”ក្រុមអាវលឿង ចំនួន៨៤” នាក់ត្រូវបានផ្តន្ទាទោសនៅក្នុងប្រទេសថៃ
នៅប្រទេសថៃ”ក្រុមអាវលឿង”ចំនួន ៧៩ នាក់ដែលជាបក្សព័ន្ធនៃចលនារាជនិយម ត្រូវបានផ្តន្ទាទោសកាលពីថ្ងៃព្រហស្បតិ៍ម្សិលមិញ ឲ្យជាប់ពន្ធនាគារ ពី ៦ខែទៅ ២ឆ្នាំកន្លះពីបទ បានវាយលុកចូលក្នុងទីស្នាក់ការបណ្តាញទូរទស្សន៍ជាតិមួយនិងរារាំង មិនឲ្យមានការផ្សាយកម្មវិធី។ យុវជនចំនួន៥នាក់ផ្សេងទៀតអាយុតិចជាង២០ឆ្នាំ ត្រូវតុលាការព្យួរទោស។ ព្រឹត្តិការណ៍នេះ កើតឡើងកាលពីពីរឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
ជនជាប់ចោទទាំងអស់មានគ្នាចំនួន ៨៤នាក់និងសុទ្ធសឹងជាសមាជិកនៃចលនា”សម្ព័ន្ធភាពប្រជាជនដើម្បីប្រជាធិបតេយ្យ” ដែលជាក្រុមអាវលឿង”គឺ ក្រុមអ្នកប្រឆាំងនឹងរដ្ឋាភិបាលក្នុងជំនាន់ឆ្នាំ ២០០៨ ។ ២០០៨ ជាឆ្នាំ ដែលចលនាអាវលឿង ជាអ្នករាជនិយម ដឹកនាំបាតុកម្ម មួយចំនួនប្រឆាំងនឹងរដ្ឋាភិបាលថៃដែលដឹកនាំដោយអ្នកជិតដិតម្នាក់នៃអតីតនាយករដ្ឋមន្រ្តីថៃនិរទេស Thaksin Shinawatra។ លោក Thaksin Shinawatra ដែលត្រូវធ្លាក់ពីអំណាចដោយរដ្ឋប្រហារនៅឆ្នាំ ២០០៦។
នៅចន្លោះថ្ងៃទី ២២និង២៦សីហាឆ្នាំ ២០០៨ ក្រុមអាវលឿង បានចូល ទៅកាន់កាប់ទីស្នាក់ការនៃបណ្តាញទូរទស្សន៍លេខ ១១ La NBS National Broadcasting Service of Thailand។ ពួកគេ ទាំងអស់ មាន ចំនួន ៨៤នាក់ ដែលក្នុងនោះមានយុវជនអាយុក្រោម២០ឆ្នាំ ចំនួន៥ នាក់ បានទទួលសារភាពទោស ។ យុវជន ទាំង៥នាក់នោះ ត្រូវតុលាការព្យួរទោស រីឯ ៧៩នាក់ផ្សេងទៀត ត្រូវទទួលទោសជាប់គុកពី ៦ខែរហូតដល់ ២ឆ្នាំកន្លះក្នុងបទ អុជអាលញុះញង់បង្ក ឲ្យមានការបះបោរ -ការកាន់អាវុធ និងការប្រើ មធ្យោបាយគមនាគមន៍ដោយខុសច្បាប់។
មិនតែប៉ុណ្ណោះ ពួកគេ ថែមទាំងបានបំផ្លិចបំផ្លាញ សម្ភារៈសាធារណៈយ៉ាងច្រើនសំបើម។ ការ យឺតយ៉ាវ ក្រ ដាក់ទោសទៅលើសកម្មភាពរបស់ក្រុមអាវលឿងនេះ ជំរុញ ឲ្យខាងក្រុម អាវក្រហម ដែលជាគូបដិបក្ស ផ្ទុះកំហឹងយ៉ាងខ្លាំង និង បាននាំ គ្នាធ្វើបាតុកម្ម ចុះតាមផ្លូវថ្នល់នៃទីក្រុងបាងកកវិញម្តង ក្រោយពីមានការផ្លាស់ប្តូររដ្ឋាភិបាល។ ក្រុមអាវក្រហម បានស្រែកបរិហារឥតឈប់ឈរថា “យុត្តិធម៌ នៅក្នុងប្រទេសថៃ មានការផ្អៀងទៅតែម្ខាង” ពីព្រោះឧក្រិដ្ឋកម្មរបស់ពួកអាវលឿងរហូតមកទល់ពេលនេះ នៅតែពុំទាន់មានការដាក់ទោស។
ការផ្តន្ទាទោសលើក្រុមអាវលឿងនេះ កាលពីម្សិលមិញនេះ ពុំបានធ្វើឲ្យក្រុមអាវក្រហមសប្បាយចិត្តទេ ពីព្រោះ តុលាការ បានកាត់ទោសតែទៅលើពួកអ្នកធ្វើក្រោមបង្គាប់គេ ចំណែកឯ មេកើយ ធំៗវិញ នៅតែ គ្មានព្រួយបារម្ភអ្វីទាំងអស់ ទាំងរឿង កាន់កាប់ស្ថានីយទូរទស្សន៍ ក៏ដូចជា ការ កាន់កាប់ អាកាសយានដ្ឋានទីក្រុងបាងកក ។ ក៏ប៉ុន្តែ ចំពោះ ការកាន់កាប់ កណ្តាលទីក្រុងបាងកក របស់ ក្រុមអាវក្រហមវិញ នៅទីបំផុត ត្រូវបានអាជ្ញាធរថៃ វាយបង្ក្រាបយ៉ាងកាចសាហាវឥតត្រាប្រណីអ្វីសោះ និងបានបណ្តាលឲ្យមានអ្នកស្លាប់ចំនួន ៨០ នាក់ នេះបើយោងតាមអាជ្ញាធរថៃ និង ចាប់ខ្លួនមេដឹកនាំ ក្រុមអាវក្រហមទាំងអស់ទៀតផង ដែលកំពុងតែរង់ចាំការកាត់ទោសដែរ ចាប់តាំងពី រដូវក្តៅកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ