អង្គរសង្ក្រាននឹងរៀបចំជាលើកទី២ក្នុងខេត្តសៀមរាបក្នុងឱកាសបុណ្យចូលឆ្នាំខ្មែរ
បន្ទាប់ពីបានរៀបចំជាលើកដំបូងកាលពីអំឡុងបុណ្យចូលឆ្នាំកាលពីឆ្នាំទៅ ព្រឹត្តិការណ៍អង្គរសង្ក្រាន្តនឹងត្រូវរៀបចំជាលើកទី២ ពីថ្ងៃទី១៣ ដល់ ១៦ មេសា ខាងមុខក្នុងពេលបុណ្យចូលឆ្នាំខ្មែរ។ ព្រឹត្តិការណ៍នេះត្រូវបានគេពន្យល់ថា មានគោលដៅផ្សព្វផ្សាយវប្បធម៌ខ្មែរដល់ពលរដ្ឋនិងយុវជនខ្មែរផង និងដល់ទេសចរបរទេសផង។ កាលពីឆ្នាំទៅមិញ មានអ្នកទេសចរ ប្រមាណជា ១៧ ម៉ឺននាក់ចូលរួមក្នុងព្រឹត្តិការណ៍អង្គរសង្ក្រាន្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
អង្គរសង្ក្រាន្តនឹងវិលមកវិញជាថ្មីក្នុងឱកាសបុណ្យចូលឆ្នាំខ្មែរក្នុងខែមេសានេះ។ សហភាពសហព័ន្ធយុវជនកម្ពុជា ដឹកនាំដោយលោក ហ៊ុន ម៉ានី តំណាងរាស្ត្រគណបក្សប្រជាជនកម្ពុជានិងជាកូនប្រុសរបស់លោកនាយករដ្ឋមន្ត្រី ហ៊ុន សែន បានប្រកាសឲ្យដឹងថា ពិធីសែនក្រុងពាលីដើម្បីផ្តើមរៀបចំកន្លែងប្រារព្ធពិធីនឹងត្រូវបើកធ្វើ នៅថ្ងៃចន្ទទី៣មីនា នៅឯទីលានជល់ដំរីក្នុងខេត្តសៀមរាប។
លោក សោម រតនា អ្នករៀបចំកម្មវិធីម្នាក់បានប្រាប់វិទ្យុបារាំងអន្តរជាតិថា អង្គរសង្ក្រាន្តនឹងបើកធ្វើចាប់ពីថ្ងៃទី១៣ដល់១៦មេសា។ ព្រឹត្តិការណ៍នេះមានគោលដៅជំរុញឲ្យមហាជនខ្មែរជាពិសេសយុវជនចូលរួមប្រារព្ធពិធីបុណ្យចូលឆ្នាំខ្មែរ ជាលក្ខណៈរួមគ្នា ក្នុងនាមជាមហាគ្រួសារខ្មែរ។ ហើយវាក៏ជាការបង្ហាញវប្បធម៌ខ្មែរដល់មហាជន និងយុវជនទូទៅផង និងដល់ភ្ញៀវទេសចរអន្តរជាតិផង។ នេះបើយោងតាមអ្នករៀបចំកម្មវិធីដដែល។
នេះជាលើកទី២ហើយដែលព្រឹត្តិការណ៍ អង្គរសង្ក្រាន្តត្រូវបានរៀបចំឡើង។ សកម្មភាពសិល្បៈជាច្រើនត្រូវបានរៀបចំឡើងដូចជាល្បែង របាំប្រជាប្រិយ និងការបង្ហាញប្រពៃណី ទំនៀមទំលាប់ខ្មែរពីបូរាណ ព្រមទាំងមានការតាំងបង្ហាញផលិតផលខ្មែរជាច្រើនផងដែរ។
កាលពីឆ្នាំមុន អង្គរសង្ក្រាន្តបានទាក់ទាញទេសចរជាតិ និងអន្តរជាតិប្រមាណជា ១៧ ម៉ឺននាក់ នេះបើយោងតាមលោកសោម រតនា។ លោក សង្ឃឹមថា ឆ្នាំនេះ ចំនួនអ្នកចូលរួមនឹងកើនឡើងច្រើនជាងឆ្នាំមុនដោយសារតែព្រឹត្តិការណ៍នេះត្រូវបានគេស្គាល់ច្រើនជាងមុន។
គួរបញ្ជាក់ថា ឆ្នាំ ២០១៣ កន្លងទៅកម្ពុជាទទួលបានទេសចរអន្តរជាតិប្រមាណជាជាង៤លាន២សែននាក់ និងនាំចំណូលប្រមាណជា ២៥០០០លានដុល្លារអាមេរិក។ តំបន់អង្គរជាទីរមណីយដ្ឋានវប្បធម៌ល្បីល្បាញជាងគេដែលទាក់ទាញទេសចរអន្តរជាតិឲ្យចូលមកទស្សនាកម្ពុជា។
ប៉ុន្តែ កំណើនទេសចរមិនទាន់អាចផ្តល់ភាគផលដល់ពលរដ្ឋខ្មែរគ្រប់គ្រាន់នៅឡើយទេ។ ថវិកាដែលបានមកពីវិស័យទេសចរណ៍មួយផ្នែកបានរបូតបាត់ទៅវិញ ដោយសារកង្វះហេដ្ឋារចនាសម្ព័ន្ធទេសចរណ៍របស់កម្ពុជា។ ក៏មានការរិះគន់ផងដែរអំពីកាគ្រប់គ្រងចំណូលទេសចរណ៍មិនបានល្អដែលធ្វើឲ្យថវិកាចូលទៅក្នុងក្រុមហ៊ុនឯកជនច្រើនជាងចំណូលរដ្ឋ។
យ៉ាងណាក៏ដោយ ព្រឹត្តិការណ៍អង្គរសង្ក្រាន្តក៏ត្រូវបានអ្នករៀបចំកម្មវិធីអះអាងថាដើម្បីគោលដៅទាក់ទាញទេសចរមួយដែរ។ ចាប់ពីថ្ងៃចន្ទទី៣មីនាតទៅ ការរៀបចំនឹងត្រូវគេចាប់ផ្តើមនៅទីលានជល់ដំរីដើម្បីត្រៀមប្រារព្ធព្រឹត្តិការណ៍អង្គរសង្ក្រាន្តលើកទី២ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ