អាជ្ញាធររឹតបណ្តឹងសន្តិសុខក្នុងពិធីបុណ្យអុំទូកខណៈពិភពលោកព្រួយបារម្ភពីបញ្ហាភេរវកម្ម
កម្លាំងការពារចម្រុះរាប់ពាន់នាក់នឹងត្រូវដាក់ពង្រាយនៅតាមគោលដៅប្រគុំតន្ត្រីនានា ក្នុងឱកាសព្រះរាជពិធីបុណ្យអុំទូករយៈពេលបីថ្ងៃចាប់ពីថ្ងៃទី២៤-២៧វិច្ឆិកាដើម្បីការពារសុវត្ថិភាពពលរដ្ឋ។ លោក គៀត ចន្ទថារិទ្ធ អ្នកនាំពាក្យអគ្គស្នងការនគរបាលជាតិលើកឡើងថា ប្រជាពលរដ្ឋនិងកម្លាំងការពារមិនត្រូវមើលងាយស្ថានការបានទេ ទោះបីពិធីបុណ្យអុំទូកមិនត្រូវបានប្រារព្ធក៏ដោយ។ អាជ្ញាធរត្រូវរឹតបណ្ដឹងការពារសន្តិសុខជូនប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០២:១២
អគ្គស្នងការនគរបាលជាតិនៅព្រឹកថ្ងៃទី២០វិច្ឆិកាដឹកនាំដោយ នេត សាវឿនបានជួបប្រជុំរៀបចំផែនការការពារសន្តិសុខជូនប្រជាពលរដ្ឋក្នុងឱកាសពិធីបុណ្យអុំទូក។ ក្នុងនោះបានកំណត់ដាក់ចេញឲ្យ កម្លាំងចម្រុះរួមមាន៖នគរបាលជាតិ កងរាជអាវុធហត្ថលើផ្ទៃប្រទេស និងកម្លាំងសណ្ដាប់ធ្នាប់របស់សាលារាជធានីភ្នំពេញសហការរួមគ្នាការពារសន្តិសុខជូនប្រជាពលរដ្ឋរយៈពេលបីថ្ងៃក្នុងឱកាសព្រះរាជពិធីបុណ្យអុំទូកនៅទូទាំងរាជធានីភ្នំពេញ។
ក្នុងនោះកម្លាំងចម្រុះរាប់រយនាក់នឹងនៅប្រចាំការអន្តរាគមន៍នៅទីតាំងសំខាន់ៗមួយចំនួនដែលមានរៀបចំការប្រគុំតន្ត្រី ដូចជាៈ កោះពេជ្រ រមណីដ្ឋានវត្នភ្នំ និង សួនច្បារមុខវត្តបុទុមវត្តីជាដើម។ នេះបើតាមការបញ្ជាក់របស់លោក គៀត ចន្ទថារិទ្ធ អ្នកនាំពាក្យអគ្គស្នងការនគរបាលជាតិ។
ថ្លែងប្រាប់វិទ្យុបារាំងអន្តរជាតិRFIនៅថ្ងៃទី២០វិច្ឆិកាលោក គៀត ចន្ទថារិទ្ធ បន្តថាការការពារសុវត្ថិភាពជូនប្រជាពលរដ្ឋអំឡុងពិធីបុណ្យអុំទូកនៅថ្ងៃខាងមុខនេះមិនមែនធ្វើឡើងតែនៅក្នុងរាជធានីភ្នំពេញនោះទេពោលគឺនៅតាមបណ្ដាលខេត្តដែលសំបូរទៅដោយតំបន់ទេសចរណ៍ក៏នឹងត្រូវដាក់កម្លាំងការពារផងដែរ។
លោកថា មូលហេតុដែលបន្ថែមកម្លាំងការពារទៅដល់បណ្ដាលខេត្តគឺទាំងប្រជាពលរដ្ឋនិងកម្លាំងការពារចម្រុះមិនត្រូវមើលស្រាលស្ថានការបានទេទោះបីពិធីបុណ្យអុំទូកមិនត្រូវបានរៀបចំក៏ដោយនោះ។ ជាក់ស្ដែងភេរវកម្មនៅទីក្រុងប៉ារីសប្រទេសបារាំងកាលពីសប្ដាហ៍មុនគឺជាឧទារហណ៍ដែលត្រូវប្រុងប្រយ័ត្នស្រាប់។
លោក គៀត ចន្ទថារិទ្ធ បញ្ជាក់ថា ភេរវកម្មគឺជាបញ្ហាមួយដែលកំលាំងចម្រុះត្រូវពង្រឹងការការពារនិងត្រួតពិនិត្យលើជនដែលគួរឲ្យសង្ស័យក្នុងអំឡុងពិធីបុណ្យអុំទូក។ បន្ទាប់ពីភេរវកម្មនៅប៉ារីសនិងចំពោះពាក្យចចាមអារ៉ាមនាពេលកន្លងមកលោកអ្នកនាំពាក្យរូបនេះបញ្ជាក់បន្ថែមថា កម្ពុជាគ្មានក្រុមភេរវជនណាដែរគួរឲ្យសង្ស័យនោះទេរហូតមកដល់ពេលនេះ។ តែយ៉ាងណាក៏ដោយលោកថា សមត្ថកិច្ចនៅតែបន្តតាមដានចំពោះបញ្ហានេះ។
តាមគម្រោងរយៈពេលបីថ្ងៃនៃពិធីបុណ្យអុំទូកដែលនឹងចាប់ពីថ្ងៃទី២៤-២៧វិច្ឆិកានឹងមានការប្រគុំតន្រ្តីរបស់ស្ថានីយទូរទស្សន៍ក្នុងស្រុក ការតាំងពិព័រណ៍ផលិតផលក្រុមហ៊ុន ការសំពះព្រះខែ និងបណ្ដែតគោមជាដើម។ សូមបញ្ជាក់ថា មូលហេតុនៃការផ្អាក់ព្រះរាជពិធីបុណ្យអុំទូកដែលជាឆ្នាំទី៤នេះដោយសារកម្រិតទឹកទាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ