កម្ពុជាចាប់ភេរវជនថៃពីរនាក់បញ្ជូនទៅស្រុកវិញ
ភេរវជនថៃពីរនាក់ដែលបានឆ្លងដែន ចូលក្នុងទឹកដីខ្មែរដើម្បីគេចខ្លួនបន្ទាប់ពីភេរវកម្មបោកគ្រាប់ បែកក្នុងទីក្រុងបាងកកកាលពីថ្ងៃទី២២មិថុនាត្រូវបានអាជ្ញាធរ ខ្មែរចាប់ខ្លួននៅល្ងាចថ្ងៃសៅរ៍ម្សិលមិញនៅឯខេត្តសៀមរាប។ ក្រសួង ការបរទេសបានចេញសេចក្តីប្រកាសព័ត៌មានភ្លាមៗដើម្បីជូនដំណឹងអំពី ការចាប់ខ្លួនភេរវជនថៃទាំងពីរដែលគេគ្រោងនឹងប្រគល់ឲ្យអាជ្ញាធរ ថៃវិញនៅថ្ងៃចន្ទ័ស្អែកនេះ។ ទោះបីជាគ្មានការស្នើសុំពីភាគីថៃ ក៏ដោយក៏កម្ពុជាបានបង្ហាញពីកិច្ចសហប្រតិបត្តិការក្នុងការប្រឆាំង នឹងភេរវកម្មជាមួយប្រទេសថៃក្នុងបរិបទដែលចំណងការទូតរវាងប្រទេស ទាំងពីរស្ថិតក្នុងភាពរង្គោះរង្គើ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ ប៉ែន បូណា ពីទីក្រុងភ្នំពេញ
ក្នុងសេចក្តីប្រកាសព័ត៌មានមួយដែលចេញផ្សាយនៅព្រលប់ថ្ងៃសៅរ៍ម្សិលមិញក្រសួងការបរទេសកម្ពុជាបានប្រកាសជូនដំណឹងជាសាធារណៈថាអាជ្ញាធរខ្មែរទើបតែបានចាប់ខ្លួនភេរវជនថៃពីរនាក់ដែលបានឆ្លងដែនចូលក្នុងទឹកដីកម្ពុជា។ ការចាប់ខ្លួនជនសង្ស័យជាភេរវជនទាំងពីរនេះបានធ្វើឡើងកាលពីវេលាម៉ោង៥ល្ងាចថ្ងៃទី៣កក្កដាម្សិលមិញនៅក្នុងខេត្តសៀមរាប។ បើយោងតាមក្រសួងការបរទេសជនជាតិថៃទាំងពីរប្រុសម្នាក់និងស្រីម្នាក់គឺជាអ្នកគប់គ្រាប់បែកក្នុងទីក្រុងបាងកកកាលពីថ្ងៃទី២២មិថុនាកន្លងទៅថ្មីៗនេះ។ អាជ្ញាធរខ្មែរគ្រោងនឹងប្រគល់ជនសង្ស័យទាំងពីរនេះឲ្យទៅរដ្ឋាភិបាលទីក្រុងបាងកកវិញនៅថ្ងៃចន្ទ័ស្អែកនេះតាមរយៈស្ថានទូតថៃប្រចាំរាជធានីភ្នំពេញ។
ការចាប់ខ្លួនភេរវកជនជាតិថៃទាំងពីរនេះបានធ្វើឡើងដោយគ្មានសំណើពីភាគីថៃទេប៉ុន្តែក្រសួងការបរទេសកម្ពុជាបានបញ្ជាក់ថានេះគឺជាការបង្ហាញពីការអនុវត្តន៍នយោបាយប្រឆាំងភេរវកម្មរបស់រដ្ឋាភិបាលកម្ពុជាដែលជានិច្ចកាលតែងតែធ្វើកិច្ចសហប្រតិបត្តិការជាមួយបណ្តាប្រទេសនានានៅលើពិភពលោកដើម្បីប្រឆាំងនឹងអំពើភេរវកម្ម។ គួរកត់សម្គាល់ដែរថាការចាប់ខ្លួនភេរវករថៃបញ្ជូនទៅឲ្យរដ្ឋាភិបាលក្រុងបាងកកវិញនៅពេលនេះក៏បានធ្វើឡើងខណៈដែលរដ្ឋាភិបាលថៃតែងសង្ស័យថាកម្ពុជាទំនងជាបានលាក់បំពួនក្រុមអ្នកប្រឆាំងនឹងរដ្ឋាភិបាលក្រុងបាងកកនៅលើទឹកដីរបស់ខ្លួន។ ប៉ុន្តែម្តងហើយម្តងទៀតរដ្ឋាភិបាលកម្ពុជាតែងបានបដិសេធ។
ម្យ៉ាងទៀតកាយវិការរបស់រដ្ឋាភិបាលភ្នំពេញនៅពេលនេះបានធ្វើឡើងខណៈដែលទំនាក់ទំនងការទូតរវាងកម្ពុជាថៃបានធ្លាក់ចុះដល់កម្រិតមួយដែលមិនធ្លាប់មាន។ចំណងការទូតរវាងប្រទេសជិតខាងទាំងពីរនេះបានចាប់ផ្តើមរង្គោះរង្គើនៅពេលដែលថៃបានបញ្ជូនទាហានរបស់ខ្លួនចូលទន្ទ្រានទឹកដីខ្មែរនៅក្បែរប្រាសាទព្រះវិហារកាលពីថ្ងៃទី១៥កក្កដាឆ្នាំ២០០៨។ ទំនាក់ទំនងរវាងប្រទេសទាំងពីរកាន់តែអាក្រក់ឡើងៗរហូតភាគីថៃបានដកឯកអគ្គរាជទូតរបស់ខ្លួនចេញពីកម្ពុជាកាលពីចុងឆ្នាំ២០០៩បន្ទាប់ពីកម្ពុជាបានតែងតាំងលោកអតីតនាយករដ្ឋមន្ត្រីថៃថាក់ស៊ីនស៊ីណាវ៉ាត្រាជាទីប្រឹក្សាសេដ្ឋកិច្ចនោះមក។
រហូតមកទល់នឹងពេលនេះវិបត្តិការទូតរវាងប្រទេសទាំងពីរនៅតែជាប់គាំងមិនអាចដោះស្រាយបាន។ទាហានថៃនៅតែបន្តប្រមាថជីវិតពលរដ្ឋខ្មែរឥតឈប់ឈរតាមរយៈការបាញ់សម្លាប់ដោយគ្រាន់តែចោទថាពលរដ្ឋខ្មែរទាំងនោះបានឆ្លងដែនដោយខុសច្បាប់។យ៉ាងណាក៏ដោយរដ្ឋាភិបាលកម្ពុជាបានបង្ហាញភាពជាគំរូក្នុងការគោរពសិទ្ធិមនុស្សដល់ប្រទេសថៃតាមរយៈការចាប់បញ្ជូនភេរវកពីររូបទៅឲ្យទីក្រុងបាងកកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ