កម្ពុជា ថ្លែងការណ៍ឲ្យថៃ បញ្ឈប់ហិង្សា និងវិលរកតុចរចា
រដ្ឋាភិបាលកម្ពុជា បានបញ្ចេញប្រតិកម្ម ពាក់ព័ន្ធនឹងការវិវឌ្ឍន៍ កាន់តែតឹងតែងនូវអំពើហិង្សា ក្នុងប្រទេសថៃ នាពេលប៉ុន្មានថ្ងៃនេះ។ អ្នកនាំពាក្យក្រសួងការបរទេសកម្ពុជា បានធ្វើសេចក្តីថ្លែងការណ៍ នៅថ្ងៃ១៧ឧសភានេះ ដើម្បីអំពាវនាវឲ្យក្រុងបាងកក បញ្ឈប់អំពើហិង្សា និងវិលទៅរកតុចរចា ដោះស្រាយវិបត្តិបញ្ចប់ជម្លោះបង្ហូរឈាម។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លី ម៉េងហួរ
ចំពោះការវិវឌ្ឍន៍កាន់តែតឹងតែងនូវអំពើហិង្សា ក្នុងក្រុងបាងកក ប្រទេសថៃ អ្នកនាំពាក្យក្រសួងការបរទេសកម្ពុជា បានចេញសេចក្តីថ្លែងការណ៍ នៅថ្ងៃ១៧ឧសភា ដោយលើកឡើងថា ក្នុងនាមជាប្រទេសជិតខាង និងជារដ្ឋសមាជិកអាស៊ាន ប្រទេសកម្ពុជា មានការព្រួយបារម្ភជាខ្លាំងចំពោះអំពើហិង្សា ដែលមានសភាពកាន់តែស្រួចស្រាវឡើងៗ នៅក្នុងប្រទេសថៃ។
សេចក្តីថ្លែងការណ៍ បានគូសបញ្ជាក់ថា ស្ថានការណ៍ដ៏អាក្រក់នៅប្រទេសថៃ បានជះឥទ្ធិពលយ៉ាងធ្ងន់ធ្ងរ មិនត្រឹមតែចំពោះមុខមាត់របស់ថៃប៉ុណ្ណោះទេ តែក៏ប៉ះពាល់ដល់មុខមាត់របស់អាស៊ានផងដែរ។
សេចក្តីថ្លែងការណ៍ បានបង្ហាញថា រាជរដ្ឋាភិបាលកម្ពុជា សូមអំពាវនាវឲ្យគ្រប់ភាគីពាក់ព័ន្ធទាំងអស់នៅប្រទេសថៃ ចាប់ផ្តើមធ្វើការពិភាក្សាគ្នា ដោយសន្តិភាពឡើងវិញ ដើម្បីរកដំណោះស្រាយនយោបាយ ចំពោះការប្រឈមមុខដាក់គ្នានាពេលនេះ ព្រមទាំងដើម្បីស្តារឡើងវិញនូវសន្តិភាព និងប្រក្រតីភាពជូនប្រជាជនថៃ ក៏ដូចជាស្ថិរភាព នៅក្នុងតំបន់។
តាមអ្នកនាំពាក្យក្រសួងការបរទេស ប្រជាជនកម្ពុជា មានសេចក្តីប្រាថ្នាតែមួយគត់ គឺចង់ឲ្យប្រជាជនថៃជាមិត្ត មានជីវភាពរស់នៅដូចប្រក្រតី ក្នុងសុខសន្តិភាព។
សភាពការណ៍កាន់តែទុំជោរនៃអំពើហិង្សា នាំដល់ការសម្លាប់មនុស្ស នៅបាងកក នៅតែបន្តកើតមាន រវាងទាហានថៃ និងក្រុមបាតុករអាវក្រហមថៃ ដែលស្និទ្ធនឹងអតីតនាយករដ្ឋមន្ត្រីថៃ ថាក់ស៊ីន។ គិតចាប់ពីថ្ងៃទី១០ ឧសភា មកដល់ថ្ងៃនេះ ការប៉ះទង្គិចបង្ហូរឈាម នៅបាងកក បានបណ្តាលឲ្យស្លាប់មនុស្សយ៉ាងហោចណាស់ ៣៥ នាក់ និង មនុស្សជិត ៣០០ នាក់ផ្សេងទៀត រងរបួស ដែលបូករួមទាំងអ្នកកាសែត និងជនបរទេសផង ។
ព្រឹត្តិការណ៍បង្ហូរឈាមនៅបាងកក កើតឡើងក្រោយពីរដ្ឋាភិបាលថៃរបស់លោក អាប់ភីស៊ីត បានច្រានចោលនូវសំណើរបស់ក្រុមបាតុករអាវក្រហមថៃ ដែលទាមទារឲ្យរដ្ឋាភិបាលថៃ រំលាយសភា ដើម្បីបោះឆ្នោតមុនអាណត្តិ។ ម្យ៉ាងទៀត អំពើហិង្សាផ្ទួនៗ ពីសំណាក់ទាហានថៃ មកលើក្រុមបាតុករអាវក្រហមថៃ បានដុតរោល បន្ថែម កំហឹងបាតុករអាវក្រហម នាំដល់ការប្រទាញប្រទង់ ដែលគិតមកដល់ពេលនេះ មានរយៈពេល ២ ខែមកហើយ។
នៅថ្ងៃ១៧ឧសភានេះ ក៏មានសេចក្តីរាយការណ៍ថា ឧត្តមសេនីយ៍ ខាទិយ៉ា សាវ៉ាសឌីពល់ ហៅ សៃឌេង ដែលគាំទ្រក្រុមបាតុករអាវក្រហម បានស្លាប់បាត់បង់ជីវិតហើយ។ ឧត្តមសេនីយ៍ថៃរូបនេះ រងរបួស ក្នុងអំពើប៉ះទង្គិចគ្នា កាលពីថ្ងៃព្រលប់ថ្ងៃទី១៣ឧសភា ។
ការប្រឈមមុខរយៈពេលពីរខែមកនេះ រវាងកងទាហានគាំទ្ររដ្ឋាភិបាលថៃ ជាមួយក្រុមអ្នកតវ៉ាដើម្បីលទ្ធិប្រជាធិបតេយ្យ ថៃ ដែលពាក់អាវក្រហម បាននាំឲ្យមានមនុស្សស្លាប់ប្រមាណ ៦៥ នាក់ និងរបួសជិត ១៧០០ នាក់។
ការអំពាវនាវឲ្យរដ្ឋាភិបាលក្រុងបាងកក អត់ធ្មត់ និងឈប់បាញ់ ហើយភាគីថៃទាំងអស់ ទាំងថៃអាវក្រហម និងទាំងរដ្ឋាភិបាល ត្រូវចូលរួមតុចរចា ដើម្បីដោះស្រាយបញ្ហាដោយសន្តិវិធី ត្រូវបានធ្វើឡើងជាបន្តបន្ទាប់ ជាពិសេសអគ្គលេខាធិការអង្គការសហប្រជាជាតិ ក៏បានអំពាវនាវដូច្នេះដែរ កាលពីថ្ងៃសុក្រ។ ក៏ប៉ុន្តែអ្នកនាំពាក្យរដ្ឋាភិបាលថៃ បានច្រានចោល ដោយមិនឲ្យបរទេសណា លូកលាន់ ធ្វើអន្តរាគមន៍លើព្រឹត្តិការណ៍បង្ហូរឈាមនៅបាងកកទេ។ រដ្ឋាភិបាលថៃ បានចាត់ទុកថា នេះជាកិច្ចការផ្ទៃក្នុងរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ