កម្ពុជា បន្តបដិសេធពីវត្តមានរបស់មេដឹកនាំអាវក្រហមថៃ
នៅថ្ងៃនេះ លោក កុយ គួង អ្នកនាំពាក្យក្រសួងការបរទេសកម្ពុជា បានប្រកាសច្រានចោល នូវការលើកឡើងរបស់នាយករដ្ឋមន្ត្រីថៃ ដែលថា មេដឹកនាំក្រុមអាវក្រហមថៃពីរនាក់ កំពុងជ្រកកោន ក្នុងទឹកដីខេត្តសៀមរាប ប្រទេសកម្ពុជា។ មេដឹកនាំក្រុមអាវក្រហម ដែលគាំទ្រអតីតនាយករដ្ឋមន្ត្រីថៃ ថាក់ស៊ីន ត្រូវបានចោទប្រកាន់ ពីបទបង្កអំពើភេរវកម្ម ក្នុងការដាក់បង្កៃគ្រាប់បែកបំផ្ទុះ នៅទីក្រុងបាងកក កាលពីថ្ងៃទី២២ ខែមិថុនា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ
សេចក្តីប្រកាសបដិសេធរបស់កម្ពុជា នៅថ្ងៃនេះ បានធ្វើឡើងក្រោយពីមានការអះអាងរបស់លោកនាយករដ្ឋមន្ត្រីថៃ អាប់ភីស៊ីត ថាជនជាប់ចោទថៃ ពីរនាក់ប្តី-ប្រពន្ធ ដែលត្រូវរដ្ឋាភិបាលក្រុងបាងកក ចោទប្រកាន់ក្នុងរឿងបំផ្ទុះគ្រាប់បែក បានសារភាពថា អំឡុងពេលស្នាក់នៅកម្ពុជា ពួកគេបានជួបនឹងបុរសស្ត្រីជនជាតិថៃពីរនាក់ ដែលជាមេដឹកនាំក្រុមអាវក្រហម នៅខេត្តសៀមរាប។ ជនជាតិថៃពីរនាក់នោះ ត្រូវបានរដ្ឋាភិបាលក្រុងបាងកក ចោទប្រកាន់ ជាមេគំនិតក្នុងរឿងបំផ្ទុះគ្រាប់បែក នៅមុខទីស្នាក់ការគណបក្សភូមិចៃថៃ ក្នុងក្រុងបាងកក កាលពីថ្ងៃទី២២ ខែមិថុនា ឆ្នាំ២០១០។
ក៏ប៉ុន្តែនៅថ្ងៃពុធនេះ លោក កុយ គួង អ្នកនាំពាក្យក្រសួងការបរទេសកម្ពុជា បានថ្លែងថា ការលើកឡើងពីវត្តមានរបស់មេដឹកនាំអាវក្រហម ដែលជាប់ពាក់ព័ន្ធនឹងអំពើភេរវកម្ម កំពុងជ្រកកោននៅកម្ពុជានោះ គឺជារឿងមិនពិត និងធ្វើឡើងទាំងបំពាន ដែលមានចរិកជាការសងសឹករបស់ជនជាតិថៃ ពីរនាក់ប្តីប្រពន្ធ ដែលត្រូវកម្ពុជា ចាប់ខ្លួន និងបញ្ជូនទៅកាន់ប្រទេសថៃ កាលពីថ្ងៃទី៥ ខែកក្កដា។
កាសែតថៃ នៅថ្ងៃទី៧ ខែកក្កដានេះ បានដកស្រង់សម្តីរបស់លោកនាយករដ្ឋមន្ត្រីថៃ អាប់ភីស៊ីត មកចុះផ្សាយថា យោងតាមជនជាប់ចោទថៃ ២ នាក់ ប្តី-ប្រពន្ធ បានសារភាពថា ខណៈដែលពួកគេស្ថិតនៅក្នុងខេត្តសៀមរាប ប្រទេសកម្ពុជា ពួកគេបានជួបមេដឹកនាំក្រុមអាវក្រហម សំខាន់ពីរនាក់ គឺស្ត្រីឈ្មោះ ផាក់ មន្នីចក្រ និងលោក ផាយ៉ាប់ ប៉ាន់កេត។
កាសែត ក៏បានស្រង់សម្តីរបស់លោកនាយករដ្ឋមន្ត្រីថៃ អាប់ភីស៊ីត បញ្ជាក់ថា រដ្ឋាភិបាលក្រុងបាងកក របស់លោកនឹងធ្វើលិខិតសុំកិច្ចសហការ ជាមួយភាគីកម្ពុជា ក្នុងការតាមចាប់ មេដឹកនាំក្រុមអាវក្រហម ដែលលាក់ខ្លួនក្នុងប្រទេសកម្ពុជា។ មេដឹកនាំក្រុមអាវក្រហមនោះ ត្រូវបានចោទប្រកាន់ ពីបទបង្កអំពើភេរវកម្ម បំផ្ទុះគ្រាប់បែក នៅទីក្រុងបាងកក។
យ៉ាងណាក៏ដោយ លោក កុយ គួង បានគូសបញ្ជាក់ជាថ្មីពីជំហររបស់រដ្ឋាភិបាលកម្ពុជាថា ជនណាក៏ដោយ ដែលជាភេរវករ ទោះបីជាក្រុមអាវក្រហម ឬអាវលឿងថៃ គឺកម្ពុជាមិនអនុគ្រោះឲ្យជ្រកកោនក្នុងទឹកដីរបស់ខ្លួនដាច់ខាត។ ប្រសិនបើក្រុមភេរវករនោះ មានវត្តមានលើទឹកដីកម្ពុជា គឺកម្ពុជា នឹងចាប់បញ្ជូនត្រឡប់ទៅប្រទេសថៃវិញ ដូចករណីប្តីប្រពន្ធថៃ ជាប់ចោទ ដែលត្រូវបានកម្ពុជា ចាប់បញ្ជូន កាលពីថ្ងៃច័ន្ទម្សិលម្ង៉ៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ