សម រង្ស៊ីអំពាវនាវអោយពិនិត្យឡើងវិញ ការអនុវត្តន៍កិច្ចព្រមព្រៀងប៉ារីស
ដើម្បីស្វែងរកដំណោះស្រាយសម្រាប់ខ្លួន លោកសម រង្ស៊ី តំណាងរាស្ត្រ និងជាប្រធានគណបក្សប្រឆាំង ព្រមទាំងសហការីរបស់លោកបានធ្វើសេចក្តីអំពាវនាវអោយតំណាងរាស្ត្រនៃ សហគមអន្តរជាតិជួយធ្វើអន្តរាគមន៍ក្នុងករណីរបស់លោក។ តំណាងរាស្ត្រគណបក្សសម រង្ស៊ីក៏បានអំពាវនាវអោយមានការសើរើ និងពិនិត្យឡើងវិញការអនុវត្តន៍កិច្ចព្រមព្រៀងទីក្រុងប៉ារីសផងដែរ។ សម្រាប់គណបក្សសម រង្ស៊ី ការកាត់ទោសប្រធានគណបក្សប្រឆាំងបានប្រាសចាកពីខ្លឹមសារនៃកិច្ច ព្រមព្រៀង ២៣ តុលា១៩៩១។ ឆ្លើយតបនឹងការអំពាវនាវនេះ លោកជាម យៀប តំណាងរាស្ត្រគណបក្សប្រជាជនកម្ពុជាថ្លែងថា ករណីលោកសម រង្ស៊ី គឺជារឿងបុគ្គលសម រង្ស៊ីតែប៉ុណ្ណោះ។
ចុះផ្សាយនៅថ្ងៃ៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
អ្នកតំណាងរាស្ត្រគណបក្សសម រង្ស៊ីបានឆ្លៀតឱកាសនៅក្នុងខែតុលានេះ ធ្វើការអំពាវនាវអោយមានការពិនិត្យឡើងវិញ លើការអនុវត្តន៍ខ្លឹមសារនៃកិច្ចព្រមព្រៀងទីក្រុងប៉ារីស២៣តុលា១៩៩១។ នៅក្នុងសេចក្តីអំពាវនាវរបស់ខ្លួន គណបក្សសម រង្ស៊ីស្នើអោយប្រទេសហត្ថលេខី និងស្ថាប័នដៃគូអភិវឌ្ឍន៍ដ៏មានឥទ្ធិពលដូចជាសហភាពអឺរ៉ុប ចាត់វិធានការចាំបាច់ដើម្បីធានាអោយមានការអនុវត្តន៍យ៉ាងមានប្រសិទ្ធិភាពគ្រប់ប្រការសំខាន់ៗដែលមានចែងនៅក្នុងកិច្ចព្រមព្រៀងទីក្រុងប៉ារីស។
ដោយដកស្រង់របាយការណ៍របស់ Amnesty International របាយការណ៍របស់អ្នករាយការណ៍ពិសេសនៃអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា និងរបាយការណ៍របស់អង្គការក្រៅរដ្ឋាភិបាលនានានៅក្នុងប្រទេសកម្ពុជា គណបក្សសម រង្ស៊ីបានលើកឡើងនៅក្នុងសេចក្តីអំពាវនាវរបស់ខ្លួនទៅសហគមអន្តរជាតិ អំពីការរឹតត្បិតនៃការគោរពសិទ្ធិមនុស្ស និងសិទ្ធិសេរីភាពជាមូលដ្ឋានរបស់ពលរដ្ឋ រហូតដល់ការធ្វើទុក្ខបុកម្និញដល់សិទ្ធិរបស់តំណាងរាស្ត្រគណបក្សប្រឆាំងទៀតផង។ ពោលគឺការព្យួរអភ័យឯកសិទ្ធិ និងការកាត់ទោសលោកសម រង្ស៊ីដាក់ពន្ធនាគារតែម្តង។
លោកសម រង្ស៊ី ប្រធានគណបក្សប្រឆាំងនៅកម្ពុជាបានសរសេរនៅក្នុងសេចក្តីអំពាវនាវរបស់ខ្លួន ស្វែងរកអន្តរាគមន៍ពីសំណាក់អ្នកតំណាងរាស្ត្រនៃសហគមអន្តរជាតិ។ លោកសម រង្ស៊ីបានអំពាវនាវអោយអ្នកតំណាងរាស្ត្រទាំងនោះ ស្នើទៅរដ្ឋាភិបាលរបស់ពួកគេ អោយដាក់សម្ពាធទៅលើអាជ្ញាធរកម្ពុជា ធ្វើយ៉ាងណាដើម្បីអោយលោកអាចត្រឡប់មកកាន់ការងារជាអ្នកតំណាងរាស្ត្រវិញ។
ការអំពាវនាវយ៉ាងនេះរបស់លោកសម រង្ស៊ីប្រធានគណបក្សប្រឆាំង លោកជាម យៀបតំណាងរាស្ត្រគណបក្សប្រជាជនកម្ពុជាកាន់អំណាចមិនអាចទទួលយកបានឡើយ។ លោកជាម យៀបបានដាក់សំណួរសួរលោកសម រង្ស៊ីវិញថា តើគណបក្សប្រជាជនកម្ពុជាមានកំហុសត្រង់ណា បានជាត្រូវសើរើពិនិត្យឡើងវិញ ខ្លឹមសារកិច្ចព្រមព្រៀងទីក្រុងប៉ារីសនោះ ?
សម្រាប់លោកជាម យៀប បញ្ហាក្តីក្តាំរបស់លោកសម រង្ស៊ីបានកើតឡើងដោយសារទង្វើរបស់លោកសម រង្ស៊ីខ្លួនឯងតែប៉ុណ្ណោះ។ លោកជាម យៀបបន្តថា ការសម្របសម្រួលអោយស្ថានភាពត្រឡប់មកជាធម្មតាវិញនោះ ទំនងជាពិបាកនឹងធ្វើណាស់ នៅពេលដែលលោកសម រង្ស៊ីបានបង្កើតបណ្តឹងទៅតុលាការអាមេរិក ប្រឆាំងប្រមុខរដ្ឋាភិបាលកម្ពុជានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ