រដ្ឋមន្ត្រី៖ គិតត្រឹមថ្ងៃ១៣មិថុនា មានពលករកម្ពុជាជាង ៤ ម៉ឺននាក់ហើយ ត្រូវថៃបញ្ជូនត្រឡប់មកវិញ
ក្នុងពេលចុះទៅពិនិត្យស្ថានភាពរបស់ក្រុមពលករកម្ពុជា ដែលត្រូវបានថៃបញ្ជូនវិលត្រឡប់មកវិញ នៅច្រកព្រំដែនប៉ោយប៉ែត លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា គិតត្រឹមរសៀលថ្ងៃទី១៣ ខែមិថុនានេះ ថៃបានបញ្ជូនពលករកម្ពុជា មកវិញ ចំនួន ៤៣.៦០០ នាក់។ ក្នុងនោះ តាមច្រកប៉ោយប៉ែត ខេត្តបន្ទាយមានជ័យ មានច្រើនជាងគេ។ អាជ្ញាធរបានរៀបចំឡានជាង ២០០ គ្រឿង ដើម្បីរង់ចាំដឹកជញ្ជូនពលករកម្ពុជា វិលត្រឡប់ទៅស្រុកកំណើតវិញ។ ចំណែកមេបក្សប្រឆាំង លោក សម រង្ស៊ី បានជំរុញឲ្យរដ្ឋាភិបាល ផ្តល់ការឧបត្ថម្ភសម្រាប់ពលរដ្ឋកម្ពុជា ដែលថៃចាប់បញ្ជូនមកវិញ ពិសេសបង្កើតការងារក្នុងស្រុក។
ចុះផ្សាយនៅថ្ងៃ៖
ស្តាប់ - ០២:៥៣
អាជ្ញាធរបានកត់ត្រាថា គិតត្រឹមរសៀលថ្ងៃទី១៣មិថុនានេះ ថៃបានបញ្ជូនពលករកម្ពុជា ភាគច្រើនជាពលករខុសច្បាប់ វិលត្រលប់មកវិញ ចំនួន ៤៣.៦០០ នាក់។ ក្នុងនោះ នៅប៉ោយប៉ែត មានច្រើនជាងគេ រហូតដល់ ៣៣.៥០០ នាក់។ ក្រៅពីនោះ មាននៅខេត្តបាត់ដំបង ៧៥០០ នាក់ ឧត្តរមានជ័យ ១១២៥ នាក់ ប៉ៃលិនជាង ១០០ នាក់ និងនៅខេត្តកោះកុងមួយចំនួនទៀត។ នេះបើតាមការបញ្ជាក់របស់លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។
លោក អ៊ិត សំហេង ដែលបានចុះទៅពិនិត្យមើលស្ថានភាពពលករកម្ពុជា ដែលថៃចាប់បញ្ជូនមកវិញទាំងបង្ខំ នៅព្រំដែនប៉ោយប៉ែត នាថ្ងៃទី១៣មិថុនានេះ។ លោកបានឲ្យដឹងថា ពលករកម្ពុជា ដែលចូលធ្វើការ ក្នុងប្រទេសថៃ សព្វថ្ងៃ មានចំនួនសរុបប្រមាណជិត ២០ ម៉ឺននាក់។ ភាគច្រើនជាពលករខុសច្បាប់ ដែលត្រូវបានថៃ ចាប់បញ្ជូនមកវិញពេលនេះ។
លោក អ៊ិត សំហេង បានអំពាវនាវដល់អាជ្ញាធរថៃ ត្រូវបញ្ជូនពលរដ្ឋកម្ពុជាមកវិញពេលនេះ ដោយលក្ខណៈមនុស្សធម៌ និងកុំជំរិតយកលុយ។ នោះគឺពលករកម្ពុជា ត្រូវបានប៉ូលិសថៃ យកលុយ ចាប់ពី ៣០០ បាត មួយកន្លែង ដើម្បីបានចេញពីកន្លែងឃុំឃាំង វិលត្រលប់មកព្រំដែនកម្ពុជា។
លោករដ្ឋមន្ត្រី ក៏បានអំពាវនាវដល់ពលករកម្ពុជា រកការងារធ្វើក្នុងស្រុក នៅតាមរោងចក្រ កសិដ្ឋាន និងការងារសំណង ដែលកំពុងត្រូវការកម្លាំងពលកម្ម។ តែបើចង់ទៅក្រៅប្រទេស ត្រូវចេញទៅដោយស្របច្បាប់។
ក្នុងសន្និសីទកាសែត នៅព្រឹកថ្ងៃសុក្រនេះ ចំពោះមុខក្រុមពលករ ៥១ នាក់ ដែលថៃចាប់បញ្ជូនមកវិញ លោក សម រង្ស៊ី ប្រធានគណបក្សសង្គ្រោះជាតិ បានជំរុញឲ្យរដ្ឋាភិបាល មិនត្រឹមតែជួយលើការដឹកជញ្ជូនប្រជាពលរដ្ឋកម្ពុជាទាំងនោះទេ តែរដ្ឋាភិបាល ត្រូវផ្តល់ការឧបត្ថម្ភជាច្រើនទៀត ពិសេសផ្តល់ការងារ ដល់ពលរដ្ឋរាប់ម៉ឺននាក់នោះ។
ពីប៉ោយប៉ែត លោកដ្ឋមន្ត្រី អ៊ិត សំហេង បានបញ្ជាក់ថា មន្ត្រីក្រសួងការងារ តាមរយៈទីភ្នាក់ងារជាតិមុខរបរ និងការងារ កំពុងផ្សព្វផ្សាយដល់ពលករដោយផ្ទាល់ និងនៅតាមភូមិឃុំ។ ប្រជាពលរដ្ឋកម្ពុជា ដែលទើបវិលមកពីប្រទេសថៃ ពេលនេះ អាចដាក់ពាក្យស្វែងរកការងារធ្វើ តាមមន្ទីរការងារ នៅគ្រប់ខេត្តទូទាំងប្រទេស។
លោករដ្ឋមន្ត្រី ក៏បានឲ្យដឹងថា លោកលឺពីព័ត៌មាន ដែលថា ទាហានថៃ បាញ់សម្លាប់ពលករកម្ពុជា ពេលបណ្តេញចេញ តែកម្ពុជា បានទាក់ទងទៅអាជ្ញាធរថៃ ដើម្បីបញ្ជាក់ដំណឹងនេះ។
រហូតមកដល់រសៀលថ្ងៃទី១៣ ខែមិថុនា ឆ្នាំ២០១៤នេះ នៅច្រកអន្ដរជាតិប៉ោយប៉ែត ខេត្ដបន្ទាយមានជ័យ អាជ្ញាធរបានអន្តរាគមន៍ ដោយរៀបចំឡានដឹកពលករកម្ពុជា ចំនួនជាង ២០០ គ្រឿង។
តាមលោក អ៊ិត សំហេង ពេលនេះ មធ្យោបាយដឹកជញ្ជូន ត្រូវបានដោះស្រាយ ដោយមិនពលករ មិនចាំបាច់បង់លុយ។ អាជ្ញាធរ ក៏បានផ្តល់បាយទឹកដល់ពលករ រួមទាំងជំនួយពីយុវជនកាកបាទក្រហម អង្គការសង្គមស៊ីវិល និងសប្បុរសជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ