ប្រជាជនក្រីក្រគួរតែមានសិទ្ធិរស់នៅក្នុងទីក្រុង
អង្គការសង្គមស៊ីវិលមួយចំនួនអំពាវនាវអោយអាជ្ញាធរបញ្ឈប់ការបណ្ដេញ ចេញប្រជាជនរស់នៅក្នុងសហគមន៍ក្រីក្រចេញពីទីក្រុងភ្នំពេញ។ ការអំពាវនាវនេះត្រូវបានធ្វើឡើង ចំពេលដែលពិភពលោកគ្រោងនឹងប្រារព្ធទិវាលំនៅឋានពិភពលោក នៅថ្ងៃចន្ទស្អែកនេះ ក្រោមប្រធានបទ ៖ ទីក្រុងស្អាត ជីវិតល្អប្រសើរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គី សុខលីមពី ទីក្រុងភ្នំពេញ
ប្រជាជនក្រីក្រមានសិទ្ធិរស់នៅក្នុងទីក្រុង សូមបញ្ឈប់ការបណ្ដេញចេញពីទីក្រុង។ នេះជាប្រធានបទដែលអង្គការ និងប្រជាជនមួយចំនួនធំដែលត្រូវបានគេផ្លាស់ប្ដូរទីតាំងចេញពីទីក្រុងភ្នំពេញគ្រោងនឹងលើកយកមកពិភាក្សា នៅថ្ងៃស្អែក។ ថ្ងៃចន្ទទី៤ខែតុលាស្អែកនេះគឺជាទិវាលំនៅឋានពិភពលោក។
នៅក្នុងប្រទេសកម្ពុជា អង្គការមួយចំនួន និងប្រជាជនរងគ្រោះដោយសារការផ្លាស់ប្ដូរលំនៅឋានចេញពីទីក្រុងគ្រោងនឹងថ្លាថ្លែងទុក្ខសោក បណ្ដាលមកពីការបណ្ដេញចេញ។
តំណាងប្រជាជនបឹងកក់ដែលកំពុងមានជម្លោះ និងប្រជាជនរងគ្រោះ នាពេលកន្លងមក ប្រមាណជា៤០០នាក់នឹងចូលរួមប្រារព្ធទិវាលំនៅឋានពិភពលោក នៅថ្ងៃចន្ទស្អែកនេះ។ ប្រធានបទសម្រាប់ពិភពលោក នៅឆ្នាំ២០១០នេះ គឺទីក្រុងស្អាតជីវិតល្អប្រសើរ ប៉ុន្តែសម្រាប់អង្គការមួយចំនួន នៅក្នុងប្រទេសកម្ពុជាវិញ ពួកគេនឹងផ្ដោតសារៈសំខាន់ទៅលើលំនៅឋានសមរម្យជីវិតកាន់តែប្រសើរ។
លោក អ៊ី សារ៉ុម ប្រធានអង្គការសមាគមធាងត្នោតដែលជាអង្គការតាមដានការផ្លាស់ប្ដូរទីលំនៅរបស់សហគមន៍ក្រីក្រ នៅទីក្រុងភ្នំពេញ បាននិយាយប្រាប់ នៅថ្ងៃអាទិត្យនេះថា នរណាក៏ចង់រស់នៅក្នុងទីក្រុងដែរ។ ដូច្នេះសូមអោយបញ្ឈប់ការបណ្ដេញចេញប្រជាជនពីទីក្រុងភ្នំពេញ។ ផ្ទុយទៅវិញ អាជ្ញាធរត្រូវតែផ្តល់អោយពួកគេនូវលំនៅឋានសមរម្យ និងហេដ្ឋារចនាសម្ព័ន្ធត្រឹមត្រូវជាការប្រសើរជាង។
បើយោងតាមលោក អ៊ី សារ៉ុម រហូតមកដល់ឆ្នាំ២០០៩កន្លងមកនេះ សហគមន៍អ្នកក្រីក្រ ឬសហគមន៍សំណង់អនាធិបតេយ្យជាង៤០កន្លែងហើយ នៅទីក្រុងភ្នំពេញត្រូវបានអាជ្ញាធរក្រុងផ្លាស់ប្ដូរទីតាំងអោយទៅរស់នៅជាយក្រុងភ្នំពេញ។ សហគមន៍មួយចំនួនផ្សេងទៀតក៏ប្រឈមនឹងការរើទីតាំងចេញពីទីក្រុងភ្នំពេញដែរ នាពេលអនាគត។
ការផ្លាស់ប្ដូរទីតាំងសហគមន៍អ្នកក្រីក្រចេញពីទីក្រុងភ្នំពេញ នាពេលកន្លងមកបានបង្កអោយមានការរិះគន់យ៉ាងខ្លាំងក្លាពីសំណាក់អង្គការសង្គមស៊ីវិល។ អ្នកខ្លះបានចោទប្រកាន់ថា រដ្ឋាភិបាលបានសម្រេចបណ្ដេញប្រជាជនក្រីក្រចេញពីទីក្រុងភ្នំពេញដោយយកទីតាំងនោះលក់ទៅអោយឈ្មួញដើម្បីសាងសង់សំណង់ផ្សេងៗ។
រាល់ការបណ្ដេញចេញដោយបង្ខំម្តងៗសម្លេងស្រែកទ្រហោយំរបស់ប្រជាជនបានលាន់ឮឡើងយ៉ាងកងរំពង។ កាលពីឆ្នាំមុន ដៃគូអភិវឌ្ឍន៍របស់កម្ពុជាបានអំពាវនាវសុំអោយបញ្ឈប់ការបណ្ដេញប្រជាជនក្រីក្រចេញពីទីក្រុង។ រីឯកាលពីម្សិលមិញ សមាគមអាដហុកបញ្ចេញរបាយការណ៍សម្ដែងការព្រួយបារម្ភពីការកើនឡើងនៃជម្លោះដីធ្លី។ ជម្លោះដីធ្លីមួយចំនួនបានកើតចេញពីការបណ្ដេញចេញដោយបង្ខំ។
បើទោះជាយ៉ាងណាក៏ដោយ ក៏រាល់ការចោទប្រកាន់ត្រូវបានច្រានចោលដោយមន្ត្រីរាជរដ្ឋាភិបាល។ នៅថ្ងៃអាទិត្យនេះ លោក ទិត្យ សុធា អ្នកនាំពាក្យអង្គភាពប្រតិកម្មរហ័សនៃទីស្ដីការគណៈរដ្ឋមន្ត្រីបានលើកឡើងថា នាពេលកន្លងមក រដ្ឋាភិបាលបានដោះស្រាយប្រាក់គោលនយោបាយជូនប្រជាជនដែលតាំងទីលំនៅមិនស្របច្បាប់ ប៉ុន្តែប្រជាជនទាំងនោះតែងតែទាមទារសំណងតាមតម្លៃទីផ្សារ។
លោក ទិត្យ សុធា បានបញ្ជាក់ថា ការទាមទារតម្លៃសំណងតាមទីផ្សារ គឺមិនអាចទៅរួចទេ ពីព្រោះប្រជាជនមួយចំនួនរស់នៅលើដីរបស់រដ្ឋ ឬឯកជនដោយខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ