គ្រាប់កាំភ្លើងផ្លោងជាង៥ម៉ឺនគ្រាប់បាញ់ចូលដីខ្មែរ
ថ្លែងនៅក្នុងទិវាកាកបាទក្រហមពិភពលោកនៅក្នុងទីក្រុងភ្នំពេញនៅថ្ងៃនេះ លោកនាយករដ្ឋមន្ត្រីហ៊ុន សែនបានប្រកាសអោយដឹងថា រហូតមកដល់ពេលនេះ កម្ពុជាបានទទួលគ្រាប់ផ្លោងពីទាហានថៃ ប្រមាណជាង៥ម៉ឺនគ្រាប់ ដែលក្នុងចំណោមនោះមានគ្រាប់មួយចំនួននៅមិនទាន់ផ្ទុះនៅឡើយ។ ទាហានថៃនៅបន្តបាញ់ផ្លោងមកក្នុងតំបន់ឈរជើងរបស់កងទ័ពកម្ពុជា នៅសមរភូមិប្រាសាទតាក្របីកាលពីយប់ថ្ងៃទី២ឧសភា មុននឹងមានការជួបចរចាជាថ្មីកាលពីព្រឹកថ្ងៃអង្គារនេះ រវាងមេកងពលក្នុងសមរភូមិជួរមុខកម្ពុជាថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
ប្រមុខរដ្ឋាភិបាលខ្មែរលោកហ៊ុន សែនបានប្រកាសអោយដឹងនៅថ្ងៃនេះថា ទាហានថៃបានផ្លោងគ្រាប់ចូលក្នុងទឹកដីកម្ពុជាប្រមាណជាង៥ម៉ឺនគ្រាប់ គិតរហូតដល់ពេលនេះ។ ហើយក្នុងចំណោមចំនួនគ្រាប់ទាំងនោះ មានគ្រាប់ខ្លះនៅមិនទាន់ផ្ទុះនៅឡើយទេ។ សម្រាប់លោកនាយករដ្ឋមន្ត្រី គ្រាប់មិនទាន់ផ្ទុះទាំងនេះហើយដែលជាក្តីព្រួយបារម្ភមួយទៀតសម្រាប់រដ្ឋាភិបាល។
បើទោះជាបានជួបចរចាព្រមព្រៀងឈប់បាញ់ជាច្រើនលើកច្រើនសាជាមួយភាគីកម្ពុជាក៏ដោយ ទាហានថៃនៅតែបន្តផ្លោងគ្រាប់ចូលក្នុងតំបន់ឈរជើងរបស់ទាហានកម្ពុជាជារៀងរាល់យប់ រហូតដល់យប់មិញនេះ។ យោងតាមសេចក្តីប្រកាសព័ត៌មានរបស់ក្រសួងការពារជាតិ នៅក្នុងការបាញ់ផ្លោងអាវុធត្បាល់ពីសំណាក់ទាហានថៃ កាលពីយប់មិញដែលធ្វើអោយទាហានកម្ពុជាម្នាក់របួសនោះ មាន៣១គ្រាប់បានធ្លាក់ចូលមកក្នុងបរិវេណប្រាសាទតាក្របី។
ជាថ្មីម្តងទៀត នៅព្រឹកថ្ងៃអង្គារនេះ លោកវរសេនីយ៍ឯក នាក់ វង្ស មេបញ្ជាការរង និងជានាយសេនាធិការកងពលតូចថ្មើរជើងលេខ៤២ បានជួបពិភាក្សាលើកិច្ចព្រមព្រៀងឈប់បាញ់ម្តងទៀតជាមួយភាគីថៃ ដែលការជួបគ្នាត្រូវបានធ្វើនៅប្រាសាទតាមាន់។
ប្រភពពីសមរភូមិបានអោយដឹងថា ភាគីទាំងពីរបានព្រមព្រៀងឈប់បាញ់ម្តងទៀត ហើយយល់ព្រមដាក់កម្លាំងស៊ីវិលឈរជើងម្ខាងពីរនាក់នៅពីរចំនុច ក្នុងតំបន់ប្រាសាទតាក្របី ហើយការដាក់ឈរជើងមនុស្សពីរនាក់ម្ខាងនេះ ក៏ត្រូវបានយល់ស្របធ្វើដូចគ្នានៅក្នុងសមរភូថ្មដូន និង តាមាន់ផងដែរ។
តាមគម្រោង នៅថ្ងៃពុធស្អែក នឹងមានការជួបគ្នារវាងយោធាកម្ពុជា និងថៃក្នុងកម្រិតភូមិភាគនៅច្រកអូរស្មាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ