រដ្ឋាភិបាល បង្ហាញរបាយការណ៍ស៊ើបអង្កេតករណីឧបទ្ទវហេតុ លើស្ពានកោះពេជ្រ
នៅរសៀលថ្ងៃចន្ទនេះ មន្ត្រីរដ្ឋាភិបាល បានបង្ហាញរបាយការណ៍ជាផ្លូវការនៃការស៊ើបអង្កេតនិងស្រាវជ្រាវករណីឧបទ្ទវហេតុ ដ៏មហាសោកនាដកម្ម លើស្ពានកោះពេជ្រ កាលពីយប់ថ្ងៃបង្ហើយនៃពិធីបុណ្យអុំទូកថ្ងៃទី២២វិច្ឆិកា ឆ្នាំ ២០១០។ នោះគឺឧបទ្ទវហេតុ ដែលបានបណ្តាលឲ្យមនុស្សស្លាប់ ៣៥១ នាក់ និងរបួស ៣៩៥ នាក់លើស្ពានពេជ្រ បណ្តាលមកពីឧបទ្ទវហេតុ ផ្អើលស្លន់ស្លោជាន់គ្នា ដែលនាំឲ្យថប់ដង្ហើមស្លាប់ និងរបួស។ មន្ត្រីរដ្ឋាភិបាល ក៏បានគូសបញ្ជាក់ថា ឧបទ្ទវហេតុលើស្ពានកោះពេជ្រ មិនមែនមកពីឆក់ខ្សែភ្លើង ឬក៏អំពើភេរវកម្មនិងអំពើឧក្រិដ្ឋកម្ម ដែលបានគ្រោងទុកឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរ
ទីបំផុតទៅ លទ្ធផលនៃការស៊ើបអង្កេតករណីឧបទ្ទវហេតុលើស្ពានកោះពេជ្រ នៅយប់ថ្ងៃបង្ហើយបុណ្យអុំទូក ត្រូវបានលោកឧបនាយករដ្ឋមន្ត្រី សុខ អាន ប្រធានគណៈកម្មការដោះស្រាយករណីឧបទ្ទវហេតុលើស្ពានកោះពេជ្រ បានប្រកាសនៅប៉ុន្មានម៉ោងមុននេះថា ជាឧបទ្ទវហេតុ ដែលនាំឲ្យមនុស្សស្លាប់យ៉ាងហោចណាស់ ៣៥១ នាក់ និងរបួស ៣៩៥ នាក់ បណ្តាលមកពីការផ្អើលរត់ជាន់គ្នា។
លោក សុខ អាន បានបន្ថែមថា តាមកោសលវិច្ច័យ សាកសព មានរបួសនៅដៃជើង ដោយសារដួលសង្កត់លើគ្នា នាំឲ្យថប់ដង្ហើម។ ម្យ៉ាងទៀតទីតាំងភូមិសាស្ត្រលើស្ពានពេជ្រ ដែលមានបណ្តោយ ១០១ ម៉ែត្រ និងទទឹង ៧,១៦ ម៉ែត្រ តូចចង្អៀត នាំឲ្យកក់ស្ទះទាំងសងខាង ហើយគាប់ជួននឹងមានហេតុការណ៍ ផ្អើលស្លន់ស្លោរ នៅពេលកើតហេតុ។
គណៈកម្មការ និងអនុគណៈកម្មការ ទទួលបន្ទុកដោះស្រាយករណីឧបទ្ទវហេតុលើស្ពានកោះពេជ្រ ដែលស៊ើបអង្កេតករណីដ៏សោកនាដកម្មនោះ បានបញ្ជាក់ហើយបញ្ជាក់ទៀតថា ឧបទ្ទវហេតុលើស្ពានកោះពេជ្រ កាលពីយប់ថ្ងៃទី ២២វិច្ឆិកា មិនមែនមកពីឆក់ខ្សែភ្លើង ដូចការផ្អើលតៗគ្នានោះឡើយ។ មួយវិញទៀត ឧបទ្ទវហេតុនោះ ក៏មិនមានសញ្ញា បណ្តាលមកពីមូលហេតុនៃការផ្ទុះអាវុធដែលជាសញ្ញានៃអំពើភេរវកម្ម ឬអំពើឧក្រិដ្ឋកម្ម ដែលបានគ្រោងទុកជាមុនឡើយ។
មុនពេលប្រកាសលទ្ធផលស្រាវជ្រាវរកមូលហេតុផ្អើលជាន់គ្នា លើស្ពានកោះពេជ្រ នៅព្រឹកមិញ លោកនាយករដ្ឋមន្ត្រី ហ៊ុន សែន ក៏បានថ្លែងជាសាធារណៈ ដោយចាត់ទុកឧបទ្ទវហេតុ ដ៏មហាសោកនាដកម្ម នៅស្ពានកោះពេជ្រ ថាកើតឡើងពីការធ្វេសប្រហែសរបស់អាជ្ញាធរសមត្ថកិច្ច និងការមើលងាយសភាពការណ៍។
លោកនាយករដ្ឋមន្ត្រី ហ៊ុន សែន បានចាត់ទុកជាមេរៀនពិសោធន៍ប្រវត្តិសាស្ត្រ សម្រាប់ទុកជាមេរៀន ដោះស្រាយរាល់ព្រឹត្តិការណ៍ដទៃទៀត។ ក៏ប៉ុន្តែលោកនាយករដ្ឋមន្ត្រី ហ៊ុន សែន បានបញ្ជាក់ថា គ្មាននរណាទទួលទោស នៅក្នុងហេតុការណ៍ស្លាប់មនុស្សនៅស្ពានកោះពេជ្រឡើយ ព្រោះវាជាការទទួលខុសត្រូវរួម។
លោកនាយករដ្ឋមន្ត្រី ហ៊ុន សែន ក៏បានប្រកាសថា តំបន់កោះពេជ្រ នឹងបង្កើនការអភិវឌ្ឍន៍។ រីឯស្ពានកោះពេជ្រ ដែលកើតឧបទ្ទវហេតុ មិនត្រូវវាយកម្ទេចចោលឡើយ តែនឹងបើកឲ្យដំណើរការឡើងវិញក្នុងពេលខាងមុខ។ នៅថ្ងៃទី០២ ខែ ធ្នូ ២០១០ ខាងមុខនេះ លោកនាយករដ្ឋមន្ត្រី នឹងរៀបចំ ពិធីជប់លៀងដល់កិច្ចប្រជុំគណបក្សនយោបាយនៅអាស៊ី ដើម្បីជាការស្តារប្រជាប្រិយភាពកោះពេជ្រឡើងវិញ។
នៅព្រឹកមិញ លោកនាយករដ្ឋមន្ត្រី ក៏បានប្រកាសពីការបង្កើនជំនួយដល់គ្រួសារសពម្នាក់ៗ រហូតដល់ ១២.០០០ដុល្លារ។ រីឯអ្នករងគ្រោះធ្ងន់ធ្ងរ ក្នុងឧបទ្ទវហេតុ នៅស្ពានកោះពេជ្រ អាចបញ្ជូនទៅព្យាបាលនៅវៀតណាមក៏បាន និងទៅប្រទេសថៃក៏បាន ដោយរដ្ឋាភិបាល ជាអ្នកធានារ៉ាប់រង ក្នុងការចំណាយការព្យាបាលជម្ងឺទាំងក្នុងប្រទេស និងទាំងនៅក្រៅប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ