កម្ពុជាត្រៀមខ្លួនរួចរាល់ដើម្បីចូលរួមកិច្ចប្រជុំដោះស្រាយជម្លោះព្រំដែនកម្ពុជា-ថៃនៅឥណ្ឌូនេស៊ី
នៅថ្ងៃអង្គារនេះ ក្រសួងការបរទេសកម្ពុជា បានប្រកាសថា លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស នឹងដឹកនាំគណៈប្រតិភូទៅចូលរួមកិច្ចប្រជុំក្រៅផ្លូវការរវាង រដ្ឋមន្ត្រីការបរទេសកម្ពុជា-ថៃ និងឥណ្ឌូនេស៊ី ដើម្បីដោះស្រាយជម្លោះព្រំដែនរវាងកម្ពុជា និងថៃ។ កិច្ចប្រជុំនៅប្រទេសឥណ្ឌូនេស៊ី នាថ្ងៃទី៧និងថ្ងៃទី៨មេសាខាងមុខក៏មានកិច្ចប្រជុំគណៈកម្មាធិការ ចម្រុះព្រំដែនកម្ពុជា-ថៃ JBC និងកិច្ចប្រជុំគណៈកម្មាធិការព្រំដែនទូទៅ ហៅកាត់ថា GBC ដែលដឹកនាំដោយរដ្ឋមន្ត្រីការពារជាតិកម្ពុជា និងថៃផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរ
លោកប្រមុខការទូត ហោ ណាំហុង នឹងដឹកនាំគណៈប្រតិភូ ចេញដំណើរពីព្រលានយន្តហោះភ្នំពេញ នាព្រឹកម៉ោង ១១ ថ្ងៃទី៦មេសា ឆ្នាំ២០១១។ ជាដំណើរទៅកាន់តុប្រជុំដោះស្រាយជម្លោះព្រំដែនកម្ពុជា-ថៃ នៅទីក្រុង Bogor ប្រទេសឥណ្ឌូនេស៊ី។
សេចក្តីជូនព័ត៌មាន របស់ក្រសួងការបរទេស ចុះថ្ងៃទី៥មេសា ឆ្នាំ២០១១ បង្ហាញថា ទន្ទឹមនឹងការចូលរួមកិច្ចប្រជុំដោះស្រាយជម្លោះព្រំដែនកម្ពុជា-ថៃ នាថ្ងៃទី៧ និងថ្ងៃទី៨មេសាឆ្នាំ២០១១នៅប្រទេសឥណ្ឌូនេស៊ី លោកប្រមុខការទូតហោ ណាំហុង ក៏នឹងចូលរួមកិច្ចប្រជុំពិសេសថ្នាក់រដ្ឋមន្ត្រីការបរទេសអាស៊ាន-ជប៉ុន នៅថ្ងៃទី៩មេសា ឆ្នាំ២០១១ ដើម្បីឆ្លើយតបទៅនឹងការរញ្ជួយដី និងរលកស៊ូណាមី នៅប្រទេសជប៉ុន។
សេចក្តីជូនព័ត៌មានដដែល បានបង្ហាញថា គណៈប្រតិភូកម្ពុជា ដែលត្រូវចូលរួមក្នុងកិច្ចប្រជុំ ស្វែងរកដំណោះស្រាយជម្លោះព្រំដែនកម្ពុជា-ថៃ ដែលអមដំណើរលោកប្រមុខការទូត ហោ ណាំហុង រួមមាន៖ លោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការ GBC និងលោក វ៉ា គីមហុង ទេសរដ្ឋមន្ត្រី ទទួលបន្ទុកការងារពិសេស និងជាប្រធានគណៈកម្មការព្រំដែនកម្ពុជា-ថៃ JBC។
ដំណើររបស់គណៈប្រតិភូកម្ពុជា ដឹកនាំដោយលោកឧបនាយករដ្ឋមន្ត្រី ហោ ណាំហុង ទៅកាន់តុប្រជុំចរចា ស្វែងរកដំណោះស្រាយលើជម្លោះព្រំដែនកម្ពុជា-ថៃ ធ្វើឡើងតាមការកោះអញ្ជើញរបស់លោក ម៉ាទី ណាតាឡេហ្គាវ៉ា ( Dr. R.M. Marty M. Natalegawa ) រដ្ឋមន្ត្រីការបរទេសនៃសាធារណរដ្ឋឥណ្ឌូនេស៊ី ក្នុងនាមប្រធានអាស៊ាន។ លិខិតកោះប្រជុំរបស់ប្រធានអាស៊ាន ស្តីពីរបៀបវារៈនៃកិច្ចប្រជុំ បានផ្ញើទៅកាន់រដ្ឋមន្ត្រីការបរទេសកម្ពុជា និងថៃ កាលពីថ្ងៃ៤មេសា ម្សិលមិញ។
កាសែតថៃ the Nation បានរាយការណ៍នៅថ្ងៃនេះថា ថៃយល់ព្រមចូលរួមកិច្ចប្រជុំគណៈកម្មការព្រំដែនចម្រុះ JBC នៅឥណ្ឌូនេស៊ី។ តែថៃមិនចូលរួមកិច្ចប្រជុំគណៈកម្មការព្រំដែនទូទៅ GBC ដែលដឹកនាំដោយរដ្ឋមន្ត្រីការពារជាតិឡើយ។
លោក កុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ថា កម្ពុជាទៅចូលរួមកិច្ចប្រជុំ តាមការកោះប្រជុំរបស់ភាគីឥណ្ឌូនេស៊ី ដែលជាប្រធានអាស៊ាន។ ម្យ៉ាងទៀតភាគីកម្ពុជា ចូលរួមកិច្ចប្រជុំដោះស្រាយជម្លោះព្រំដែនកម្ពុជា-ថៃទាំងឡាយណា ដែលមានការចូលរួមពីភាគីឥណ្ឌូនេស៊ីក្នុងនាមជាម្ចាស់ផ្ទះ។
ប៉ុន្តែលោក កុយ គួង បញ្ជាក់ថា កិច្ចប្រជុំដោះស្រាយជម្លោះព្រំដែន នៅថ្ងៃព្រហស្បតិ៍ និងថ្ងៃសុក្រនេះ អ្វីដែលសំខាន់ គឺធ្វើយ៉ាងណា ឲ្យមានបទឈប់បាញ់ជាអចិន្ត្រៃយ៍ នៅព្រំដែនជិតប្រាសាទព្រះវិហារ។ កិច្ចប្រជុំរយៈពេលពីរថ្ងៃនោះ ក៏នឹងអាចលើកឡើងពីការបញ្ជូនក្រុមអ្នកសង្កេតការណ៍អាស៊ាន ចុះមកកាន់ព្រំដែនកម្ពុជា និងព្រំដែនថៃ ដើម្បីត្រួតពិនិត្យបទឈប់បាញ់ផងដែរ។
កិច្ចប្រជុំដែលមានឥណ្ឌូនេស៊ីជាអ្នកសម្របសម្រួលក្នុងនាមប្រធានអាស៊ាននៅសប្តាហ៍នេះ ធ្វើឡើងក្រោយពីកងទ័ពថៃ បានបើកការវាយប្រហារទ្រង់ទ្រាយធំលើកម្ពុជា កាលពីថ្ងៃទី៤ ដល់ថ្ងៃទី៧កុម្ភៈ នៅព្រំដែនព្រះវិហារ។ ក្រុមប្រឹក្សាសន្តិសុខអង្គការសហប្រជាជាតិ បានផ្តល់តួនាទីដល់ឥណ្ឌូនេស៊ីដើម្បីស្វែងរកដំណោះស្រាយលើជម្លោះប្រដាប់អាវុធកម្ពុជា-ថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ