ទាហានថៃបន្តចរចាផងបន្តបាញ់ផងការចរចាត្រូវលើកពេល
ទាហានថៃនៅបន្តបាញ់ផ្លោងមកលើកងទ័ពកម្ពុជាជារៀងរាល់យប់ នៅពេលដែលការចរចាឈប់បាញ់ត្រូវបានរៀបចំរៀងរាល់ពេលថ្ងៃដែរ។ ទីបំផុត កម្ពុជាបានលើកពេលឈប់ចរចាជាមួយជាមួយកងទ័ពថៃ នៅពេលដែលទាហានថៃមិនដែលគោរពការឯកភាពឈប់បាញ់។ កម្ពុជាក៏បានច្រានចោលព័ត៌មានដែលកាសែតផ្សាយថា កម្ពុជាចោលសាកសពទាហានខ្លួននៅក្នុងព្រៃក្នុងសមរភូមិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ការព្រមព្រៀងឈប់បាញ់ ថៃមានតែជាពាក្យសំដី នៅក្នុងតុចរចាទល់មុខមេបញ្ជាការយោធាខ្មែរតែប៉ុណ្ណោះ។ ចេញពីតុចរចារ នៅពេលថ្ងៃថៃនៅតែបន្តបាញ់ផ្លោងដាក់កងទ័ពកម្ពុជានៅពេលយប់។ សកម្មភាពបែបនេះ មានយ៉ាងហោចណាស់៣លើកហើយ នៅក្នុងការផ្ទុះអាវុធដែលបង្កឡើងដោយថៃចាប់តាំងពីថ្ងៃទី២២មេសាមក។
នៅពេលមានការផ្ទុះអាវុធកាលពីចុងសប្តាហ៍នេះ ភាគីទាំងពីរបានព្រមព្រៀងគ្នាថា ជួបចរចាគ្នាសាជាថ្មីទៀតនៅប្រាសាទតាក្របីនៅថ្ងៃចន្ទទី២ឧសភានេះ ប៉ុន្តែព័ត៌មានចុងក្រោយពីសមរភូមិបានអោយដឹងថា ការជួបចរចានេះត្រូវលុបចោលវិញ។
ការផ្ទុះអាវុធ ដោយការបាញ់គ្រាប់ផ្លោង និងការគប់គ្រាប់បែក ពីសំណាក់កងទ័ពថៃ ក្រោយការសន្យាឈប់បាញ់ ឈប់ចល័តទ័ព បានកើតឡើងជាបន្តបន្ទាប់កាលពីយប់ថ្ងៃសៅរ៍ទី៣០មេសា ដល់ព្រឹកថ្ងៃអាទិត្យទី១ឧសភា និងយប់ថ្ងៃទី១ឧសភាដល់ព្រឹកថ្ងៃចន្ទទី២ឧសភានេះ។ ការចរចាឈប់បាញ់ ក៏បានកើតឡើង២ដងកាលពីថ្ងៃអាទិត្យម្សិលមិញរវាងថ្នាក់កងពលជួរមុខកម្ពុជាថៃ នៅតាមាន់ និង នៅថ្មដូន។
កងទ័ពកម្ពុជា លើសពីការប្រើប្រាស់សិទ្ធិស្វ័យការពារដោយបាញ់តបតប្រឆាំងទាហានថៃនោះគ្មានអ្វីក្រៅពីការអំពាវនាវយ៉ាងទទូចអោយទាហានថៃគោរពលទ្ធផលនៃការព្រមព្រៀងឈប់បាញ់ ដើម្បីប្រយោជន៍ និងសេចក្តីសុខសាន្តរបស់ប្រជាពលរដ្ឋទាំងសងខាងនោះឡើយ។
នៅក្នុងសេចក្តីថ្លែងការណ៍ប្រចាំថ្ងៃរបស់ខ្លួននៅថ្ងៃចន្ទទី២ឧសភានេះ អ្នកនាំពាក្យក្រសួងការពារជាតិបានច្រានចោល ការផ្សព្វផ្សាយរបស់សារព័ត៌មានថៃដែលសរសេរថា កម្ពុជាបានបោះបង់ចោលសាកសពទាហានខ្មែរ២នាក់នៅក្នុងសមរភូមិ។
សម្រាប់ក្រសួងការពារជាតិកម្ពុជា នេះគឺជាព័ត៌មានប្រឌិតរបស់ភាគីថៃ ដើម្បីប្រយោជន៍នយោបាយរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ