ប្រមុខការទូតកម្ពុជា ចេញដំណើរទៅកាន់អង្គការសហប្រជាជាតិ
កាលពីប៉ុន្មាននាទីមុននេះ រដ្ឋមន្ត្រីការបរទេសកម្ពុជា លោក ហោ ណាំហុង បានដឹកនាំគណៈប្រតិភូជាន់ខ្ពស់មួយក្រុម ចាកចេញពីកម្ពុជា ទៅកាន់ទីស្នាក់ការអង្គការសហប្រជាជាតិ នៅបូរីញូវយ៉ក។ លោក ហោ ណាំហុង ត្រូវចូលរួមតុប្រជុំ ជាមួយក្រុមប្រឹក្សាសន្តិសុខអង្គការសហប្រជាជាតិ នាថ្ងៃចន្ទ ទី១៤កុម្ភៈ ខាងមុខ។ ចំពោះមុខក្រុមប្រឹក្សាសន្តិសុខអង្គការសហប្រជាជាតិ ប្រមុខការទូតកម្ពុជា នឹងលើកបញ្ជាក់ពីសកម្មភាពឈ្លានពានរបស់ថៃ មកលើបូរណភាពដែនដីកម្ពុជាម្តងហើយម្តងទៀត ជាពិសេសកងទ័ពថៃ បានបាញ់លើប្រាសាទព្រះវិហារ ដែលជាសម្បត្តិបេតិកភណ្ឌពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរពីភ្នំពេញ
មុនពេលឡើងយន្តហោះ ចាកចេញទៅកាន់អង្គការសហប្រជាជាតិ កាលពីប៉ុន្មាននាទីមុននេះ លោក ហោ ណាំហុង បានថ្លែងទៅកាន់អ្នកកាសែតថា ការប្រជុំក្រុមប្រឹក្សាសន្តិសុខ របស់អង្គការសហប្រជាជាតិ នាម៉ោង ១០ ព្រឹក ថ្ងៃចន្ទខាងមុខ ជាបរាជ័យមួយដ៏ធំរបស់ថៃ។ ថៃដែលបានបញ្ចុះបញ្ចូល មិនចង់ឲ្យក្រុមប្រឹក្សាសន្តិសុខអង្គការសហប្រជាជាតិកោះប្រជុំ លើបញ្ហាព្រំដែនរវាងកម្ពុជា-ថៃឡើយ។
លោកប្រមុខការទូតកម្ពុជា ត្រូវចូលរួមតុប្រជុំក្រុមប្រឹក្សាសន្តិសុខអង្គការសហប្រជាជាតិ នាថ្ងៃចន្ទ ទី១៤កុម្ភៈ ឆ្នាំ២០១១។ កិច្ចប្រជុំ ដែលមានការចូលរួមពីសមាជិកអចិន្ត្រៃយ៍ និងមិនអចិន្ត្រៃយ៍ ក្នុងក្រុមប្រឹក្សាសន្តិសុខអង្គការសហប្រជាជាតិ ចំនួន ១៥ ប្រទេស និងមានភាគីជម្លោះ រដ្ឋមន្ត្រីការបរទេសកម្ពុជា-ថៃ ព្រមទាំងរដ្ឋមន្ត្រីការបរទេសឥណ្ឌូនេស៊ី ក្នុងនាមជាប្រធានអាស៊ាន។
លោក ហោ ណាំហុង បានថ្លែងថា លោកនឹងលើកឡើងពីការរំលោភបំពានរបស់ថៃ លើដែនដីកម្ពុជា ចាប់តាំងពីឆ្នាំ២០០៨ រហូតដល់ថ្ងៃទី៤ បន្តដល់ថ្ងៃទី៧កុម្ភៈនេះ។ លោកប្រមុខការទូត ក៏នឹងលើកឡើងពីដំណើរដើមចម និងមូលហេតុនៃការធ្វើសង្គ្រាមរបស់ថៃ លើកម្ពុជា។ នោះក៏ដោយសារតែថៃ មិនគោរពសាលក្រមរបស់តុលាការអន្តរជាតិ ឆ្នាំ១៩៦២។
ក្រៅពីនេះ លោក ហោ ណាំហុង ក៏នឹងលើកសំណូមពរមួយចំនួនទៅកាន់ក្រុមប្រឹក្សាសន្តិសុខរបស់អង្គការសហប្រជាជាតិ ដើម្បីធានាការឈប់បាញ់ជាអចិន្ត្រៃយ៍នៅព្រំដែនព្រះវិហារ។
ទោះជាយ៉ាងណា លោកប្រមុខការទូតកម្ពុជា បញ្ជាក់ថា កម្ពុជាចង់ដោះស្រាយបញ្ហានេះ ដោយសន្តិវិធី ដោយមានសហគមន៍អន្តរជាតិចូលរួម ខណៈដែលថៃចង់ដោះស្រាយទ្វេភាគី។
តាមលោក ហោ ណាំហុង ការចរចាទ្វេភាគីរវាងកម្ពុជា និងថៃលើជម្លោះព្រំដែន ហួសសម័យ និងមិនអាចទៅរួចឡើយ។ បញ្ហាគ្រាប់មីនចង្កោមរបស់ថៃ បាញ់លើកម្ពុជា ក៏ជាប្រធានបទ របស់លោកប្រមុខការទូត ត្រូវលើកឡើងនៅមុខក្រុមប្រឹក្សាសន្តិសុខអង្គការសហប្រជាជាតិ នាថ្ងៃច័ន្ទខាងមុខផងដែរ។
ជាការកត់សម្គាល់ គណៈប្រតិភូកម្ពុជា ដែលទៅចូលរួមតុចរចានៅក្រុមប្រឹក្សាសន្តិសុខអង្គការសហប្រជាជាតិ នាពេលនេះ មានតែមន្ត្រីខាងក្រសួងការបរទេសប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ