លោកសម រង្ស៊ីជំរុញឲ្យរដ្ឋាភិបាលផ្តល់ការឧបត្ថម្ភនិងបង្កើតការងារដល់ពលរដ្ឋកម្ពុជាដែលថៃចាប់បញ្ជូនមកវិញ
លោក សម រង្ស៊ី ប្រធានគណបក្សសង្គ្រោះជាតិ បានជំរុញឲ្យរដ្ឋាភិបាល មិនត្រឹមតែជួយលើការដឹកជញ្ជូនប្រជាពលរដ្ឋកម្ពុជា ដែលថៃចាប់បញ្ជូនទាំងបង្ខំឲ្យវិលត្រឡប់មកវិញ នាពេលនេះទេ តែរដ្ឋាភិបាលត្រូវផ្តល់ការឧបត្ថម្ភជាច្រើនទៀត ពិសេសផ្តល់ការងារដល់ពលរដ្ឋរាប់ម៉ឺននាក់នោះ។ ជាការឆ្លើយតប លោក ហេង សួរ អ្នកនាំពាក្យក្រសួងការងារ បានលើកឡើងថា ដំណោះស្រាយរបស់រដ្ឋាភិបាល គឺក្រសួងការងារ បានបញ្ជូនមន្ត្រីជំនាញ ចុះទៅប៉ោយប៉ែត ជួបប្រជាពលរដ្ឋទាំងនោះ ប្រាប់អំពីការងារដែលពួកគេអាចធ្វើបាននៅក្នុងស្រុក រួមទាំងការបណ្តុះបណ្តាលមុខជំនាញតាមមន្ទីរការងារដោយឥតគិតថ្លៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
ចំពោះមុខពលរដ្ឋកម្ពុជាជាង ៥០ នាក់ ដែលថៃ បានចាប់បញ្ជូនមកវិញ ទាំងបង្ខំ នៅទីស្នាក់ការកណ្តាលគណបក្សសង្គ្រោះជាតិ ក្នុងរាជធានីភ្នំពេញ នាព្រឹកថ្ងៃសុក្រនេះ លោក សម រង្ស៊ី បានស្នើដល់អាជ្ញាធរយោធាថៃ ត្រូវអនុវត្តសកម្មភាពមនុស្សធម៌ លើការបញ្ជូនពលរដ្ឋកម្ពុជា ត្រលប់មកវិញ។ លិខិតមួយច្បាប់ ត្រូវបានលោក សម រង្ស៊ី ប្រកាសថា លោកបានសរសេរ ផ្ញើទៅឧត្តមសេនីយ៍ លោក ប្រាយុទ្ធ ចាន់អូចា នាយករដ្ឋមន្ត្រីយោធាថៃ។
ក្រៅពីនោះ លោកសមរង្ស៊ី ក៏បានជំរុញដល់រដ្ឋាភិបាលលោក ហ៊ុន សែន មិនត្រឹមតែផ្តល់ការដឹកជញ្ជូនពលរដ្ឋចំណាកស្រុកទាំងនោះទេ តែរដ្ឋាភិបាលត្រូវផ្តល់ការឧបត្ថម្ភច្រើនទៀត ដល់ពលរដ្ឋទើបវិលត្រលប់មកនោះ ពិសេសត្រូវបង្កើតការងារ។ កាលណា មានការងារធ្វើក្នុងស្រុក នោះប្រជាពលរដ្ឋកម្ពុជា មិនចេញទៅក្រៅប្រទេសទេ។
តាមលោក សម រង្ស៊ី ពលរដ្ឋកម្ពុជា ចាកចេញទៅធ្វើការនៅប្រទេសថៃ ដែលមានមិនតិចជាងកន្លះលាននាក់ ហើយត្រូវថៃចាប់បង្ខំឲ្យវិលមកវិញពេលនេះ ជាបរាជ័យមួយ របស់រដ្ឋាភិបាល ដឹកនាំដោយលោក ហ៊ុន សែន។
ដើម្បីបង្កើតការងារដល់ប្រជាពលរដ្ឋ អតីតរដ្ឋមន្ត្រីក្រសួងសេដ្ឋកិច្ច លោក សម រង្ស៊ី បានផ្តល់នូវដំណោះស្រាយថា រដ្ឋាភិបាលត្រូវផ្តល់ដីដល់ប្រជាពលរដ្ឋក្រីក្រ តាមរយៈការដកហូតដីសម្បទានសេដ្ឋកិច្ច ពីក្រុមហ៊ុនឯកជន ដែលមានប្រមាណ ៣ លានហិកតា យកមកចែកជូនប្រជាពលរដ្ឋ ១ គ្រួសារ ៣ ហិកតា។ រដ្ឋាភិបាលក៏ត្រូវធ្វើឲ្យកសិផល លក់ក្នុងតម្លៃសមរម្យ និងបំបាត់អំពើពុករលួយ នៅថ្នាក់លើ ជាដើម។
អ្នកនាំពាក្យក្រសួងការងារ លោក ហេង សួរ បានឲ្យដឹងថា ក្រសួងការងារ បានបញ្ជូនមន្ត្រីភ្នាក់ងារមុខរបរ ចុះទៅជួបពលករនៅប៉ោយប៉ែត ហើយប្រាប់ពីការងារ ដែលពួកគេ អាចធ្វើបាននៅក្នុងស្រុក ដូចជា ការងារសំណង់ និងក្នុងវិស័យកសិកម្ម ជាដើម។ អ្នកចំណាកស្រុក ដែលត្រូវថៃបញ្ជូនមកវិញពេលនេះ អាចទាក់ទងទៅកាន់មន្ទីរការងារគ្រប់ខេត្តរាជធានី ដើម្បីទទួលការបណ្តុះបណ្តាលជំនាញ ដោយឥតគិតថ្លៃ ផងដែរ។
យ៉ាងណាក៏ដោយ ចំពោះមុខកំណើនពលករនេះ លោកសមរង្ស៊ី បានប្រកាសផ្តល់ប្រាក់ ៦០០ បាត ស្មើប្រមាណជាង ១៨ ដុល្លារ ក្នុងម្នាក់ៗ ដល់ពលរដ្ឋកម្ពុជា ដែលថៃបានចាប់បញ្ជូន ហើយមកដល់ទីស្នាក់ការកណ្តាលគណបក្សសង្គ្រោះជាតិ ចំនួន ៥១ នាក់ នៅថ្ងៃសុក្រនេះ។
លោក សម រង្ស៊ី ក៏បានអំពាវនាវដល់រដ្ឋាភិបាលលោក ហ៊ុន សែន ឲ្យផ្តល់លុយដូចគ្នានេះ ដល់ប្រជាពលរដ្ឋកម្ពុជាផ្សេងទៀត ដែលថៃបញ្ជូនមកផងដែរ។
រហូតដល់ព្រឹកថ្ងៃសុក្រនេះ ថៃបានបន្តបញ្ជូនត្រឡប់ពលករកម្ពុជាទាំងឡានៗ។ ជាវិធានការ ដែលរបបយោធាថៃ បានអនុវត្តយូរថ្ងៃមកហើយ។ ប៉ុន្តែនៅប៉ោយប៉ែត នាព្រឹកនេះ ស្ថានភាព បានល្អជាងប៉ុន្មានថ្ងៃមុន។ អាជ្ញាធរបានរៀបចំឲ្យមានតង់សម្រាកត្រឹមត្រូវ មានឡានដឹកជញ្ជូនដោយមិនគិតថ្លៃ ហើយអាជ្ញាធរ កាកបាទក្រហម និងគណបក្សនយោបាយ បានចែកអាហារដល់ពលករទាំងនោះ។
នៅព្រឹកនេះ ឡានទាហាន ក៏បានដឹកពលករ ចាកចេញពីប៉ោយប៉ែត ទៅស្រុកកំណើតជាបណ្តើរ។ នេះបើតាមការបញ្ជាក់របស់លោក ស៊ុម ចាន់គា ភ្នាក់ងារអង្គការអាដហុក ប្រចាំខេត្តបន្ទាយមានជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ