Amnesty International៖ ការបណ្តេញចេញពីផ្ទះសម្បែងនៅតែជាបញ្ហាក្តៅនៅកម្ពុជា
អង្គការការពារសិទ្ធិមនុស្សអន្តរជាតិ Amnesty International បាន ចេញរបាយការណ៍សិទ្ធិមនុស្សប្រចាំឆ្នាំ២០១១នៅថ្ងៃនេះ ដោយបានបង្ហាញបញ្ហាធ្ងន់ធ្ងរមួយចំនួននៅកម្ពុជាផងដែរ។ Amnesty Internationalបានផ្តោតការចាប់អារម្មណ៍ខ្លាំងទៅលើការបណ្តេញចេញ ជម្លោះដីធ្លីដែលធ្វើអោយចំនួនប្រជាជនដែលបាត់បង់ដីកាន់តែកើនឡើង។ បញ្ហាផ្សេងទៀតរួមមាន កង្វះឯករាជភាពនៅក្នុងវិស័យយុត្តិធម៌ ការចាប់ខ្លួនអ្នកការពារសិទ្ធិមនុស្ស និងការកាត់បន្ថយសេរីភាពបញ្ចេញមតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ការបណ្តេញចេញដោយបង្ខំ ការរំលោភយកដីធ្លី និងជម្លោះដីធ្លី នៅតែជាបញ្ហាធ្ងន់ធ្ងរ ក្នុងចំណោមបញ្ហាជាច្រើននៅកម្ពុជា។ ចំនួននៃការតវ៉ាអំពីការរំលោភដីធ្លីបានកើនឡើង។
សកម្មជននិងអ្នកការពារសិទ្ធិមនុស្សបានប្រឈមនឹងការប្តឹងផ្តល់ពីការចោទប្រកាន់មិនត្រឹមត្រូវ។ តុលាការខ្វះឯករាជ្យភាព ហើយត្រូវបានប្រើប្រាស់ដើម្បីរាំងខ្ទប់សេរីភាពបញ្ចេញមតិ សិទ្ធិនៃការជួបប្រជុំ ប្រឆាំងអ្នកកាសែត សកម្មជនសហជីព និងអ្នកនយោបាយគណបក្សប្រឆាំង។ រីឯនិទ្ទណ្ឌភាពក៏នៅតែជាបញ្ហាដ៏គួរអោយព្រួយបារម្ភដដែល។ ទាំងអស់នេះគឺជាបញ្ហាដែលត្រូវបានលើកឡើងជាការព្រួយបារម្ភនៅក្នុងរបាយការណ៍សិទ្ធិមនុស្សរបស់អង្គការAmnesty International ស្តីពីកម្ពុជា។
ការបណ្តេញចេញគឺជាបញ្ហាធំជាងគេដែលរបាយការណ៍នេះសរសេរដាក់នៅដើមរបាយការណ៍តែម្តង។ របាយការណ៍បានលើកយកករណីបណ្តេញចេញនៅបឹងកក់ដែលមានការតវ៉ាជាច្រើនលើកច្រើនសា ហើយពេលខ្លះមានការបំបែកដោយហិង្សាពីសំណាក់អាជ្ញាធរមានសមត្ថកិច្ចផង។ រីឯសកម្មជនការពារសិទ្ធិមនុស្សជាច្រើននាក់ត្រូវបានឃាត់ខ្លួនដោយសារតែពួកគេជួយការពារក្រុមសហគមន៍ដែលត្រូវបានគេរំលោភយកដីធ្លី។
ប្រធានគណបក្សប្រឆាំងគឺលោកសម រង្ស៊ីដែលត្រូវបានតុលាការសម្រេចផ្តន្ទាទោសកំបាំងមុខនោះ ក៏ត្រូវបានលើកឡើងនៅក្នុងរបាយការណ៍ដើម្បីនិយាយអំពីការគំរាមកំហែងទៅលើសេរីភាពបញ្ចេញមតិ និងជួបជុំផងដែរ។
Amnesty International ក៏បានសម្តែងការព្រួយបារម្ភចំពោះប្រព័ន្ធតុលាការនៅកម្ពុជាផងដែរ។ នោះគឺការខ្វះឯករាជភាព។ កុមារី និងស្រ្តីរងគ្រោះក្នុងអំពើរំលោភ និងអំពើហិង្សាតែងមានឧបសគ្គនៅក្នុងការទទួលបានយុត្តិធម៌ ដោយសារតែភាពកម្រោយនៃប្រព័ន្ធយុត្តិធម៌ និងការដោះស្រាយបញ្ហាក្រៅប្រព័ន្ធតុលាការនោះ។
គួរបញ្ជាក់ថា រដ្ឋាភិបាលកម្ពុជាបានទទួលយកអនុសាសន៍ទាំង៩១របស់អង្គការសហប្រជាជាតិដើម្បីលើកតម្កើងវិស័យសិទ្ធិមនុស្ស និងពង្រឹងវិធានការប្រឆាំងនិទ្ទណ្ឌភាព ការបណ្តេញចេញដោយបង្ខំ និងការកែទម្រង់ប្រព័ន្ធតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ