អាជ្ញាធរសមត្ថកិច្ចដាក់ផែនការ រឹតបន្តឹងសន្តិសុខមាំមួនជាងមុន ក្នុងព្រះរាជពិធីបុណ្យអុំទូក ឆ្នាំនេះ
ផែនការការពារសន្តិសុខ សណ្តាប់ធ្នាប់ និងសុវត្ថិភាព ក្នុងព្រះរាជពិធីបុណ្យអុំទូក រយៈពេល ៣ ថ្ងៃ ចាប់ពីថ្ងៃទី៥ ខែវិច្ឆិកា នៅភ្នំពេញ ត្រូវបានអាជ្ញាធរសមត្ថកិច្ច បានរៀបចំ ចាត់ចែងរួចរាល់ហើយ។ លោកឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ បានប្រកាសពីការត្រៀមរួចរាល់ហើយលើផែនការ និងមធ្យោបាយនានា របស់ប៉ូលិស និងអាជ្ញាធរ សម្រាប់ព្រះរាជពិធីបុណ្យអុំទូក។ ក្នុងនោះ មានការបិទផ្លូវ ដើម្បីសម្រួលចរាចរណ៍ ទីតាំងអាជ្ញាធរសមត្ថកិច្ចឈរជើង ឡានពេទ្យ និងចំណតរថយន្តធំ២ នៅជាយក្រុង ជាដើម។ ទីតាំងផ្សារទំនើបរបស់ជប៉ុន AEON ជាគោលដៅ ដែលអាជ្ញាធរត្រូវបង្កើនការប្រុងប្រយ័ត្ន នៅពេលហ្វ៊ូងមនុស្សរាប់សែននាក់ ចូលមកលេងបុណ្យអុំទូក ឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:៤៦
ជាការពិត ផ្លូវដែលត្រូវប៉ូលិស បិទមិនឲ្យមានម៉ូតូ និងឡានចេញចូលនោះ ជាផ្លូវដែលស្ថិតនៅជុំវិញព្រះបរមរាជវាំង ពិសេសនៅជួរមាត់ទន្លេ ដែលជាកន្លែងប្រារព្ធព្រះរាជពិធីបុណ្យអុំទូក រយៈពេល ៣ ថ្ងៃ ចាប់ពីថ្ងៃទី៥ ដល់ថ្ងៃទី៧វិច្ឆិនា។ អាជ្ញាធរសមត្ថកិច្ច បានដាក់ផែនការ រឹតបន្តឹងកិច្ចការពារសន្តិសុខ សណ្តាប់ធ្នាប់ និងសុវត្ថិភាពយ៉ាងម៉តចត់ ហើយឲ្យឈ្មោះតំបន់នោះ ថាជាតំបន់ A។
លោកឧត្តមសេនីយ៍ គៀត ច័ន្ទថារិទ្ធ អគ្គស្នងការរង តំណាងឲ្យអនុគណៈកម្មការការពាររក្សាសន្តិសុខ របៀបរៀបរយ សណ្តាប់ធ្នាប់សង្គម ចរាចរណ៍ សង្គ្រោះទូកលិច និងអ្នកជំងឺ សម្រាប់ព្រះរាជពិធីបុណ្យអុំទូក បានឲ្យដឹងថា តំបន់ការពារ ក្នុងតំបន់ A ជាតំបន់ដែលមានប្រជាពលរដ្ឋចូលរួមកំសាន្តព្រះរាជពិធីបុណ្យច្រើនជាងគេ ដូច្នេះត្រូវបិទមិនឲ្យមានឡានម៉ូតូ ធ្វើចរាចរណ៍ ចាប់ពីម៉ោង ១០ ព្រឹក រហូតដល់ម៉ោង ១០ យប់។ តំបន់ A រាប់ចាប់ពីផ្លូវចេញពីផ្សារថ្មី ទៅមាត់ទន្លេ រហូតដល់តំបន់ខាងត្បូងវិមានឯករាជ្យ។ ផ្លូវតូចៗ ចាក់ទៅមាត់ទន្លេ តាមផ្លូវព្រះនរោត្តម ក៏ត្រូវបិទ មិនឲ្យឡានម៉តូ ឆ្លងកាត់នោះទេ។
តាមលោកឧត្តមសេនីយ៍ ឡានធំៗទាំងអស់ ត្រូវចូលចត នៅចំណតឡានតាមផ្លូវជាតិនានា ចូលមកភ្នំពេញ ដើម្បីកុំឲ្យកកស្ទះចរាចរណ៍ខ្លាំងពេក។
ជាមួយគ្នានោះ កងកម្លាំងសមត្ថកិច្ច បានរៀបចំបញ្ជាការដ្ឋាន ៨ កន្លែង ក្នុងតំបន់ A ដើម្បីត្រៀមអន្តរាគមន៍។ ក្នុងនោះ ក៏មានរថយន្តពេទ្យ ២៧ គ្រឿង និងតង់គិលានចល័តជាច្រើន។ កងកម្លាំងការពារសន្តិសុខចល័តជាច្រើនក្រុម ក៏នឹងត្រូវដើរល្បាតក្នុងហ្វ៊ូងមហាជនផងដែរ។
អំពីកន្លែងប្រគំតន្ត្រី និងស្តង់លក់ផលិតផល គឺរយៈពេល ៣ ថ្ងៃ នៃព្រះរាជពិធីបុណ្យអុំទូកនេះ មាន ៥ កន្លែង រួមមាន៖ ១-នៅកោះពេជ្រ ២-មុខវត្តបទុម ៣-ទីលានប្រជាធិបតេយ្យ ៤-នៅវត្តភ្នំ និងទី៥-នៅជ្រោយចង្វារ ត្រើយខាងកើត ដែលជាកន្លែងចំណុះទូក ស្នាក់នៅ។
រយៈពេល ៣ ថ្ងៃ នៃពិធីបុណ្យអុំទូក ឆ្នាំនេះ អាជ្ញាធរប៉ាន់ស្មានថា នឹងមានអ្នកចូលរួមមិនតិចជាង ២ លាននាក់។ នៅឆ្នាំនេះ មានទូកង ចូលរួមប្រណាំង ២៤០ ទូក និងកីឡាករជិត ២ ម៉ឺននាក់។ ក្នុងនោះ ចរាចរណ៍នៅម្តុំផ្សារទំនើបរបស់ជប៉ុន AEON ត្រូវបានអាជ្ញាធរ គិតគូរខ្លាំងជាងគេ ដោយសារតែជាផ្សារទំនើបទើបង្កើតថ្មី ហើយផ្លូវតូចចង្អៀត។
ហេតុការណ៍ មានអ្នកស្លាប់ និងអ្នករបួសនៅកោះពេជ្រ ក្នុងពេលបុណ្យអុំទូក ឆ្នាំ២០១០ និងមានអ្នកស្លាប់ និងអ្នករបួស ក្នុងពេលបាញ់កាំជ្រួច កាលពីយប់ថ្ងៃទី២៩តុលា ត្រូវបានលោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បញ្ជាក់ថា អាជ្ញាធរសមត្ថកិច្ច បានដាក់ផែនការរឹតបន្តឹងសន្តិសុខ និងសណ្តាប់ធ្នាប់ខ្លាំងក្លាជាងពេលមុន សម្រាប់ពិធីបុណ្យអុំទូកឆ្នាំនេះ។ ក្នុងនោះ ក៏មានដាក់មេក្រូតាមផ្លូវជាច្រើន ដើម្បីប្រកាសពីកន្លែងកកស្ទះ និងបង្កើនកម្លាំង សម្រួលបិទផ្លូវ នៅពេលមានមនុស្សកកស្ទះច្រើន ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ