ទំនាក់ទំនងត្រីកោណកម្ពុជា ចិន និងអាមេរិក
ចុះផ្សាយនៅថ្ងៃ៖
ស្តាប់ - ០៣:៥៥
ចំណងទាក់ទងរវាងកម្ពុជាចិននិងអាមេរិកបានបោះជំហានទៅមុខជា បន្តបន្ទាប់ក្នុងរយៈពេលចុងក្រោយនេះ។ បន្ទាប់ពីដំណើរទស្សនកិច្ចរបស់រដ្ឋមន្ត្រីការបរទេសអាមេរិកលោកស្រី ហ៊ីលឡារី គ្លីនតុន ប្រធានសភាចិន លោក វូ បាងហ្គួ ក៏បានធ្វើទស្សនកិច្ចនៅកម្ពុជាដែរនៅក្នុងសប្តាហ៍នេះដោយបានផ្តល់ ជំនួយសន្ធឹកសន្ធាប់ដល់កម្ពុជា។ ចិននៅតែរក្សាកម្ពុជាជាសម្ពន្ធ័មិត្តដ៏ជិតស្និទ្ធរបស់ខ្លួនដដែល ខណៈដែលសហរដ្ឋអាមេរិកកំពុងបោះដៃមកកម្ពុជាដែរ។ តើកម្ពុជា ចិន និងសហរដ្ឋអាមេរិកកំពុងបង្កើតចំណងទាក់ទងគ្នាបែបណាខ្លះ?
ពីមួយឆ្នាំទៅមួយឆ្នាំ ចំណងទាក់ទងកម្ពុជាចិនកាន់តែលេចត្រដែតឡើងជាលំដាប់ដែលធ្វើឲ្យប្រទេសទាំងពីរក្លាយជាសម្ពន្ធ័មិត្តចាក់ទឹកមិនលិច។ គ្រាន់តែក្នុងសប្តាហ៍នេះ ចិនបានធ្វើឲ្យមានការភ្ញាក់ផ្អើលថ្មីមួយទៀតនៅក្នុងទំនាក់ទំនងជាមួយកម្ពុជា នោះគឺចិនបានប្រកាសផ្តល់ជំនួយនិងកញ្ចប់ថវិកាសរុបជាង១ ៦០០លានដុល្លារសម្រាប់គំរោងអភិវឌ្ឍន៍ជាច្រើន។
លើសពីនេះទៅទៀត ទីក្រុងប៉េកាំងបានប្រកាសលុបបំណុលជាង៤លានដុល្លារដែលកម្ពុជាបានជំពាក់ទៀតផង។ ការលុបបំណុលចាស់ និងផ្តល់ជំនួយថ្មីដ៏សន្ធឹកសន្ធាប់នេះបានធ្វើឡើងក្នុងដំណើរទស្សនកិច្ចរបស់លោក វូ បាងហ្គួ ប្រធានសភាចិនមកកាន់កម្ពុជានៅក្នុងសប្តាហ៍នេះ។ គឺជាដំណើរទស្សនកិច្ចដែលប្រកបដោយអត្ថន័យនៅក្នុងប្រវត្តិនៃទំនាក់ទំនងការទូតរវាងកម្ពុជាចិន។
អត្ថន័យនៅត្រង់ថា ចិនមិនមែនមកគ្រាន់តែប្រកាសលុបបំណុលចាស់មួយចំនួនរបស់កម្ពុជាប៉ុណ្ណោះទេ តែចិនក៏បានថ្លែងអំណរគុណដល់កម្ពុជាផងដែរចំពោះការគាំទ្រឥតងាករេរបស់រដ្ឋាភិបាលខ្មែរដល់នយោបាយចិនតែមួយក៏ដូចជាការគាំទ្ររបស់កម្ពុជាចំពោះទីក្រុងប៉េកាំងនៅក្នុងជម្លោះរវាងចិនជាមួយបណ្តាប្រទសអាស៊ានមួយចំនួនជុំវិញបញ្ហានៅក្នុងសមុទ្រចិនខាងត្បូងទៀតផង។
នៅក្នុងបរិបទអន្តរជាតិវិញ អ្វីដែលគួរឲ្យកត់សម្គាល់នោះគឺ ដំណើរទស្សនកិច្ចរបស់ប្រធានសភាចិនមកកម្ពុជានៅពេលនេះបានកើតឡើងតែប៉ុន្មានថ្ងៃប៉ុណ្ណោះនៅបន្ទាប់ពីប្រមុខការទូតអាមេរិក លោកស្រី ហ៊ីលឡារី គ្លីនតុន ទើបតែបានបញ្ចប់ដំណើរទស្សនកិច្ចរបស់ខ្លួនថ្មីៗនៅកម្ពុជា។ ទស្សនកិច្ចរបស់លោកស្រីគ្លីនតុននៅកម្ពុជាបានបង្ហាញព្រឹត្តិការណ៍មួយចំនួនគួរឲ្យកត់សម្គាល់នៅក្នុងអត្ថន័យនៃចំណងទាក់ទងរវាងភ្នំពេញ ប៉េកាំង និងវ៉ាស៊ីនតោន។
អត្ថន័យដែលជាខ្លឹមសារសំខាន់ជាងគេនោះគឺ ប្រមុខការទូតអាមេរិកបានរំលឹកកម្ពុជាកុំឲ្យពឹងពាក់ខ្លាំងពេកទៅលើប្រទេសណាតែមួយ តែកម្ពុជាគួរគប្បីបង្កើនកិច្ចសហការជាមួយបណ្តាប្រទេសផ្សេងៗឲ្យបានច្រើនទើបជាការប្រសើរ។ បើទោះបីជាលោកស្រី ហ៊ីលឡារី គ្លីនតុន មិនបានបញ្ចេញឈ្មោះប្រទេសណាមួយក៏ដោយចុះ ក៏ប៉ុន្តែ គេអាចយល់បានថាជាការសំដៅទៅលើប្រទេសចិនដោយហេតុថាប្រសាសន៍របស់លោកស្រីជាការឆ្លើយតបទៅនឹងសំណួររបស់និស្សិតខ្មែរម្នាក់ស្តីពីទំនាក់ទំនងកម្ពុជានិងចិន។ ចិនដែលជាគូសត្រូវនយោបាយដ៏យូរលង់របស់អាមេរិក។
អ្វីដែលជាការកត់សម្គាល់ម្យ៉ាងទៀតនោះគឺការប្រកាសលុបបំណុលរបស់ចិននៅពេលនេះបានធ្វើឡើងខណៈពេលដែលកម្ពុជាកំពុងតែចរចាជាមួយសហរដ្ឋអាមេរិកដើម្បីលុបបំណុលចាស់ពីសម័យ លន់ នល់ ចំនួនជាង៣០០លានដុល្លារដែលកម្ពុជាជំពាក់។ តើនេះមិនមែនជាការឌឺរបស់ក្រុងប៉េកាំងចំពោះសហរដ្ឋអាមេរិកទេឬ? គួរកត់សម្គាល់ទៀតថា ភាពជួនគ្នាបែបនេះមិនមែនជាលើកទី១ឡើយ។
កាលពីដើមឆ្នាំ២០១០ កន្លងទៅនេះ គឺនៅពេលដែលសហរដ្ឋអាមេរិកប្រកាសផ្អាកជំនួយយោធាដល់កម្ពុជាដោយសារថារដ្ឋាភិបាលភ្នំពេញបានបញ្ជូនជនភៀសខ្លួនជាតិអ៊ុយហ្គួរ២០នាក់ត្រឡប់ទៅឲ្យប្រទេសចិនវិញនោះ ចិនក៏បានប្រកាសផ្តល់ជំនួយយោធាសន្ធឹកសន្ធាប់ដល់កម្ពុជា។ ជំនួយយោធាចិនហាក់ជំរុញឲ្យសហរដ្ឋអាមេរិកបន្ទន់ឥរិយាបថជាមួយយោធាកម្ពុជាបន្តិចវិញតាមរយៈការរៀបចំលំហាត់យោធាពហុជាតិសាសន៍ដ៏ធំមួយនៅក្នុងខេត្តកំពង់ស្ពឺ។
សរុបមកវិញ មហាអំណាចពិភពលោកនិងជាគូសត្រូវនយោបាយនឹងគ្នាទាំងពីរគឺចិននិងអាមេរិកហាក់កំពុងដណ្តើមឥទ្ធិពលគ្នានៅក្នុងតំបន់អាស៊ីអាគ្នេយ៍និយាយជារួម និងនៅកម្ពុជានិយាយដោយឡែក។ ប៉ុន្តែ រហូតមកទល់នឹងពេលនេះ មហាអំណាចចិនហាក់ទទួលបានទីតាំងឈរជើងធំជាងសហរដ្ឋអាមេរិកទាំងលើទិដ្ឋភាពដែលគេមើលឃើញ ទាំងក្នុងសណ្តានចិត្តនៃអ្នកដឹកនាំខ្មែរ។
មូលហេតុដែលគេអាចយល់បាននោះគឺរដ្ឋាភិបាលខ្មែរចូលចិត្តចិនមកពីប្រទេសនេះផ្តល់ជំនួយច្រើនហើយគ្មានលក្ខខណ្ឌ័ ខុសពីអាមេរិកដែលចូលចិត្តនិយាយដាក់លក្ខខ័ណ្ឌច្រើនជាងជំនួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ