វេទិកាសាធារណៈរៀបចំកាន់តែច្រើន នៅប៉ុន្មានថ្ងៃមុននៃសាលក្រមទៅលើ ឌុច
កាលពីព្រឹកថ្ងៃសុក្រទី២៣កក្កដានេះ មជ្ឈមណ្ឌលដើម្បីយុត្តិធម៌ និងការបង្រួបបង្រួមជាតិបានរៀបចំវេទិកាសាធារណៈស្តីពី "ការនឹងមកដល់នៃសាលក្រមរបស់ឌុច"។ វេទិកានេះត្រូវបានរៀបចំនៅសកលវិទ្យាល័យបញ្ញាសាស្ត្រ ដោយមានវាគ្មិនជាអ្នកច្បាប់ អ្នកប្រវត្តិសាស្ត្រ ជនរងគ្រោះនៅគុកទួលស្លែង និងតំណាងពីតុលាការខ្មែរក្រហម។
ចុះផ្សាយនៅថ្ងៃ៖
បទអន្តរាគមន៍របស់លាង ដឺលុច
គឺដូចជាអត្ថន័យនៃប្រធានបទដែលគេបានដាក់សម្រាប់វេទិកាសាធារណៈ គឺការនឹងមកដល់នៃសាលក្រមរបស់ឌុច។ បានន័យថា ៣ថ្ងៃមុននឹងតុលាការពិសេសប្រកាសសាលក្រមចំពោះឌុច ដែលគ្រោងធ្វើ នៅថ្ងៃចន្ទទី២៦កក្កដានោះ មជ្ឈមណ្ឌលដើម្បីយុត្តិធម៌ និងការបង្រួបបង្រួមបានរៀបចំអោយមានវេទិកានេះឡើង ជាការរម្លឹកអារម្មណ៍របស់ពលរដ្ឋខ្មែរទាំងមូលអោយត្រៀមចាំតាមដានព្រឹត្តិការណ៍ជាប្រវត្តិសាស្ត្រមួយនេះ។ គេត្រូវរម្លឹក ពីព្រោះតាំងពីការបញ្ចប់ការកាត់សេចក្តីលើឌុចមក វាមានរយៈពេលច្រើនខែដែរហើយ ហើយដែលអ្នកខ្លះអាចនឹងភ្លេចគិតដល់អំពីបញ្ហានេះ។
យោងតាមការបញ្ជាក់របស់លោកស្រីយឹម សុធារីដែលជាអ្នកគ្រប់គ្រងផ្នែកការប៉ះទង្គិចចិត្តសង្គមនៃមជ្ឈមណ្ឌលដើម្បីយុត្តិធម៌និងការបង្រួបបង្រួម ការដែលមជ្ឈមណ្ឌលផ្តួចផ្តើមអោយមានការរៀបចំវេទិកាសាធារណៈនៅពេលនេះ ក៏ដើម្បីផ្តល់ឱកាសមួយ ជាពិសេសដល់អ្នករងគ្រោះ ដែលជាច្រើនខែមកហើយចង់សម្តែងមតិ និងនិយាយអំពីទុក្ខលំបាកផ្លូវចិត្តអោយអ្នកដែលពាក់ព័ន្ធបានលឺ ដែលការធ្វើយ៉ាងនេះ គឺដើម្បីអោយពួកគាត់បានធូរស្បើយក្នុងអារម្មណ៍ខ្លះដែរ។
ក្រុមអ្នកចូលរួមនៅក្នុងវេទិកាសាធារណៈនោះរួមមាននិស្សិត មានប្រជាពលរដ្ឋដែលជាជនរងគ្រោះក្នុងសម័យខ្មែរក្រហម មកពីតាមបណ្តាខេត្ត និងមានក្រុមដើមបណ្តឹងរដ្ឋប្បវេណីក្នុងសំណុំរឿងឌុចផងដែរ។ រីឯក្រុមវាគ្មិននោះមានមន្ត្រីកិច្ចការសាធារណៈ និងប្រធានអង្គភាពជនរងគ្រោះនៃសាលាក្តីខ្មែរក្រហម មានលោកប៊ូ ម៉េង និងលោកវ៉ាន់ ណាតដែលជាអ្នករួចផុតពីការកាប់សម្លាប់ នៅគុកទួលស្លែង មានអ្នកច្បាប់ អ្នកសរសេរប្រវត្តិសាស្ត្រខ្មែរក្រហមដេវីត ឆានឡឺ និងតំណាងសមាគមជនរងគ្រោះនៃរបបខ្មែរក្រហមជាដើម។
នៅក្នុងវេទិការនេះ គឺគេបើកអោយប្រជាពលរដ្ឋ និងនិស្សិតលើកជាសំណួរឡើង ហើយវាគ្មិននានាខាងលើគឺជាអ្នកឆ្លើយតប។ ដោយសារប្រធានបទនៅព្រឹកថ្ងៃសុក្រទី ២៣កក្កដាមានឈ្មោះថា ការមកដល់នៃការប្រកាសសាលក្រមរបស់ឌុច ដូច្នេះភាគច្រើននៃសំណួរ គឺផ្តោតទៅលើថា តើឌុចអាចជាប់ទោសប៉ុណ្ណា? ហើយអ្នកខ្លះនោះក៏ឆ្លៀតបញ្ចេញយោបល់តែម្តងទៅថា ខ្លួនមិនអាចទទួលបានទេបើ ឌុចត្រូវរួចខ្លួន ឬក៏ថា ឌុចជាប់ទោសតិចតួចនោះ។ សំណួរចាស់មួយដែលគេតែងតែលឺនោះ ក៏នៅតែត្រូវបានលើកឡើងមកទៀត នោះគឺចម្ងល់ដែរថា ហេតុអ្វីខ្មែរសំលាប់ខ្មែរ?
ជាទូទៅ សំណួរខ្លះក៏បានទទួលការបំភ្លឺ ការពន្យល់ចំណែកសំណួរខ្លះទៀតដែលទាក់ទងនឹងការជាប់ទោសរបស់ឌុចនោះ វាគ្មិនឆ្លើយថា គេត្រូវរង់ចាំការប្រកាសរបស់ចៅក្រមរបស់អង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃចន្ទទី២៦កក្កដា ២០១០ នៅវេលាម៉ោង១០ព្រឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ