បុគ្គលិកខ្មែរនឹងទទួលប្រាក់ខែតែ៥០%សម្រាប់ខែមេសា
ការិយាល័យរដ្ឋបាលនៃអង្គជំនុំជម្រះ វិសាមញ្ញក្នុងតុលាការកម្ពុជាឬ ហៅកាត់ថាសាលាក្តីខ្មែរក្រហមបានប្រកាសជូនដំណឹងកាលពីថ្ងៃ ម្សិលមិញដល់បុគ្គលិកខ្មែរទាំងអស់ថាពួកគេនឹងទទួលបានប្រាក់ខែតែ ៥០%ប៉ុណ្ណោះសម្រាប់ខែមេសានេះដោយសារតែបញ្ហា កង្វះថវិកា។ ការិយាល័យរដ្ឋបាលនៃសាលាក្តី ខ្មែរក្រហមក៏បានអំពាវនាវឲ្យ បណ្តាប្រទេសផ្តល់ជំនួយបន្តគាំទ្រដល់សាលាក្តីនិងត្រូវពន្លឿននីតិវិធីក្នុងការបញ្ជូនសាច់ ប្រាក់មកឲ្យសាលាក្តីនេះដើម្បីចៀសវាងការយឺតយ៉ាវ។
ចុះផ្សាយនៅថ្ងៃ៖ កែប្រែថ្ងៃទី៖
សំឡេងរបស់ ប៉ែន បូណា
ដំណឹងមិនសូវល្អសម្រាប់បុគ្គលិកជនជាតិខ្មែរនៅសាលាក្តីខ្មែរក្រហមបានមកដល់ទៀតហើយ។ពួកគេនឹងទទួលបានប្រាក់ខែតែពាក់កណ្តាលប៉ុណ្ណោះសម្រាប់ខែមេសានេះ។សេចក្តីជូនដំណឹងនេះត្រូវបានការិយាល័យរដ្ឋបាលនៃសាលាក្តីប្រកាសប្រាប់បុគ្គលិកជនជាតិខ្មែរទាំងអស់កាលពីថ្ងៃសុក្រម្សិលមិញ។
លោក ឌឹម សុវណ្ណារុំ មន្ត្រីអ្នកនាំពាក្យសាលាក្តីខ្មែរក្រហមបានពន្យល់នៅថ្ងៃនេះថាកង្វះថវិកាគឺបណ្តាលមកពីការិយាធិបតេយ្យនៃនីតិវិធីបញ្ជូនប្រាក់របស់បណ្តាប្រទេសផ្តល់ជំនួយ។បើយោងតាមអ្នកនាំពាក្យរូបនេះបើទោះបីជាខ្វះថវិកាក៏ដោយក៏ការិយាល័យរដ្ឋាបាលនៃសាលាក្តីបានអំពាវនាវឲ្យបុគ្គលិកខ្មែរទាំងអស់បំពេញការងារប្រកបដោយការទទួលខុសត្រូវនិងក្នុងមនសិការវិជ្ជាជីវៈដដែលដោយគ្មានការប្រែប្រួល។
កាលពីខែកុម្ភៈឆ្នាំ២០១០នេះបណ្តាប្រទេសផ្តល់ជំនួយនិងប្រទេសជាមិត្តដែលមានសមានចិត្តជាមួយតុលាការខ្មែរក្រហមបានសម្រេចផ្តល់កញ្ចប់ថវិកាសរុបប្រមាណជា៨៧លានដុល្លារអាមេរិកសម្រាប់ដំណើរការឆ្នាំ២០១០និង២០១១។ ទឹកប្រាក់នេះរួមបញ្ចូលទាំងភាគីជាតិនិងអន្តរជាតិ។ប៉ុន្តែនេះគ្រាន់តែជាការសន្យាប៉ុណ្ណោះរីឯសាច់ប្រាក់ពិតប្រាកដនៅមិនទាន់មកដល់នៅឡើយទេ។លោកឌឹមសុវណ្ណារុំបានបញ្ជាក់ថាភាគីអន្តរជាតិមានថវិកាសម្រាប់បើកប្រាក់ខែឲ្យបុគ្គលិករបស់ខ្លួនរហូតដល់ខែកក្កដាខណៈដែលគាគីខ្មែរបានអស់ថវិកាទៅហើយក្នុងខែមេសានេះ។
សូមបញ្ជាក់ថា បុគ្គលិកជនជាតិខ្មែរទាំងអស់ ដែលបម្រើការនៅសាលាក្តីខ្មែរក្រហមមានចំនួនសរុប២៩៤នាក់។ ជារៀងរាល់ខែសាលាក្តីត្រូវចំណាយថវិកាប្រមាណជា៤៨៥០០០ដុល្លារសម្រាប់បើកប្រាក់ខែឲ្យពួកគេ។ថវិកានេះតែងតែខ្វះខាតជាញឹកញាប់ដែលធ្វើឲ្យប្រាក់ខែរបស់បុគ្គលិកជនជាតិខ្មែរជួបប្រទះនឹងការយឺតយ៉ាវ។ យ៉ាងណាក៏ដោយបើយោងតាមលោក ឌឹម សុវណ្ណារុំ សាលាក្តីគ្រោងនឹងរើសបុគ្គលិកថ្មីជាង៤០នាក់ទៀតដើម្បីឆ្លើយតបនឹងតម្រូវការជាក់ស្តែង។
ទោះបីជាទទួលបានប្រាក់ខែតែ៥០%ក្នុងខែមេសានេះក្តីក៏បុគ្គលិកសាលាក្តីខ្មែរក្រហមមួយចំនួនបានអះអាងថាពួកគេមិនអស់សង្ឃឹមឡើយ។យ៉ាងហោចណាស់ពួកគេអាចបន្តទទួលប្រាក់ខែរហូតដល់ដំណាច់ឆ្នាំ២០១១ដោយគ្មានការបារម្ភ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ