សង្គមស៊ីវិលខ្មែរ ថៃបន់ស្រន់សុំសន្តិភាព
នៅពេលដែលជំលោះកម្ពុជាថៃ ពិសេសការប្រឈមគ្នារវាងទាហាននៃប្រទេសទាំងពីរ នៅមិនទាន់រកដំណោះស្រាយឃើញនៅឡើយនោះ អង្គការសង្គមស៊ីវិលនៅកម្ពុជា និងនៅប្រទេសថៃ បានជួបជុំពិភាក្សា កាលពីចុងសប្តាហ៍កន្លងទៅ នៅខេត្តសៀមរាប ដើម្បីអំពាវនាវ អោយរដ្ឋាភិបាល និងកងទ័ពប្រទេសទាំងពីររក្សាអោយបានសន្តីវិធីក្នុង ការដោះស្រាយជម្លោះ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់លាង ដឺលុចពីទីក្រុងភ្នំពេញ
ចាប់តាំងពីមានការចុះឈ្មោះប្រាសាទព្រះវិហារចូលក្នុងបញ្ជីបេតិកភណ្ឌពិភពលោក និងបន្ទាប់មក កើតមានការឈ្លោះតវ៉ាគ្នារវាងរដ្ឋាភិបាលកម្ពុជា និងថៃនោះ ខាងសង្គមស៊ីវិលនៃប្រទេសទាំងពីរក៏បានចាប់ផ្តើមជួបគ្នាដែរ ដើម្បីពិចារណាជួយរដ្ឋាភិបាលរកដំណោះស្រាយ ក៏ដូចជាជំរុញអោយរដ្ឋាភិបាលដោះស្រាយបញ្ហាដោយសន្តិវិធី។
កាលពីចុងសប្តាហ៍កន្លងទៅនេះ នៅឯខេត្តសៀមរាប តំណាងសង្គមស៊ីវិលកម្ពុជា និងថៃបានជួបគ្នាម្តងទៀត ជាលើកទី៣ ដើម្បីរំលឹកប្រធានបទដដែលឡើងវិញ នោះគឺជំរុញអោយរដ្ឋាភិបាលទាំងពីរទប់ស្កាត់មិនអោយមានការផ្ទុះអាវុធដាក់គ្នានៅក្នុងការដោះស្រាយជម្លោះបន្ទាត់ព្រំដែន ដោយតម្កល់ប្រយោជន៍ពលរដ្ឋទាំងពីរជាធំ បង្កើនការអប់រំដល់យុវជនជំនាន់ក្រោយមិនអោយបង្កើតមនោសញ្ចេតនាស្អប់ខ្ពើម និងចងកំហឹងនឹងគ្នា។
មានមនុស្សរហូតជាង៦០នាក់ដែលជាតំណាងអោយអង្គការសង្គមស៊ីវិលទាំងថៃ ទាំងខ្មែរ ក្នុងនោះក៏មានទាំងព្រះសង្ឃ និងដូនជីផង ដែលបានអង្គុយពិភាក្សាគ្នានៅឯខេត្តសៀមរាប ក្រោមប្រធានបទ "ផ្លូវឆ្ពោះទៅរកសន្តិភាពរវាងកម្ពុជានិងថៃ"។
បើយោងតាមការរៀបរាប់របស់លោកមឿន តុលា ដែលជាតំណាងមជ្ឈមណ្ឌលអប់រំច្បាប់សហគមន៍ ហើយដែលមានវត្តមានកិច្ចប្រជុំនោះដែរ ក្រោយពីបានពិភាក្សាគ្នា ចេញជាសេចក្តីថ្លែងការណ៍មក តំណាងអង្គការទាំងអស់ ទាំងខ្មែរទាំងថៃ ទាំងដូនជី និងព្រះសង្ឃបានដង្ហែរជាក្បួនមួយពីវត្តបូរ ទៅទីសក្ការៈបូជា ព្រះអង្គចេក ព្រះអង្គចម ដើម្បីបន់ស្រន់សុំអោយមានសន្តិភាពសម្រាប់ប្រទេសទាំង២។ នេះនិយាយតាមផ្លូវសាសនា។
ប៉ុន្តែការជួបជុំពិភាក្សាគ្នាជាក់ស្តែង រយៈពេល២ថ្ងៃនោះ គឺថ្ងៃទី២៤ ដល់ថ្ងៃទី២៥មេសា បានឈានដល់ការចេញសេចក្តីប្រកាសព័ត៌មានមួយដែលមានអនុសាសន៍រហូតដល់៧ចំនុចឯណោះ ដូចជា ក្រុមអង្គការក្រៅរដ្ឋាភិបាលទាំងពីរក្រុមលើកទឹកចិត្តអោយរដ្ឋាភិបាលកម្ពុជា និងថៃដាក់អាទិភាពក្នុងការដោះស្រាយបញ្ហាដោយសន្តិវិធី ពីព្រោះថា ពួកគេព្រួយបារម្ភពីផលវិបាកដែលកើតចេញពីភាពតានតឹងរវាងកងទ័ពទាំងពីរទៅដល់ជីវភាព និងសុខមាលភាពរបស់ប្រជាពលរដ្ឋទាំងពីរដែលរស់នៅតាមព្រំដែន។ ក្រុមNGOsទាំងពីរប្រទេសក៏បានអំពាវនាវអោយអ្នកសារព័ត៌មានកម្ពុជា និងថៃប្រើតួនាទីរបស់ខ្លួនចូលរួមជម្រុញអោយមានសន្តិភាព តាមរយៈការសរសេរអត្ថបទស្តីអំពីទំនាក់ទំនងល្អរវាងប្រទេសទាំងពីរផងដែរ។
ទំនាក់ទំនងការទូត គឺវាបានធ្លាក់មក នៅត្រឹមកម្រិតភារធារីដដែលចាប់តាំងពីប្រទេសថៃប្រកាសដកឯកអគ្គរាជទូតរបស់ខ្លួនទៅបាងកកវិញ។ បន្ទាប់មកកម្ពុជាបានធ្វើតាម។ ចុងក្រោយនេះ មានការផ្សព្វផ្សាយពីបំណងរបស់ក្រុងបាងកកថា ចង់បញ្ជូនឯកអគ្គរាជទូតរបស់ខ្លួនមកភ្នំពេញវិញ ប៉ុន្តែឥឡូវក៏ស្ងាត់បាត់ឈឹងទៅវិញ។
ស្តីពីទំនាក់ទំនងខាងផ្នែកយោធាវិញ ជាទូទៅវាមិនមានភាពតានតឹងគួរអោយព្រួយបារម្ភពេកទេ។ ប៉ុន្តែយូរៗម្តងវាដូចជាមិនអាចចៀសផុតពីការផ្ទុះអាវុធដាក់គ្នាឡើយ។ ដូចជាលើកចុងក្រោយថ្មីៗនេះ កាលពីថ្ងៃទី១៦មេសា ការប្រយុទ្ធគ្នាបានកើតឡើងមួយប្រាវទៀត។ ក្រៅពីនេះ ទំនាក់ទំនងផ្នែកពាណិជ្ជកម្ម ឬការផ្លាស់ប្តូរទំនិញគ្នារវាងពលរដ្ឋទាំងពីរនៅតាមព្រំដែនមិនបានជួបប្រទះនឹងបញ្ហាអ្វីធ្ងន់ធ្ងរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ