ថ្ងៃទី១៤កុម្ភៈឆ្នាំនេះ Valentine’s Day ប្រណាំងជាមួយពិធីមាឃបូជា
ជាទូទៅ ប្រសិនបើនិយាយពីថ្ងៃ ១៤កុម្ភៈ យុវវ័យខ្មែរមួយចំនួន តែងតែនឹកឃើញដល់ ថ្ងៃនៃ ក្តីស្រលាញ់ ឬជាភាសាអង់គ្លេស Valentine’s Day។ ប៉ុន្តែនៅក្នុងឆ្នាំ ២០១៤នេះ ថ្ងៃនៃក្តីស្រលាញ់ត្រូវបានប្រារព្ធឡើងជួនគ្នាជាមួយថ្ងៃមាឃបូជា។ មាឃបូជា ដែលអ្នកប្រតិបត្តិតាមព្រះពុទ្ធសាសនា ត្រូវទៅវត្តអារាម រៀបចំចង្ហាន់ និងផ្កាឈូកថ្វាយព្រះ និងព្រះសង្ឃ។ តើថ្ងៃ ១៤កុម្ភៈ ឆ្នាំ ២០១៤ ផ្កាឈូក ឬ ផ្កាកូលាបពេញនិយមជាង?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៧
១៤កុម្ភៈ ឆ្នាំ ២០១៤ គឺជាថ្ងៃមួយ នៃពិធីពីរ ហើយដែលប្រជាពលរដ្ឋខ្មែរភាគច្រើន បានចាត់ទុកក្នុងន័យពីរផ្សេងគ្នាដែរ។ ជាធម្មតា ១៤កុម្ភៈរៀងរាល់ឆ្នាំ ត្រូវបានយុវវ័យមួយចំនួន យល់ថាជាថ្ងៃនៃក្តីស្រលាញ់ ដែលមានន័យសំដៅ ដល់ការបង្ហាញនូវភក្តីភាពស្នេហា រវាងគូស្នេហ៍ ចំពោះគ្នា និងគ្នា តាមរយៈការទិញ ផ្កាកូលាប ឬវត្ថុអនុស្សាវរីយ៏ ឬចំណាយពេលនៅជិតគ្នា។
ប៉ុន្តែ នៅក្នុងឆ្នាំនេះ Valentine’s Day ហាក់មិនសូវធ្វើឲ្យយុវជនអាចពុះកញ្ច្រោល បានច្រើនប៉ុន្មានទេ ព្រោះថា ១៤កុម្ភៈ ឆ្នាំ២០១៤ គឺត្រូវនឹងថ្ងៃទី១៥កើត ខែមាឃ ជាប់ជួននឹងថ្ងៃមាឃបូជា។ ថ្ងៃមាឃបូជា ដែលពុទ្ធសាសនិក នាំគ្នារៀបចំចង្ហាន់ សម្រាប់ទៅវត្តប្រគេនព្រះសង្ឃ។
បើនិយាយពីទិដ្ឋភាព សម្រាប់ថ្ងៃនេះ ក៏មានភាពប្លែកគ្នាចំនួន ២បែបផងដែរ។ នៅភ្នំព្រះរាជទ្រព្យ ឬភ្នំឧដុង្គ មានរៀបចំពិធីមាឃបូជា ប៉ុន្តែ មិនមានការហែក្បួន ប្រទក្សិណ ជុំវិញបរិវេណភ្នំ ដូចរាល់ឆ្នាំនោះទេ។ សម្តេចសង្ឃទាំងពីរគណៈ រួមជាមួយលោក គង់ សំអុល រដ្ឋមន្ត្រីក្រសួងព្រះបរមរាជវាំង បានរៀបចំពិធីសូត្រធម៌ តាមជំនឿព្រះពុទ្ធសាសនា ជាមួយពុទ្ធបរិស័ទ ប្រមាណជា ១ពាន់នាក់ តាំងពីម៉ោង ៨ព្រឹក។ កម្មវិធី នឹងបន្តធ្វើ រហូតដល់ពេលអាធ្រាត្រ។
នៅខេត្តសៀមរាប ដែលជាខេត្តទេសចរណ៍វិញ នៅរសៀលថ្ងៃទី១៤កុម្ភៈនេះ ក៏មានការសូត្រមន្តព្រះសង្ឃជាច្រើនអង្គ នៅក្នុងបរិវេណប្រាសាទនៃតំបន់អង្គរ ដើម្បីប្រារព្ធពិធីមាឃបូជា។ រីឯ នៅថ្ងៃទី១៥កុម្ភៈ ត្រូវនឹងថ្ងៃ១រោច ខែមាឃ នឹងមានរៀបចំរាប់បាត្រព្រះសង្ឃ ចំនួន ២៥៧អង្គ នៅជុំវិញប្រាសាទបាយ័ន។ ប្រជាពលរដ្ឋក្មេងចាស់ ប្រុស ស្រី ភាគច្រើន បានប្រមូលផ្តុំគ្នា ទៅវត្តអារាម។ វត្តអារាមថ្ងៃនេះ មានភាពអ៊ូរអរ ខុសពីថ្ងៃសីល៍ធម្មតា។
ក្រឡេកមកចាប់អារម្មណ៍ពីទិវានៃក្តីស្រលាញ់ ដែលមិនមែនជាប្រពៃណីពុទ្ធសានាវិញ។ នៅថ្ងៃទី១៤កុម្ភៈនេះ ផ្កាកូលាប និងកាដូអនុស្សាវរីយ៍ ត្រូវបានដាក់លក់ នៅក្នុងផ្សារទំនើប តាមដងវិថី ជិតសាលារៀន និងតាមកន្លែងដែលយុវវ័យ និយមដើរកម្សាន្តមួយចំនួន ។ ការលក់ទាំងនោះ ថែមទាំងមានដាក់ថា មានការបញ្ចុះតំលៃទៀតផង។ នៅតាមភោជនីយដ្ឋានបរទេស-ខ្មែរ មួយចំនួនធំ ក៏មានសរសេរ និងដាក់រូបភាព នៃក្តីស្រលាញ់ ព្រមទាំងបន្ថែមនៅលើខិត្តប័ណ្ណថា មានកម្មវិធីពិសេស សម្រាប់គូសង្សារ និងមនុស្សជាទីស្រលាញ់ទៀតផង។ ក្នុងនោះក៏មានការប្រគុំតន្ត្រី ការលេងល្បែងកម្សាន្ត និងសកម្មភាពផ្សេងទៀត ក្រោមពាក្យតែមួយថា ថ្ងៃដើម្បីក្តីស្រលាញ់។
ក្រៅតែពីសកម្មភាពទាំងនេះ ក៏មានអង្គការ និងស្ថាប័នរដ្ឋមួយចំនួន បានប្រារព្ធទិវាផ្សេងៗគ្នា ដើម្បីអបអរ ថ្ងៃបុណ្យនៃក្តីស្រលាញ់ Valentine’s Day ផងដែរ។ អង្គការមូលនិធិថែរក្សាសុខភាព អ្នកជំងឺអេដស៍ AHF សហការជាមួយមន្ទីរសុខាភិបាល រាជធានីភ្នំពេញ និស្សិតតាមសាកលវិទ្យាល័យ និងអង្គការដៃគូ ចំនួន ១២ បានបើកយុទ្ធនាការប្រឆាំងនឹងជំងឺអេដស៍ តាមរយៈការចែកចាយស្រោមអនាម័យ១សែនស្រោម ដើម្បីអប់រំដល់មនុស្ស ចំនួន ២៥.០០០នាក់ ហើយរំពឹងថា នឹងមានប្រជាពលរដ្ឋ១០០០នាក់ មកពិនិត្យឈាមធ្វើតេស្តរកមេរោគអេដស៍ ដោយមិនមានគិតថ្លៃ។
ចំណែកមជ្ឈមណ្ឌលជាតិផ្តល់ឈាម ដែលមានទីតាំងនៅក្នុងមន្ទីរពេទ្យអង្គឌួង ក៏មានរៀបចំយុទ្ធនាការអប់រំផ្សព្វផ្សាយ និងទទួលអំណោយឈាមមជ្ឈមណ្ឌលជាតិ ក្រោមប្រធានបទ “ផ្តល់ឈាម ផ្តល់សេចក្តីស្រលាញ់” ។ រីឯយុទ្ធនាការមួយរយកោដិសំឡេងក្រោម ប្រធានបទ សេចក្តីស្រលាញ់និង យុត្តិធម៌ ក៏មានការរៀបចំ ការជិះកង់ ការរាំជាក្រុម និង ការប្រគុំតន្ត្រី នៅកោះពេជ្រ ក្នុងពេលល្ងាចផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ