កម្ពុជាផ្ញើកំណត់ទូតទៅថៃរឿងបាញ់ពលរដ្ឋខ្មែរ
ប្រទេសកម្ពុជា នៅថ្ងៃនេះ បានបន្តថ្កោលទោសចំពោះសកម្មភាពរបស់កងទាហានថៃដែលបានបាញ់ សម្លាប់ប្រជាពលរដ្ឋខ្មែរនៅតាមព្រំដែន។ ការបាញ់ប្រហាររបស់ថៃ ដែលមន្ត្រីការទូតកម្ពុជា បានចាត់ទុកថា មានភាពសាហាវឃោរឃៅ មិនសមជាប្រទេសស៊ីវិល័យ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់នេត្រ ភក្រ្តាពីទីក្រុងភ្នំពេញ
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង នៅថ្ងៃចន្ទនេះ បានចាត់ទុក ការប្រើប្រាស់អំពើហិង្សាបាញ់សម្លាប់ប្រជាជនខ្មែរឆ្លងកាត់ព្រំដែនពីសំណាក់ទាហានថៃ ថាជាអំពើឃោរឃៅ ដែលមិនសមជាប្រទេសស៊ីវិល័យ។ ពាក្យពេចន៍ទាំងនេះក៏នឹងត្រូវបានផ្ញើទៅកាន់រដ្ឋាភិបាលថៃតាមរយៈកំណត់ទូតមួយ ផងដែរ។
លោកហោ ណាំហុង បានគូសបញ្ជាក់ក្រោយពីជំនួបជាមួយ នឹងរដ្ឋមន្ត្រីការបរទេសបង់ក្លាដេសថា ថៃបានប្រើអំពើហិង្សាបាញ់សម្លាប់ប្រជាជនខ្មែរ ដែលឆ្លងកាត់ព្រំដែនកម្ពុជា-ថៃ ខណៈដែលពួកគាត់មិនដឹងថា ព្រំដែននៅកន្លែងណា ហើយមួយទៀតមានព្រៃតភ្ជាប់គ្នាតាមបណ្តោយព្រំដែន។ ប្រតិកម្ម និងការគ្រោងផ្ញើកំណត់ទូតរបស់កម្ពុជាទៅរដ្ឋាភិបាលថៃ ធ្វើឡើងក្រោយពីអាជ្ញាធរថៃនៅតាមបណ្តោយព្រំដែន បានធ្វើការបាញ់ប្រហារមកលើពលរដ្ឋខ្មែរ ដែលបានឆ្លងចូលក្នុងទឹកដីថៃ មានទាំងស្លាប់ និងរបួសជាបន្តបន្ទាប់។
ប្រទេសកម្ពុជាបានស្នើជាច្រើនលើករួចមកហើយទៅភាគីថៃ ឲ្យបញ្ឈប់ការប្រើអំពើហិង្សាបាញ់ប្រជាពលរដ្ឋខ្មែរ ដែលឆ្លងដែនចូលដីថៃ ប៉ុន្តែការបាញ់ប្រហារនៅតែមានបន្ត បើទោះបីជារដ្ឋមន្ត្រីក្រសួងការបរទេសថៃ លោកកាស៊ីត ភិរម្យ សន្យាថា នឹងមិនឲ្យមានអំពើហិង្សារបៀបនេះកើតឡើងក៏ដោយ។
ទាក់ទងនឹងបញ្ហា ជម្លោះព្រំដែនរវាងកម្ពុជា-ថៃ លោករដ្ឋមន្ត្រីក្រសួងការបរទេស ហោ ណាំហុង បានលើកឡើងថា គណៈកម្មាធិការព្រំដែនចម្រុះកម្ពុជា-ថៃអាចចាប់ផ្តើមចរចា និងធ្វើការងាររបស់ខ្លួនបានលុះត្រាតែ សភាថៃផ្តល់សច្ចាប័នដល់កិច្ចព្រមព្រៀងបីដែលជាផ្លៃផ្កា នៃកិច្ចចរចាទ្វេភាគីរវាងរដ្ឋមន្ត្រីក្រសួងការបរទេសទាំងពីរជាមុនសិន។ ប៉ុន្តែរហូតមកទល់ពេលនេះ សភាថៃមិនទាន់បានធ្វើការអនុម័តនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ