ទស្សនកិច្ច «បំភ្លឺផ្លូវ» របស់បេសកជនពិសេសយូណេស្កូនៅកម្ពុជានិងថៃ
ចុះផ្សាយនៅថ្ងៃ៖
ស្តាប់ - ០៣:៥៥
ដំណើរទស្សនកិច្ចរបស់លោក Koichiro Matsuura បេសកជនពិសេសរបស់អង្គការ Unesco នៅកម្ពុជានិងថៃបានដល់ទីបញ្ចប់ហើយ។ តាមពិត គោលបំណងនៃដំណើរទស្សនកិច្ចនេះគឺដើម្បីពិនិត្យមើលការខូចខាត ប្រាសាទព្រះវិហារក្រោយការបាញ់គ្រាប់ផ្លោងពីសំណាក់ភាគីថៃ។ ប៉ុន្តែ បេសកកម្មរបស់លោក Koichiro Matsuura ត្រូវបាន អ្នកខ្លះចាត់ទុកថាមានលក្ខណៈការទូតច្រើនជាងបច្ចេកទេស។ ក៏ប៉ុន្តែ សម្រាប់ក្រសែភ្នែកក្រុមអ្នកវិភាគ ដំណើរទស្សនកិច្ចរបស់បេសកជនពិសេសអង្គការយូណេស្កូបានស្តែងចេញលទ្ធផល សំខាន់ៗមួយចំនួនសម្រាប់ជាផលប្រយោជន៍ដល់ប្រាសាទព្រះវិហារ ដែលគេអាចចាត់ទុកជាទស្សនកិច្ច «បំភ្លឺផ្លូវ» មួយសម្រាប់កម្ពុជា និងថៃក្នុងរឿងព្រះវិហារ។ តើទស្សនកិច្ចនេះមានអត្ថន័យបែបណាខ្លះ?
ទស្សនកិច្ចរបស់លោក Koichiro Matsuura មកកាន់ប្រទេសថៃនិងកម្ពុជានៅពេលនេះពិតជាមានគោលដៅដ៏ច្បាស់លាស់មួយ។ គោលដៅនោះគឺគ្មានអ្វីក្រៅពីស្វែងយល់ពីការខូចខាតប្រាសាទព្រះវិហារដែលបណ្តាលមកពីការបាញ់កាំភ្លើងធំរបស់ថៃនោះឡើយ។ ប្រសិនបើគ្មានព្រឹត្តិការណ៍បាញ់ប្រហារមកលើប្រាសាទព្រះវិហារទេ ក៏ពិតជាគ្មានដំណើរទស្សនកិច្ចរបស់បេសកជនពិសេសអង្គការយូណេស្កូនៅពេលនេះដែរ។
ជាការពិត ក្នុងឋានៈជាអ្នកទទួលខុសត្រូវចំពោះប្រាសាទព្រះវិហារ អង្គការយូណេស្កូមិនអាចនៅស្ងៀមបានឡើយចំពោះការខូចខាតដ៏ធ្ងន់ធ្ងរនៃសម្បត្តិបេតិកភណ្ឌពិភពលោកដ៏មានតម្លៃមហាសាលមួយនេះ។ ប៉ុន្តែ អ្វីដែលធ្វើឱ្យអ្នករំពឹងទុកខកចិត្តនោះគឺបេសកជនពិសេសអង្គការយូណេស្កូមិនបានទៅដល់ប្រាសាទព្រះវិហារដើម្បីពិនិត្យមើលការខូចខាតដូចការរំពឹងទុកនោះឡើយ។ ការខកខានមិនបានទៅដល់ប្រាសាទព្រះវិហាររបស់លោក Koichiro Matsuura ហាក់បានកើតឡើងក្រោយពីភាគីថៃបានគំរាមមិនចង់ឱ្យរូបលោកទៅកាន់ទីនោះ។ អ្វីដែលគេអាចយល់បានពីគោលដៅរបស់ថៃគឺទីក្រុងបាងកកមិនចង់ឱ្យមានរូបភាពថាយូណេស្កូនៅខាងកម្ពុជានោះឡើយ។
នេះក៏ជាហេតុផលមួយដែលយូណេស្កូយល់និងបានព្យាយាមបញ្ចៀសដើម្បីកុំឱ្យថៃបាក់មុខមាត់ខ្លាំងពេក។ អ៊ីចឹងហើយបានជាលោក Koichiro Matsuura បានធ្វើដំណើរទៅកាន់ប្រទេសថៃសិនមុននឹងមកដល់កម្ពុជា។ នេះហើយជាអ្វីដែលគេចាត់ទុកថា ទិដ្ឋភាពការទូត» នៃដំណើរទស្សនកិច្ចរបស់លោក Koichiro Matsuura។ ក៏ប៉ុន្តែ ដំណើរទៅកាន់ប្រទេសថៃក៏ជាឱកាសមួយដើម្បីទទួលបានការពន្យល់របស់ប្រទេសនេះអំពីការបាញ់ប្រហារមកលើប្រាសាទព្រះវិហារដែរ។
យ៉ាងណាក៏ដោយចុះ ដំណើរទស្សនកិច្ចរបស់លោក Koichiro Matsuura នៅពេលនេះ ថ្វីត្បិដតែបានលាយឡំដោយទិដ្ឋភាពការទូតក៏ពិតមែន ក៏ប៉ុន្តែ វាបានស្តែងចេញនូវលទ្ធផលមួយចំនួនគួរឱ្យកត់សម្គាល់។
លទ្ធផលទី១គឺ៖ ទស្សនកិច្ចនេះបានបញ្ចប់ក្តីស្រមៃរបស់ថៃជុំវិញសំណើរសុំឱ្យអង្គការយូណេស្កូដកប្រាសាទព្រះវិហារចេញពីបញ្ជីបេតិកភណ្ឌពិភពលោក។ ត្រង់ចំណុចនេះ បេសកជនយូណេស្កូបានបញ្ជាក់ច្បាស់លាល់ជាមួយភាគីថៃថា គេមិនអាចធ្វើបែបនេះបានឡើយ។
លទ្ធផលទី២គឺ៖ លោក Koichiro Matsuura ក៏បានបញ្ជាក់ជាសាធារណៈដែរថា យូណេស្កូ មិនធ្វើការងារពាក់ពន្ធ័នឹងបញ្ហាព្រំដែនឡើយ។ ចំណុចនេះក៏ជាសារមួយច្បាស់លាល់ប្រាប់ទៅភាគីថៃថា វាល្មមដល់ពេលដែលត្រូវបញ្ឈប់ការលើកយកបញ្ហាព្រំដែនមករារាំងដំណើរការអភិរក្ស និងអភិវឌ្ឍន៍ប្រាសាទព្រះវិហារទៀតហើយពីព្រោះសំណើរបែបនេះគ្មានឥទ្ធិពលលើការសម្រេចចិត្តរបស់យូណេស្កូឡើយ។
លទ្ធផលទី៣គឺ៖ បេសកជនពិសេសយូណេស្កូបានបញ្ជាក់ពីការបញ្ជូនអ្នកជំនាញការរបស់ខ្លួនមកវាយតម្លៃការខូចខាតប្រាសាទព្រះវិហារក្នុងពេលឆាប់ៗនេះពោលគឺនៅក្រោយការមកដល់របស់អ្នកសង្កេតការណ៍ឥណ្ឌូនេស៊ីក្នុងតំបន់ជម្លោះ។ នេះក៏ជាសារមួយទៀតដែលបញ្ជាក់ថា យូរឬឆាប់យូណេស្កូនឹងនៅតែទៅដល់ប្រាសាទព្រះវិហារតែដដែលក្នុងឋានៈជាអ្នកទទួលខុសត្រូវលើប្រាសាទនេះ។
សរុបមកវិញ ជារូបភាព បើទោះបីជាបេសកជនយូណេស្កូបានទុកមុខមាត់ឱ្យថៃខ្លះក៏ពិតមែន ក៏ប៉ុន្តែ ជាខ្លឹមសារវិញ ដំណើរទស្សនកិច្ចរបស់លោក Koichiro Matsuura មកកាន់កម្ពុជានិងថៃនៅពេលនេះបានផ្តល់សារសំខាន់ខ្លាំងណាស់សម្រាប់ប្រាសាទព្រះវិហារនិយាយដោយឡែក និងសម្រាប់ជម្លោះខ្មែរនិងថៃនិយាយជារួម។ សម្រាប់ប្រាសាទព្រះវិហារមានន័យថា អង្គការយូណេស្កូបានផ្តល់ការធានាច្បាស់លាស់មួយថា ប្រាសាទរបស់ខ្មែរមួយនេះពិតជាស្ថិតនៅជាសម្បត្តិបេតិកភណ្ឌពិភពលោកជាអមតៈ ហើយយូណេស្កូ នឹងជួសជុលប្រាសាទដ៏មានតម្លៃនេះនៅក្រោយការវាយតម្លៃរបស់អ្នកជំនាញការ។
រីឯអត្ថន័យសម្រាប់ជម្លោះខ្មែរនិងថៃមានន័យថា ថៃគួរបញ្ចប់ការយកលេសអំពីបញ្ហាព្រះវិហារដើម្បីរករឿងឈ្លានពានកម្ពុជាទៀតទៅពីព្រោះសហគមន៍អន្តរជាតិយល់ច្បាស់ណាស់ថា ព្រះវិហារនិងតំបន់ជុំវិញគឺជារបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ