ឯកសារសម្ងាត់ជា«ចំណុចរសើប»របស់បក្សប្រឆាំង
ចុះផ្សាយនៅថ្ងៃ៖
ស្តាប់ - ០៤:០៣
បន្ទាប់ពីការទម្លាយឯកសារសម្ងាត់ស្តីពីកិច្ចសន្ទនារវាង លោកនាយករដ្ឋមន្ត្រីហ៊ុន សែន ជាមួយលោកកឹម សុខា កាលពីចុងខែឧសភា ដែលធ្វើឲ្យគណបក្សសម រង្ស៊ីកាត់ផ្តាច់និស្ស័យជាមួយគណបក្សសិទ្ធិមនុស្សរួចមក លោកនាយករដ្ឋមន្ត្រី ហ៊ុន សែន បានព្រមានជាសាធារណៈថាលោកនៅមានឯកសារសម្ងាត់ជាច្រើនទៀតទាក់ទង ជាមួយកិច្ចសន្ទនាជាមួយមេដឹកនាំបក្សប្រឆាំង ក្នុងនោះក៏មានឯកសារទាក់ទងលោកសម រង្ស៊ីផងដែរ។ ប៉ុន្តែ មន្ត្រីគណបក្សសម រង្ស៊ី បដិសេធថា លោកសម រង្ស៊ី គ្មានអាថ៌កំបាំងជាមួយលោកនាយករដ្ឋមន្ត្រីទេ។ យ៉ាងណាក៏ដោយព្រឹត្តិការណ៍នេះកំពុងចុចចំចំណុចរសើបរបស់បក្ស ប្រឆាំង។
សំណុំរឿងឯកសារសម្ងាត់ស្តីពីទំនាក់ទំនងក្រៅឆាករវាងលោកនាយករដ្ឋមន្ត្រី ហ៊ុន សែន ជាមួយមេដឹកនាំបក្សប្រឆាំងបាននិងកំពុងធ្វើឲ្យមានភាពច្របូកច្របល់មួយចំនួនកើតឡើងនៅក្នុងមជ្ឈដ្ឋានអ្នកនយោបាយប្រឆាំងនៅកម្ពុជា។
តាមពិតគោលដៅនៃការបញ្ចេញឯកសារសម្ងាត់ទាំងនេះមិនមែនជារឿងគួរឲ្យឆ្ងល់ទេពីព្រោះថា ការបំបែកកម្លាំងឬធ្វើឲ្យគូបដិបក្ខនយោបាយចុះខ្សោយគឺជាយុទ្ធសាស្ត្រដ៏សាមញ្ញមួយដែលអ្នកនយោបាយតែងប្រើប្រាស់ជាធម្មតា។ ប៉ុន្តែ តើមេដឹកនាំបក្សប្រឆាំងសុទ្ធតែមានទំនាក់ទំនងសម្ងាត់ជាមួយលោកនាយករដ្ឋមន្ត្រីហ៊ុន សែនមែនដែរឬទេ? នេះទើបជាសំណួរសំខាន់ ដែលត្រូវរកចម្លើយ។
ជាការពិត ការទម្លាយឯកសារខ្សែអាត់សំឡេងសន្ទនារវាងលោកនាយករដ្ឋមន្ត្រី ហ៊ុន សែន ជាមួយលោកកឹម សុខា កាលពីថ្ងៃទី២៩ឧសភា បានចុចចំចំណុចរសើបរបស់គណបក្សសិទ្ធិមនុស្ស។ ចំណុចរសើបដែលគួរឲ្យកត់សម្គាល់មានដូចជា៖ ទី១ ទោះបីជាពិតមែនឬមិនមែន កិច្ចសន្ទនានេះហាក់ធ្វើឲ្យគេយល់ថា គណបក្សសិទ្ធិមនុស្សបានកើតឡើងដោយការជួយជ្រោមជ្រែងពីលោកនាយករដ្ឋមន្ត្រី។ ទី២ គឺភាពស្និទ្ធស្នាលរវាងលោកនាយករដ្ឋមន្ត្រី ហ៊ុន សែន និងលោកកឹម សុខា នៅក្រោយឆាកដែលស្តាប់ទៅខុសប្លែកទាំងស្រុងពីអ្វីដែលគេបានឮនិងបានឃើញក្នុងឆាកនយោបាយជាក់ស្តែង និងទី៣ គឺការនិយាយបកអាក្រាតគណបក្សសម រង្ស៊ី ។ ចំណុចរសើបទាំងនេះហើយដែលជំរុញឲ្យការសង្ស័យរបស់គណបក្សសម រង្ស៊ីទៅលើគណបក្សសិទ្ធិមនុស្សដែលមានតាំងពីយូរមកហើយនោះបានក្លាយជាផ្កាភ្លើងកាត់ផ្តាច់ចំណងមេត្រីភាពដ៏រកាំរកូសរវាងគណបក្សទាំងពីរ។
ឥឡូវនេះ លោកនាយករដ្ឋមន្ត្រី ហ៊ុន សែន ដែលគេចាត់ទុកថាជា«អ្នកយុទ្ធសាស្ត្រ»ដ៏សំខាន់ម្នាក់របស់គណបក្សប្រជាជនបានបង្ហើបជាសាធារណៈកាលពីថ្ងៃចន្ទដើមសប្តាហ៍ថា នៅមានឯកសារជាច្រើនទៀតដែលលោកបានសន្ទនាជាមួយមេដឹកនាំបក្សប្រឆាំងក្នុងនោះក៏មានកិច្ចសន្ទនាសម្ងាត់ជាមួយលោកសម រង្ស៊ីផងដែរ។ ការបង្ហើរតាមខ្សល់អំពីបញ្ហានេះ បើទោះបីជាអ្នកខ្លះចាត់ទុកថាគ្រាន់តែជាយុទ្ធសាស្ត្រ «គោះទឹកបង្អើលត្រី» ក៏ដោយចុះ ប៉ុន្តែ ចំណុចរសើបរបស់វានៅត្រង់ថា លោកសម រង្ស៊ី ធ្លាប់បានជួបសន្ទនាតទល់ជាមួយលោកនាយករដ្ឋមន្ត្រី ហ៊ុន សែន តែពីរនាក់រយៈពេលជិត៣ម៉ោងកាលពី៤ឆ្នាំមុន។
ប៉ុន្តែ គ្មានអ្នកណាដឹងថា តើកិច្ចសន្ទនាដ៏យូរនេះបានផ្តោតលើបញ្ហាអ្វីខ្លះនោះទេ។ អ្វីដែលគេបានឃើញគឺ បន្ទាប់ពីជំនួបនោះ វិសោធនកម្មរដ្ឋធម្មនុញ្ញស្តីពីការបង្កើតរដ្ឋាភិបាលពីសំឡេងពីរភាគបីមកជា៥០ភាគរយបូកមួយត្រូវបានអនុម័តដែលបើកផ្លូវឲ្យគណបក្សប្រជាជនអាចបង្កើតរដ្ឋាភិបាលម្នាក់ឯងបានដោយស្រួល។ ស្រាប់តែឥឡូវនេះ ពេលដែលស្ថានការណ៍នយោបាយក្នុងប្រទេសកំពុងតានតឹងខ្លាំង លោកនាយករដ្ឋមន្ត្រីក៏បានបង្ហើបអំពីកិច្ចសន្ទនានេះឡើងវិញ ហើយខ្សែអាត់សំឡេងអាចនឹងត្រូវគេបញ្ចេញជាសាធារណៈនៅពេលណាមួយក៏មិនដឹង។
មកដល់ចំណុចនេះ គេអាចមើលឃើញថា គណបក្សកាន់អំណាចកំពុងលេង«សន្លឹកបៀ»ស្តីពីឯកសារសម្ងាត់ដែលជាចំណុចរសើបរបស់គណបក្សប្រឆាំង។ សន្លឹកបៀនេះមានប្រយោជន៍សម្រាប់បក្សកាន់អំណាច។ ប្រយោជន៍នៅត្រង់ថា ជាទូទៅ អ្នកគាំទ្រគណបក្សប្រឆាំងប្រាថ្នាចង់ឃើញការប្រឆាំងដ៏ខ្លាំងក្លាទៅនឹងរដ្ឋាភិបាល ជាពិសេសគឺប្រឆាំងជាមួយលោកនាយករដ្ឋមន្ត្រីហ៊ុន សែនតែម្តង។ ម្យ៉ាងទៀត ការមិនទុកចិត្តគ្នាក្នុងចំណោមអ្នកនយោបាយប្រឆាំងកំពុងតែកើតមានស្រាប់ជាយូរមកហើយ។
ហេតុដូចនេះ ការទម្លាយឯកសារសម្ងាត់បែបនេះពិតជាធ្វើឲ្យជ្រួលច្របល់ក្នុងមជ្ឈដ្ឋានអ្នកប្រឆាំងដោយចៀសមិនផុត។ នេះហើយជាចំណុចរសើបបំផុតនៅក្នុងរឿងឯកសារសម្ងាត់ដែលបក្សកាន់អំណាចកំពុងលេង។ ដូច្នេះ ប្រសិនបើមានឯកសារផ្សេងពីនេះទៀតត្រូវបានទម្លាយ តើនឹងមានអ្វីកើតឡើង? មានតែគណបក្សប្រឆាំងខ្លួនឯងទេដែលអាចផ្តល់ចម្លើយសុក្រឹតជាងគេតបទៅនឹងសំណួរនេះពីព្រោះថាលទ្ធផលយ៉ាងណាវាចំណុះទាំងស្រុងទៅនឹងភាពរឹងមាំឬភាពកម្សោយរបស់បក្សប្រឆាំងនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ