ជប៉ុនផ្តល់ថវិកា ២,២៦ លានដុល្លារដល់ភាគីកម្ពុជាក្នុងតុលាការខ្មែរក្រហម
នៅថ្ងៃសុក្រនេះ រដ្ឋាភិបាលប្រទេសជប៉ុន បានប្រគល់ថវិកាចំនួន ២,២៦ លានដុល្លារអាមេរិក ដល់ភាគីកម្ពុជា នៅក្នុងតុលាការកាត់ទោសមេខ្មែរក្រហម។ ថវិកាជំនួយរបស់ជប៉ុន ២,២៦ លានដុល្លារនេះ សម្រាប់បើកប្រាក់ខែបុគ្គលិក ខាងភាគីកម្ពុជា ចំនួន ២៩៤ នាក់ ចាប់ពីខែមេសា រហូតដល់ខែតុលា។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់លី ម៉េងហួរពីទីក្រុងភ្នំពេញ
ថវិកាជំនួយជប៉ុន ២,២៦ លានដុល្លារ នាពេលនេះ នឹងត្រូវប្រើប្រាស់ដើម្បីបើកប្រាក់ខែដល់បុគ្គលិកជាតិ។ តុលាការខ្មែរក្រហម ត្រូវចំណាយប្រមាណ ៤៨៥,០០០ ដុល្លារអាមេរិក លើប្រាក់ខែបុគ្គលិកកម្ពុជា ២៩៤ នាក់។ ក៏ប៉ុន្តែ នៅក្នុងខែមេសាកន្លងមកនេះ ប្រាក់ខែរបស់បុគ្គលិកកម្ពុជា បើកបានតែពាក់កណ្តាលប៉ុណ្ណោះ ព្រោះភាគីកម្ពុជា អស់លុយ។ ចំណែកនៅខែឧសភា និងខែមិថុនា កន្លងមកនេះ បុគ្គលិកកម្ពុជា មិនបានបើកប្រាក់ខែទេ។
ក្នុងកិច្ចប្រជុំ នៅទីស្នាក់ការធំអង្គការសហប្រជាជាតិ នាបូរីញូយ៉ក កាលពីខែឧសភាកន្លងមក ប្រទេសម្ចាស់ជំនួយ បានប្រកាសសន្យាបរិច្ចាកថវិកាដល់សាលាក្តីខ្មែរក្រហម សរុបចំនួន ១៦,៩ លានដុល្លារអាមេរិក។ ក្នុងនោះ ភាគីកម្ពុជា ទទួលបានប្រាក់ចំនួន ៣,៤ លានដុល្លារ ដែលជាការបរិច្ចាគរបស់ប្រទេសជប៉ុន, អាល្លឺម៉ង់, អូស្ត្រាលី និងសហភាពអឺរ៉ុប។ ចំណែកភាគីអង្គការសហប្រជាជាតិ ទទួលបានប្រាក់ ១៣,៥ លានដុល្លារអាមេរិក សម្រាប់ឆ្នាំ២០១០នេះ។
ក្នុងពិធីប្រគល់ និងទទួលថវិកាជំនួយជប៉ុន នៅព្រឹកមិញ លោក មាសាហ្វូមី គូរុគី ( Masafumi Kuroki ) ឯកអគ្គរាជទូតជប៉ុន ប្រចាំកម្ពុជា បានលើកឡើងថា ការផ្តល់ជំនួយថវិកា ដល់ សាលាក្តីខ្មែរក្រហមនេះ រដ្ឋាភិបាលជប៉ុន បានភ្ជាប់មកជាមួយនូវចំណុចសំខាន់ៗ បី គឺ
ទី១-ដំណើរការកាត់ទោសមេខ្មែរក្រហម គឺជាដំណាក់កាលបំពេញនូវដំណើរការសន្តិភាពសម្រាប់ប្រជាជនកម្ពុជា នៅក្នុងកិច្ចការពារ ដើម្បីកុំឲ្យអំពើសម្លាប់មនុស្ស ដ៏សាហាវឃោរឃៅ ក្នុងរបបខ្មែរក្រហម កើតឡើងជាថ្មី។ ទី២-តុលាការកាត់ទោសមេខ្មែរក្រហម នឹងជួយផ្តល់នូវយុត្តិធម៌ដល់ជនរងគ្រោះ ក្នុងរបបខ្មែរក្រហម និងចូលរួមចំណែកនូវការផ្សះផ្សារជាតិ។ ទី៣-តុលាការនេះ នឹងចូលរួមចំណែកនូវការពង្រឹងនីតិរដ្ឋ ( ការគោរពច្បាប់ ) នៅក្នុងប្រទេសកម្ពុជា។
លោក ឌឹម សុវណ្ណារុំ អ្នកនាំពាក្យសាលាក្តីខ្មែរក្រហម បានលើកឡើងថា ការផ្តល់ជំនួយពី ប្រទេសជប៉ុន និងការសន្យាផ្តល់ជំនួយពីប្រទេសអូស្ត្រាលី, អាល្លឺម៉ង់ និងសហភាពអឺរ៉ុប ដល់ ភាគីកម្ពុជា សរុបចំនួន ៣,៤ លានដុល្លារអាមេរិក គឺអាចឲ្យភាគីកម្ពុជា បើកប្រាក់ខែដល់ បុគ្គលិក បានត្រឹមតែខែតុលា ឆ្នាំ២០១០ ប៉ុណ្ណោះ។ ដូច្នេះហើយ បានជាលោក ឌឹម សុវណ្ណារុំ បានអះពាវនាវឲ្យប្រទេសអ្នកផ្តល់ជំនួយ បន្តការបរិច្ចាគថវិកាបន្ថែមទៀតដល់សាលាក្តី ដើម្បី កុំឲ្យដំណើរការស្វែងរកយុត្តិធម៌ ក្នុងរបបខ្មែរក្រហម ជួបប្រទះនឹងវិបត្តិថវិកាជាថ្មីម្តងទៀត។
ដោយចាប់ផ្តើមការងារ កាលពីខែកុម្ភៈ ឆ្នាំ២០០៦ មកដល់ពេលនេះ តុលាការចម្រុះ ដែលមានបុគ្គលិក មេធាវី ព្រះរាជអាជ្ញា និងចៅក្រម ជាតិ និងអន្តរជាតិ បានចំណាយថវិកា សរុបជាង ១០០ លានដុល្លារអាមេរិក។
សូមបញ្ជាក់ថា ប្រទេសជប៉ុន ជាប្រទេសអ្នកថវិកាច្រើនជាងគេដល់សាលាក្តីខ្មែរ ដែលមកដល់ពេលនេះ មានចំនួន ៥០,៣៨ លានដុល្លារអាមេរិក ឬស្មើនឹង ៤៨ % នៃថវិកាចំណាយទាំងមូល។ ក្នុងនោះ ៤៣លានដុល្លារអាមេរិក ត្រូវផ្តល់ឲ្យភាគីអន្តរជាតិ និង ៧,៣៧ លានដុល្លារ ត្រូវបានផ្តល់ឲ្យភាគីកម្ពុជា ក្នុងតុលាការចម្រុះ កាត់ទោសមេខ្មែរក្រហម។
ព្រឹត្តិការណ៍សំខាន់របស់តុលាការខ្មែរក្រហម គឺការបញ្ចប់ដោយជោគជ័យ នូវដំណើរការជំនុំជម្រះ លើសំណុំរឿង ០០១ ប្រឆាំងនឹង លោក កាំង ហ្កេកអ៊ាវ ហៅ ឌុច កាលពីឆ្នាំ២០០៩ កន្លងមក។
ដំណើរការកាត់ទោសអតីតមេគុកទួលស្លែង លោក កាំង ហ្កេកអ៊ាវ ហៅ ឌុច ត្រូវបានលោក ក្រាញ់ តូនី ប្រធានស្តីទី នៃការិយាល័យរដ្ឋបាល របស់សាលាក្តីខ្មែរក្រហម លើកឡើង ក្នុងពិធីទទួលថវិកាជំនួយនៅព្រឹកមិញ ផងដែរ។
សេចក្តីសម្រេចលើរឿង០០១ របស់ ឌុច នឹងត្រូវប្រកាស នៅព្រឹកថ្ងៃទី២៦ ខែកក្កដាខាងមុខ។ ព្រឹត្តិការណ៍សំខាន់មួយទៀត គឺ សំណុំរឿង ០០២ ដែលប្រឆាំងនឹង នួន ជា, ខៀវ សំផន អៀង សារី និងអៀង ធីរិទ្ធ ត្រូវបានបិទបញ្ចប់ការស៊ើបអង្កេតកាលពីខែមករា ដើមឆ្នាំនេះ។ សំណុំរឿង ០០២ នឹងត្រូវចៅក្រម ចេញដីកាដំណោះស្រាយ ឬដីកាបញ្ជូនរឿងទៅជំនុំជម្រះ នៅក្នុងខែកញ្ញាខាងមុខ។ ចំណែកការជំនុំជម្រះក្តីលើសំណុំរឿង ០០២ ត្រូវបានគេប្រកាសថា នឹងអាចធ្វើ នៅដើមឆ្នាំ២០១១។ នៅពេលនេះ សហចៅក្រមស៊ើបអង្កេតអន្តរជាតិ ក៏កំពុងតែសិក្សាលើសំណុំរឿង ០០៣ និង ០០៤ ដើម្បីឈានដល់ការចោទប្រកាន់មេខ្មែរក្រហមបន្ថែម លើសពី៥ នាក់ទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ