លោកហ៊ុន សែនចូលរួមពិធីកាន់ទុក្ខថ្នាក់ជាតិ
ពិធីកាន់ទុក្ខថ្នាក់ជាតិចំពោះជនរងគ្រោះក្នុងសោកនាដកម្មលើស្ពានពេជ្រ បានប្រព្រឹត្តិទៅពេញមួយថ្ងៃ នៅថ្ងៃទី២៥វិច្ឆិកានេះ។ ពិធីត្រូវបានរៀបចំនៅពីមុខស្ពានពេជ្រតែម្តង ដោយចាប់ផ្តើមជាមួយវត្តមានលោកនាយករដ្ឋមន្ត្រីហ៊ុន សែននិងភរិយារបស់លោក ដែលអុជធូប ដាក់ផ្កានៅកន្លែងរៀបចំពិធីនោះ។ នៅប៉ុន្មានម៉ោងមុននេះ ពិធីសូត្រមន្ត បង្សកូលឧទ្ទិសដល់វិញ្ញាណក្ខន្ធអ្នកស្លាប់ត្រូវបានរៀបចំនៅក្នុងក្រសួងការបរទេស ដោយមានវត្តមានតំណាងស្ថានទូតបរទេសចូលរួមផង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
ម៉ោង៧ព្រឹក លោកនាយករដ្ឋមន្ត្រីហ៊ុន សែន និងភរិយារបស់លោក ព្រមទាំងសមាជិករដ្ឋាភិបាលជាច្រើនរូបបានដង្ហែកម្រងផ្កាដាក់នៅមុខស្ពានពេជ្រ ជាទីកន្លែងដែលមានសោកនាដកម្មជាន់គ្នាស្លាប់កាលពី៣ថ្ងៃមុន។ លោកហ៊ុន សែន និងភរិយាបានអុជធូប ដាក់កម្រងផ្កា ឧទ្ទិសកុសលដល់ព្រលឹងអ្នកស្លាប់។ សកម្មភាពបែបសាសនានេះ បានប្រព្រឹត្តិទៅពេញមួយថ្ងៃនៅថ្ងៃនេះ ដែលជាថ្ងៃកាន់ទុក្ខថ្នាក់ជាតិ ចំពោះជនរងគ្រោះដែលបានបាត់បង់ជីវិតក្នុងឧប្បត្តិវហេតុយប់ថ្ងៃទី២២វិច្ឆិកា។ ថ្នាក់ដឹកនាំ និងសមាជិករដ្ឋសភា មន្ត្រីរាជការ អាជ្ញាធររាជធានីភ្នំពេញ និងប្រជាពលរដ្ឋផងបានមានវត្តមាននៅក្នុងពិធីនោះ។ ទង់ជាតិនៅតាមក្រសួង និងនៅតាមទីសាធារណៈត្រូវបានសម្រូតចុះមកនៅត្រឹមពាក់កណ្តាលទង់។
ដូចបានជូនដំណឹង ក្រសួងការបរទេស តំណាងអោយរដ្ឋាភិបាលបានរៀបចំពិធីសូត្រមន្តបង្សុកូលឧទ្ទិសកុសលដល់ព្រលឹងអ្នកស្លាប់នៅក្នុងសោកនាដកម្មនោះ។ មន្ត្រីរដ្ឋាភិបាល និងតំណាងស្ថានទូតនានាបានចូលរួមក្នុងពិធីសាសនានោះដែរ។
មិនមានសេចក្តីថ្លែងការណ៍ណាមួយបន្ថែមទៀតដែលថ្នាក់ដឹកនាំ និងអាជ្ញាធរបានធ្វើនៅថ្ងៃនេះឡើយ ក្រៅតែពីការផ្សព្វផ្សាយតួលេខផ្លូវការនៃចំនួនជនរងគ្រោះ ដោយរដ្ឋមន្ត្រីក្រសួងសង្គមកិច្ច ដែលទទួលបន្ទុកជាប្រធានអនុគណៈកម្មការដោះស្រាយការបន្ទាន់លើករណីឧប្បត្តិវហេតុ។ សេចក្តីជូនដំណឹងចុងក្រោយបានផ្សាយអោយដឹងថា ចំនួនអ្នកស្លាប់ពិតប្រាកដមានចំនួន៣៤៧នាក់ ក្នុងនោះមានប្រុស១២៦នាក់ និងស្រី២២១នាក់។ ចំណែកឯចំនួនអ្នករងគ្រោះដែលកំពុងសម្រាកព្យាបាលនៅក្នុងមន្ទីពេទ្យនានាមានចំនួន៣៩៥នាក់។
នៅថ្ងៃនេះដែរ លោករ៉ុង ឈុន ប្រធានសហភាព សហជីពកម្ពុជា បានផ្ញើលិខិតទៅលោកវ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា ដើម្បីអោយលោកអន្តរាគមន៍ទៅថៅកែរោងចក្រ ក្នុងការបើកប្រាក់ឈ្នួលចុងក្រោយ និងប្រាក់បន្ទាប់បន្សំផ្សេងទៀត ដល់ក្រុមគ្រួសារកម្មករណាដែលបានបាត់បង់ជីវិតនៅក្នុងសោកនាដកម្មស្ពានពេជ្រ។
លោកជាតិ ខេមរា មន្ត្រីជាន់ខ្ពស់នៃសមាគមរោងចក្រកាត់ដេរបានថ្លែងថា សកម្មភាពជួយឧបត្ថម្ភដល់កម្មករដែលជួបគ្រោះថ្នាក់ តែងតែត្រូវបានអនុវត្តកន្លងមករួចហើយ។ ហើយថាក្នុងករណីនេះ សមាគមក៏បានរម្លឹកទៅដល់បណ្តាថៅកែរោងចក្ររួចហើយដែរ។
គួរបញ្ជាក់ថា នៅក្នុងចំណោមជនរងគ្រោះនៅយប់ថ្ងៃទី២២វិច្ឆិកានោះ បើតាមការអះអាងរបស់លោកជាតិ ខេមរា មានកម្មករចំនួន២៧នាក់ដែលបានបាត់បង់ជីវិត របួស៦០នាក់ និងបាត់ខ្លួន២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ