ជនជាតិថៃ៤នាក់ទៀតបាននៅក្រៅឃុំបណ្តោះអាសន្ន
សាលាឧទ្ធរណ៍បានសម្រេចអោយជនជាប់ចោទថៃ៤នាក់ទៀតអាចនៅក្រៅឃុំបណ្តោះអាសន្ន។ នៅពេលនេះមានតែវេរ៉ា ស៊ុបខ្វាមឃីតដែលជាសមាជិកក្រុមអាវលឿងតែម្នាក់គត់ដែលត្រូវបានបន្តឃុំខ្លួននៅគុកព្រៃស។ វេរ៉ា ស៊ុមខ្វាមឃីតត្រូវបានគេស្គាល់ថា ជាសមាជិកសកម្មរបស់ក្រុមថៃអាវលឿងដែលតែងបានចេញមុខប្រឆាំង យ៉ាងខ្លាំងទល់នឹងកម្ពុជា ក្នុងសំណុំរឿងប្រាសាទព្រះវិហារខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
ជនជាប់ចោទថៃពីបទឆ្លងដែនខុសច្បាប់ចូលទឹកដីកម្ពុជា ៤នាក់ផ្សេងទៀតត្រូវបានបញ្ជូនចូលដល់ស្ថានទូតថៃហើយកាលពីព្រឹកថ្ងៃអង្គារនេះ បន្ទាប់ពីសាលាឧទ្ធរណ៍បានសម្រេចដោះលែងពួកគេអោយនៅក្រៅឃុំបណ្តោះអាសន្ន តាមការទាមទាររបស់មេធាវីរបស់ពួកគេ។ នៅពេលនេះមានតែសមាជិកអាវលឿងតែម្នាក់គត់ឈ្មោះវេរ៉ា ស៊ុមខ្វាមឃីតដែលត្រូវបន្តឃុំខ្លួន។ សវនាការដើម្បីសម្រេចលើការស្នើសុំនៅក្រៅឃុំកាលពីព្រឹកមិញនេះបានប្រព្រឹត្តទៅជាអសាធារណៈ។ មិនមានការពន្យល់ថា ហេតុអ្វីវេរ៉ា ស៊ុមខ្វាមឃីតត្រូវចៅក្រមសម្រេចអោយនៅក្នុងឃុំបន្តនោះឡើយ។ វេរ៉ា ស៊ុមខ្វាមឃីតត្រូវបានគេស្គាល់ថា ជាសមាជិកសកម្មរបស់ក្រុមថៃអាវលឿងដែលតែងបានចេញមុខប្រឆាំងយ៉ាងខ្លាំងទល់នឹងកម្ពុជា ក្នុងសំណុំរឿងប្រាសាទព្រះវិហារខ្មែរ។ ក្រោយពីបាននាំចេញពីសាលសវនាការនៃសាលាឧទ្ធរណ៍ ចូលទៅក្នុងរថយន្តនៃអង្គភាពពន្ធនាគារ លោកវេរ៉ាបានច្រឡោតស្រែកនិយាយខ្លាំងៗជាភាសាថៃ ដែលគេស្តាប់បានថា លោកនឹងតស៊ូក្នុងសំណុំរឿងក្តីនេះដល់ទីបញ្ចប់ ហើយលោកនឹងបន្តប្តឹងសារទុក្ខទៅតុលាការកំពូលទៀត ប្រឆាំងការឃុំខ្លួនលោកនេះ។
វេរ៉ា ស៊ុមខ្វាមឃីតត្រូវបានព្រះរាជអាជ្ញាសាលាដំបូងរាជធានីភ្នំពេញចោទប្រកាន់បន្ថែមក្រោមបទប្រមូលផ្តុំព័ត៌មានដែលធ្វើអោយអន្តរាយដល់ប្រទេសកម្ពុជា ពីលើបទចោទដំបូងដែលមាន២រួចហើយ គឺការឆ្លងដែនខុសច្បាប់ និងការចូលក្នុងទីលានយោធាក្នុងបំណងទុច្ចរិត។
គួរបញ្ជាក់ថា ក្រោយការចាប់ខ្លួនជនជាតិថៃទាំង៧នាក់កាលពីថ្ងៃទី២៩ខែធ្នូ ដែលក្នុងចំណោមនោះមនុស្សសំខាន់រួមមានសមាជិកសភាថៃមកពីគណបក្សប្រជាធិបតេយ្យរបស់នាយករដ្ឋមន្ត្រីអាប់ភីស៊ីត វេចាជីវ៉ា និងលោកវេរ៉ា ស៊ុមខ្វាមឃីតនេះ។ ក្រោយការទទួលស្គាល់ថា ជនជាតិថៃទាំង៧បានដើរចូលក្នុងទឹកដីកម្ពុជាមែននោះ ឧបនាយករដ្ឋមន្ត្រីថៃទទួលបន្ទុកសន្តិសុខលោកស៊ូថេប ថងស៊ុបាន បានថ្លែងជាសាធារណៈប្រាប់អ្នកកាសែតថា បញ្ហាដែលជាឧបសគ្គនៃការដោះស្រាយគឺលោកវេរ៉ា ស៊ុមខ្វាមឃីតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ