សែរាជវង្សថៃមួយអង្គស្នើរដ្ឋសភាថៃកុំពិភាក្សារឿងព្រំដែនខ្មែរថៃ
សារព័ត៌មានASTV manager onlineរបស់ ថៃបានផ្សាយអោយដឹង នៅថ្ងៃទី៧ឧសភានេះថា អ្នកអង្គម្ចាស់វ៉ាន់វីផា ចារូនរ៉ូតបានធ្វើលិខិតមួយផ្ញើទៅរដ្ឋសភា ដើម្បីស្នើសុំអោយរដ្ឋសភាកុំពិភាក្សាអំពីប្រធានបទព្រំដែនខ្មែរថៃ។ លោក ទិត សុធា អ្នកនាំពាក្យអង្គភាពប្រតិកម្មរហ័សរបស់ ទីស្តីការគណៈរដ្ឋមន្ត្រីកម្ពុជាបានរិះគន់អ្នកអង្គម្ចាស់ថៃអង្គនេះ ថា កំពុងដើរផ្ទុយពីនិន្នាការនៃប្រទេសទាំងពីរដែល ចង់បញ្ចប់ជម្លោះព្រំដែនអោយបានឆាប់នោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
សែរាជវង្សថៃមួយអង្គដែលគេស្គាល់ថា ជាអ្នកអង្គម្ចាស់វ៉ាន់វីផា ចារូនរ៉ូត បានសរសេរលិខិតមួយស្នើអោយរដ្ឋសភាថៃ លើកលែងការពិភាក្សាដេញដោលអំពីសំណុំរឿងបោះបង្គោលព្រំដែនកម្ពុជាថៃ នៅក្នុងកិច្ចប្រជុំសភាពេញអង្គ។ ព័ត៌មាននេះត្រូវបានផ្សាយនៅក្នុងបណ្តាញសារព័ត៌មានASTV manager onlineរបស់ថៃ នៅថ្ងៃទី៧ឧសភានេះ។
អ្នកអង្គម្ចាស់ថៃអង្គនេះបានលើកមូលហេតុយកមកពន្យល់ថា សំណុំរឿងព្រំដែនកម្ពុជាថៃនេះ ថ្វីត្បិតតែវាបានធ្វើត្រឹមត្រូវតាមនីតិវិធីច្បាប់ ប៉ុន្តែវាជាសំណុំរឿងដែលថៃចាញ់ប្រៀបកម្ពុជា ហើយទីបំផុតទៅ លទ្ធផលនឹងបង្ហាញពីការជាន់ដានប្រវត្តិសាស្ត្រនៃការបែងចែកព្រំដែនប្រាសាទព្រះវិហារ។ ប្រាសាទព្រះវិហារដែលក្នុងក្តីក្តាំជាមួយប្រទេសថៃ តុលាការក្រុងឡាអេបានកាត់សេចក្តីសម្រេចយកពីថៃប្រគល់មកអោយកម្ពុជាវិញ នៅក្នុងឆ្នាំ១៩៦២។
ទាក់ទងនឹងសេចក្តីស្នើរបស់អ្នកអង្គម្ចាស់វ៉ាន់វីផា ចារូនរ៉ូតនេះ លោក ទិត សុធា អ្នកនាំពាក្យអង្គភាពប្រតិកម្មរហ័សរបស់ទីស្តីការគណៈរដ្ឋមន្ត្រីកម្ពុជាបានអត្ថាធិប្បាយចាត់ទុកអ្នកអង្គម្ចាស់អង្គនេះថា ជាក្រុមជ្រុលនិយមថៃដែលកំពុងរារាំងដំណើរការនៃការចរចាដោះស្រាយជម្លោះព្រំដែននៃប្រទេសទាំងពីរ។ លោកទិត សុធាបានបន្តថា ទង្វើរបស់សែរាជវង្សថៃអង្គនេះកំពុងដើរផ្ទុយនិន្នាការរបស់រដ្ឋាភិបាលនៃប្រទេសកម្ពុជាថៃ និងនិន្នាការរបស់ប្រទេសជាមិត្តក្នុងតំបន់ដែលចង់ឃើញការបញ្ចប់ជម្លោះអោយបានឆាប់ និងពង្រីកមិត្តភាព និងសហប្រតិបត្តិការនៃប្រទេសទាំងពីរទៅវិញនោះ។
លោកកុយ គួង អ្នកនាំពាក្យក្រសួងការបរទេសបានអត្ថាធិប្បាយថា ការដែលអ្នកអង្គម្ចាស់ វ៉ាន់វីផា ចារូនរ៉ូតនិយាយថា ថៃចាញ់ប្រៀបកម្ពុជានោះ គឺវាជាក់ស្តែងណាស់ទៅហើយ ពីព្រោះកម្ពុជាមានសំអាងជាឯកសារ និងផែនទីដែលទទួលស្គាល់ជាអន្តរជាតិ។
សូមរម្លឹកថា ចាប់តាំងពីកងទ័ពថៃចូលឈ្លានពានក្នុងទឹកដីកម្ពុជាតាមបណ្តោយព្រំដែន ការចរចា និងការដោះស្រាយអំពីជម្លោះបន្ទាត់ព្រំដែនបានចាប់ផ្តើមភ្លាម តាំងពីចុងឆ្នាំ២០០៨មក ទៅតាមយន្តការដែលបានបង្កើតឡើង។ យន្តការទាំងនោះរួមមាន ក្រុមគណៈកម្មការចំរុះព្រំដែនកម្ពុជាថៃ ក្រុមការងារចម្រុះព្រំដែនរបស់ក្រសួងការពារជាតិ និងការជួបគ្នារវាងថ្នាក់រដ្ឋមន្ត្រីការបរទេស។
កន្លងមក ការជួបពិភាក្សាគ្នាមានជាច្រើនលើក ច្រើនសារ ទាំងនៅប្រទេសថៃ និងនៅប្រទេសកម្ពុជា។ រាល់កិច្ចប្រជុំ ភាគីទាំងពីរតែងមានកំណត់ហេតុនៃកិច្ចប្រជុំដែលកត់ត្រាអំពីការព្រមព្រៀងគ្នាមួយចំនួន ហើយដែលភាគីថៃត្រូវសុំការអនុម័តពីរដ្ឋសភាលើលទ្ធផលនៃកិច្ចការពិភាក្សាគ្នានេះ។ ក៏ប៉ុន្តែ តាំងពីការចរចាលើកដំបូង គឺមិនទាន់មានឯកសារនៃការចរចាគ្នាណាមួយត្រូវបានរដ្ឋសភាថៃយកទៅពិភាក្សានៅឡើយ ដែលជាការធ្វើអោយរាំងស្ទះដល់ដំណើរការចរចាព្រំដែនដល់សព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ