ប្រមុខការទូតកម្ពុជា-ថៃ៖ ការចាប់ខ្លួនជនជាតិថៃ៧នាក់មិនប៉ះពាល់ការទូត
រដ្ឋមន្ត្រីការបរទេសកម្ពុជានិងថៃ បានឯកភាពគ្នាថា ការចាប់ និងចោទប្រកាន់ជនជាតិថៃទាំង៧នាក់មិនបានផ្តល់ផលអាក្រក់ដល់ទំនាក់ ទំនងការទូតកម្ពុជាថៃនោះឡើយ។ ដោយឡែកតុលាការកម្ពុជា បាននិងបើកសវនាការជម្រះក្តីលើសំណុំរឿងជនជាតិថៃទាំង៧នាក់នៅថ្ងៃ ទី១កុម្ភៈខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
នៅក្នុងឱកាសដែលរដ្ឋមន្ត្រីការបរទេសទាំងពីរលោក ហោ ណាំហុង និងលោក កាស៊ីត ភិរម្យមានវត្តមាននៅក្នុងប្រទេសឥណ្ឌូនេស៊ី ប្រមុខការទូតទាំងពីរ បានជួបគ្នានៅទីនោះកាលពីថ្ងៃចន្ទទី១៧។ នៅក្នុងជំនួបនោះ សំណុំរឿងជនជាតិថៃ៧នាក់ ត្រូវបានលើកឡើង។ នៅព្រឹកថ្ងៃពុធទី១៩មករានេះ លោកឧបនាយករដ្ឋមន្ត្រីហោ ណាំហុងបានថ្លែងប្រាប់អ្នកសារព័ត៌មាននៅក្រសួងការបរទេសអោយដឹងថា រដ្ឋាភិបាលទាំងពីរបានឯកភាពគ្នា ថាការចាប់ខ្លួនជនជាតិថៃទាំង៧នាក់មិនបានធ្វើអោយកើតមានបច្ច័យអាក្រក់ដល់ទំនាក់ទំនងការទូតនៃប្រទេសទាំងពីរទេ។ បើតាមការបញ្ជាក់របស់លោកហោ ណាំហុង ភាគីថៃបានគោរពការអនុវត្តច្បាប់របស់កម្ពុជា ហើយថាកម្ពុជាក៏គ្មានបំណងអាក្រក់ ឬការគុំកួនចំពោះជនជាតិថៃនោះឡើយ។
គួរបញ្ជាក់ថា លោក កាស៊ីត ភិរម្យ រដ្ឋមន្ត្រីការបរទេសថៃនេះហើយដែលបានស្នើអោយរដ្ឋាភិបាលថៃ ចាត់វិធានការ ដាក់ការគាបគំនាបសង្កត់មកលើអាជ្ញាធរកម្ពុជា ក្រោយពីលោកគិតថា លោកបានបរាជ័យក្នុងការសម្របសម្រួលអោយរដ្ឋាភិបាលកម្ពុជាដោះលែងជនជាតិថៃឆ្លងដែនខុសច្បាប់ទាំងនោះ។ ទោះជាយ៉ាងក៏ដោយ នៅពេលនេះលោក កាស៊ីត ភិរម្យបាននិយាយអរគុណចំពោះកម្ពុជាក្នុងការដោះលែងអោយនៅក្រៅឃុំបណ្តោះអាសន្នជនជាតិថៃជាប់ចោទចំនួន៦នាក់។
និយាយអំពីរឿងក្តីជនជាតិថៃទាំង៧នាក់នោះវិញ តុលាការរាជធានីភ្នំពេញនឹងបើកសវនាការជំនុំជម្រះរឿងក្តីនេះនៅថ្ងៃទី១កុម្ភៈខាងមុខនេះ។ ជាហេតុធ្វើអោយលោក វេរ៉ា ស៊ុមខ្វាមឃីត សកម្មជនអាវលឿងថៃដែលកំពុងជាប់ឃុំតែម្នាក់ឯង មិនអាចមានពេលគ្រប់គ្រាន់ក្នុងការប្តឹងសារទុក្ខទៅតុលាការកំពូលដើម្បីទាមទារការនៅក្រៅឃុំនោះឡើយ។
ឧបនាយករដ្ឋមន្ត្រីថៃទទួលបន្ទុកសន្តិសុខជាតិ លោកស៊ូថេប ថងស៊ុបាន បានអំពាវនាវគ្រប់ចលនានៅក្នុងប្រទេសថៃរក្សាការស្ងប់ស្ងាត់ ចំពោះមុខរឿងក្តីជនជាតិថៃទាំង៧នាក់នេះ ដ្បិតការបញ្ចេញសកម្មណាមួយរបស់ពួកគេ អាចជះឥទ្ធិពលដល់ការសម្រេចក្តីរបស់តុលាការកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ