី ឲ្យបន្តកិច្ចសហប្រតិបត្តិការ ជាមួយអាស៊ាន ដើម្បីស្វែងរកដំណោះស្រាយព្រំដែនកម្ពុជា-ថៃ។
សូមបញ្ជាក់ថា រដ្ឋមន្ត្រីការបរទេសអាស៊ាន ចំនួន ១០ ប្រទេស ដែលរួមមានទាំងកម្ពុជា និងថៃ ជាភាគីជម្លោះ គ្រោងនឹងជួបប្រជុំ នាថ្ងៃទី២២កុម្ភៈ ឆ្នាំ២០១១ នៅទីក្រុងហ្សាកាតា ប្រទេសឥណ្ឌូនេស៊ី។ ជាកិច្ចប្រជុំ ដែលដឹកនាំដោយរដ្ឋមន្ត្រីការបរទេសឥណ្ឌូនេស៊ី ក្នុងនាមជាប្រធានអាស៊ានផ្លាស់វេន ដើម្បីដោះស្រាយជម្លោះព្រំដែនកម្ពុជានិងថៃ។
យ៉ាងណាក៏ដោយលោក កុយ គួង អ្នកនាំពាក្យក្រសួងការបរទេសកម្ពុជា បានលើកឡើងថា ការសម្រេចឈប់បាញ់ជាអចិន្ត្រៃយ៍នៅតំបន់ព្រំដែនកម្ពុជា-ថៃ និងការបង្កើតយន្តការដោះស្រាយជម្លោះ តាមរយៈកិច្ចប្រជុំចរចាក្នុងសមាគមអាស៊ាន គឺជាអ្វីដែលកម្ពុជាចង់បាន។ ជារួមតាមលោក កុយ គួង ការសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ជា ជោគជ័យដ៏ធំរបស់កម្ពុជា ក្នុងសមរភូមិការទូតជាមួយថៃ លើសំណុំរឿងព្រំដែន។
នៅថ្ងៃនេះ កាសែតថៃ បានស្រង់សម្តីលោក កាស៊ីត ភិរម្យ រដ្ឋមន្ត្រីការបរទេសថៃ មកចុះផ្សាយថា ថៃមិនមានបំណងប្រឆាំងកម្ពុជាឡើយ។ ថៃក៏គាំទ្របទឈប់បាញ់ជាអចិន្ត្រៃយ៍ និងដំណោះស្រាយដោយសន្តិវិធី លើជម្លោះព្រំដែនជាមួយកម្ពុជា។
លោកប្រមុខការទូតថៃ ក៏បានលើកឡើងពីជំហររបស់ថៃលើការចរចាទ្វេភាគី រវាងកម្ពុជា និងថៃ លើជម្លោះព្រំដែន។ ប៉ុន្តែកម្ពុជា មិនទទួលយកជំហររបស់ថៃ ដែលបានអូសបន្លាយជម្លោះជាងពីរឆ្នាំមកហើយនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ