គណបក្សរាជានិយមពិបាកនឹងលុបស្នាមប្រេះឆា
ចុះផ្សាយនៅថ្ងៃ៖
ស្តាប់ - ០៤:០០
គណបក្សហ៊្វុនស៊ិនប៉ិច និងគណបក្សជាតិនិយមដែលជាអតីតបងប្អូនគូសត្រូវនឹងគ្នាកំពុងព្យាយាមបង្រួបបង្រួមឲ្យក្លាយជាគណបក្ស តែមួយឡើងវិញ បន្ទាប់ពីបានបែកបាក់គ្នា ហើយធ្វើឲ្យគណបក្សរាជានិយមខ្ទេចខ្ទីស្ទើរក្លាយជាផេះផង់នោះមក។ ឆ្លងកាត់ការចរចាគ្នាជាច្រើនលើកគណបក្សទាំងពីរបានឈានដល់ការ សម្រេចធ្វើបញ្ជីឈ្មោះតែមួយសម្រាប់ការបោះឆ្នោតនៅឆ្នាំ២០១២ និង២០១៣ខាងមុខ។ ប៉ុន្តែនៅពីក្រោយឆាកនៃការបង្រួបបង្រួមនេះ គណបក្សហ៊្វុនស៊ិនប៉ិចនៅតែបង្ហាញពីការបែងចែកជាពីរក្រុមដែលមាន និន្នាការនយោបាយបញ្ច្រាសទិសគ្នាដដែល។
ដំណើរការចរចាដើម្បីបង្រួបបង្រួមគ្នារវាងគណបក្សហ៊្វុនស៊ិនប៉ិច និងគណបក្សជាតិនិយមកំពុងឈានទៅមុខគួរឲ្យកត់សម្គាល់។ ឥឡូវនេះគណបក្សទាំងពីរបានយល់ស្របគ្នាបង្កើតសម្ពន្ធ័ភាព «ហ៊្វុនស៊ិនប៉ិច-ជាតិនិយម» ដែលត្រូវមានបញ្ជីបោះឆ្នោតរួមគ្នាតែមួយ។ នេះគឺជាសញ្ញាវិជ្ជមានមួយដែលគួរឲ្យលើកទឹកចិត្ត។
ប៉ុន្តែមានចំណោទពីរយ៉ាង ដែលកំពុងលេចធ្លោនៅក្នុងក្រសែភ្នែករបស់ក្រុមអ្នកសង្កេតការណ៍ដែលបង្ហាញពីឧបសគ្គនៅក្នុងដំណើរការបង្រួបបង្រួមបក្សរាជានិយមទាំងពីរ។ ចំណោទទី១ ជាបញ្ហាសាមញ្ញតែពិបាកដោះស្រាយ។ នោះគឺចំណោទស្តីពីឈ្មោះគណបក្សថ្មីនេះឯង។ តាមពិតបញ្ហានេះធ្លាប់បានកើតឡើងរួចទៅហើយ ហើយវាបានក្លាយជាដើមចមនៃបរាជ័យដ៏ជូរចត់នៃការបង្រួបបង្រួមបក្សនយោបាយនៅកម្ពុជា។ ជាក់ស្តែងការគាំងដំណើរនៃនយោបាយបង្រួបបង្រួមគណបក្សសមរង្ស៊ី និងគណបក្សសិទ្ធិមនុស្ស គឺជាឧទាហរណ៍ចុងក្រោយមួយ។ តើគណបក្សណាត្រូវចូលជាមួយគណបក្សណា បើម្នាក់ៗសុទ្ធតែចង់រក្សាអត្តសញ្ញាណនៃគណបក្សរបស់ខ្លួននោះ?
ចំណោទទី២ ខណៈដែលការព្យាយាមរើសបំណែកតូចៗ មកផ្គុំគ្នាឲ្យទៅជាគណបក្សធំមួយឡើងវិញកំពុងទទួលបានលទ្ធផលគាប់ប្រសើរហើយនោះ ផ្ទៃក្នុងហ៊្វុនស៊ិនប៉ិចនៅតែបង្ហាញភាពប្រេះស្រាំដែលពិបាកនឹងផ្គុំបញ្ចូលគ្នាដដែល។ នៅក្នុងគណបក្សនេះមានលេចចេញនិន្នាការពីរបញ្ច្រាសទិសគ្នានោះ គឺហ៊្វុនស៊ិនប៉ិចក្រុមលោក ញឹក ប៊ុនឆៃ ដែលកំពុងមានសម្ពន្ធ័ភាពជាមួយគណបក្សកាន់អំណាច និងហ៊្វុនស៊ិនប៉ិចក្រុមរបស់លោក លឺ ឡាយស្រេង ដែលគេចោទថាមានទំនោរទៅរកបក្សប្រឆាំង ដោយសារតែក្រុមនេះហ៊ានរិះគន់រដ្ឋាភិបាលដោយឥតសំចៃមាត់។
ព្រោះតែមាននិន្នាការពីរបែបនេះហើយ បានជាកាលពីសប្តាហ៍មុនឧត្តមសេនីយ៍យោធាម្នាក់របស់គណបក្សហ៊្វុនស៊ិនប៉ិចត្រូវបានលោកនាយករដ្ឋមន្ត្រី ហ៊ុន សែន ប្រកាសដកចេញពីមុខតំណែងនៅកណ្តាលអង្គប្រជុំគណៈរដ្ឋមន្ត្រី។ ហេតុផលដែលនាំដល់ការសម្រេចចិត្តនេះត្រូវបានលោកនាយករដ្ឋមន្ត្រីពន្យល់ថាមកពីឧត្តមសេនីយ៍រូបនោះមានទំនាក់ទំនងការងារជាមួយគណបក្សប្រឆាំង។ ទោះជាហេតុផលនេះត្រូវបានសាម៉ីខ្លួនបដិសេធក៏ដោយ ក៏ការណ៍នេះ វាបានបង្ហាញច្បាស់អំពីការបែកបាក់ផ្ទៃក្នុងហ៊្វុនស៊ិនប៉ិចដែលនៅតែមិនអាចលុបបាននៅឡើយ។ នៅក្នុងស្ថានភាពបែបនេះ តើគណបក្សរាជានិយមអាចផ្សារភ្ជិតការបែកបាក់ និងស្នាមប្រេះស្រាំដ៏យូរលង់របស់ខ្លួនបានដែរឬទេ?
ជាការពិត នៅក្នុងសង្គមខ្មែរ មានហេតុផលសំខាន់ពីរយ៉ាង ដែលនាំដល់ការបែកបាក់ ហើយដែលគេអាចទុកជាមេរៀនប្រវត្តិសាស្រ្តបាន។ ហេតុផលទី១ គឺគំនិត«អញនិយម»មានន័យថាមានតែខ្លួនជាអ្នកខ្លាំងជាងគេ រីឯអ្នកដទៃត្រូវតែរណបតាមខ្លួន។ នៅពេលដែលមានតែអ្នកខ្លាំងដូចគ្នាប្រាកដណាស់ថាពួកគេនិយាយស្តាប់គ្នាមិនបានឡើយ ពីព្រោះថាមិនដឹងជាអ្នកណាត្រូវស្តាប់អ្នកណា។ ទីបំផុត គឺការចែកផ្លូវគ្នាដើរដើម្បីឲ្យចប់រឿង។ ហេតុផលទី២ គឺគំនិត «លាក់ពុត» របស់អ្នកនយោបាយ។ មានន័យថាម្នាក់ៗសុទ្ធតែចេះនិយាយយ៉ាងស្ទាត់ជំនាញថាខ្លួនជាអ្នកស្នេហាជាតិ និងគិតគូរអំពីប្រយោជន៍ជាតិជាធំ តែនេះគ្រាន់តែជាទ្រឹស្តីសម្រាប់បំពេរអារម្មណ៍ប្រជាពលរដ្ឋតែប៉ុណ្ណោះ។ តាមការពិតមានតែប្រយោជន៍ផ្ទាល់ខ្លួននិងបក្ខពួករបស់ខ្លួនប៉ុណ្ណោះដែលធំលើសមហាមេឃ។ ក្នុងបរិបទនេះប្រយោជន៍ជាតិច្បាស់ជាត្រូវគេទុកមួយអន្លើសិនហើយ។
សរុបមកវិញបំណែកតូចៗនៃគណបក្សរាជានិយម គឺប្រាកដជាមិនអាចយកមកផ្គុំគ្នាឲ្យទៅជាគណបក្សធំមួយវិញបានឡើយ ប្រសិនបើអ្នកនយោបាយម្នាក់ៗនៅតែតាំងខ្លួនជាអ្នកខ្លាំង បើទោះបីជាពួកគេបែកបាក់ខ្ទេចខ្ទីស្ទើរតែនៅសល់តែខ្លួនមួយហើយក៏ដោយនោះ។ ការធ្លាក់ពីកំពូលមកដល់បាតក្រោមបំផុតនៃគណបក្ស«រាជានិយម»គួរតែអង្រួនពួកគេឲ្យភ្ញាក់ពីសន្លប់វិញបានហើយនៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ