ILO៖ លក្ខខណ្ឌការងារក្នុងរោងចក្រកាត់ដេរថយចុះ
នៅក្នុងរបាយការណ៍សំយោគលើកទី ៣០ ដែលចេញផ្សាយនៅថ្ងៃព្រហស្បតិ៍នេះ គម្រោងរោងចក្រកាន់តែប្រសើរនៅកម្ពុជារបស់អង្គការ ILO បានបង្ហាញថា លក្ខខណ្ឌការងារក្នុងឧស្សាហកម្មនេះបានថយចុះ។ រីឯផ្នែកជាច្រើនទៀតគ្មានការកែលម្អឡើយ។ បញ្ហានេះអាចប៉ះពាល់ដល់វិស័យកាត់ដេរទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
សុវត្ថិភាព អគ្គិភ័យ ពលកម្មកុមារ សុវត្ថិភាព និងសុខភាពរបស់កម្មករនិយោជិត សុទ្ធសឹងជាបញ្ហាចម្បងៗដែលកំពុងចោទឡើងយ៉ាងខ្លាំងនៅក្នុងវិស័យឧស្សាហកម្មកាត់ដេរសម្លៀកបំពាក់ និងស្បែកជើងនៅកម្ពុជា។ បញ្ហាទាំងនេះអាចនឹងប៉ះពាល់ដល់វិស័យនេះទាំងមូលពីព្រោះអ្នកបញ្ជាទិញកំពុងតែស្វែងរកដៃគូ និងក្រុមហ៊ុនណាដែលផ្តោតការយកចិត្តទុកដាក់កាន់តែខ្លាំងជាងមុនទៅលើកម្មករ និយោជិតរបស់ខ្លួន។
នេះគឺជាការរកឃើញនៅក្នុងរបាយការណ៍សំយោគលើកទី៣០ស្តីពីលក្ខខណ្ឌការងារក្នុងវិស័យកាត់ដេរកម្ពុជាដែលចេញផ្សាយនៅថ្ងៃព្រហស្បតិ៍នេះដោយគម្រោងរោងចក្រកាន់តែប្រសើរនៅកម្ពុជារបស់អង្គការពលកម្មអន្តរជាតិ (ILO)។ របាយការណ៍បានសន្និដ្ឋានថា ការថយចុះនៃលក្ខខណ្ឌការងារអាចបណ្តាលមកពីការរីកចម្រើនយ៉ាងឆាប់រហ័សនៃវិស័យនេះ។
របាយការណ៍នេះគ្របដណ្តប់លើរោងចក្រចំនួន ១៥៥ ក្នុងនោះមានរោងចក្រកាត់ដេរចំនួន ១៥២ និងរោងចក្រស្បែកជើងចំនួន៣។ ការស៊ើបអង្កេតបានចាប់ផ្តើមពីថ្ងៃទី១វិច្ឆិកាឆ្នាំ ២០១២ដល់ ថ្ងៃទី៣០មេសា ឆ្នាំ ២០១៣។ យោងតាមតួលេខរបស់ក្រសួងពាណិជ្ជកម្មដែលរបាយការណ៍នេះបានស្រង់មកចុះផ្សាយ ចំនួនកម្មករ និយោជិតក្នុងវិស័យឧស្សាហកម្មកាត់ដេរបានកើនឡើងពីជាង ៣៧ ម៉ឺននាក់ដល់ជាង ៣៩ ម៉ឺននាក់ក្នុងអំឡុងពេលនៃការស៊ើបអង្កេត។ ចំណែកឯរោងចក្រវិញបានកើនឡើងពី៣៨៥ ដល់ ៤១២ រោងចក្រ។
យ៉ាងណាក៏ដោយ របាយការណ៍បានរកឃើញថា ចំនួនកូដកម្មបានថយចុះចំនួន ១២ ភាគរយពោលគឺថយពី៧៦ករណីមកនៅត្រឹម ៥៩ ករណី ខុសពីរយៈពេលចន្លោះពីឆ្នាំ ២០១០ ដល់ឆ្នាំ ២០១២ ដែលកូដកម្មបានកើនឡើងយ៉ាងខ្លាំង។ ប៉ុន្តែ អ្វីដែលគ្មានការប្រែប្រួលនោះគឺ កូដកម្មធ្វើឡើងដោយមិនអនុលោមតាមច្បាប់នោះឡើយ។ ចំណែកឯប្រាក់ឈ្មួលកម្មករនិយោជិតវិញមានការកើនឡើង ហើយការផ្តល់ប្រាក់រង្វាន់ត្រូវបានផ្តល់ជូនល្អប្រសើរជាងមុន។ ជាចុងក្រោយ របាយការណ៍បានសន្និដ្ឋានថា រដ្ឋាភិបាល និងសមាគមនិយោជកត្រូវពង្រឹងបន្ថែមទៀតនូវយន្តការអនុវត្តច្បាប់ និងវប្បធម៌អនុលោមតាមច្បាប់។ រីឯអ្នកបញ្ជាទិញក៏គួរបន្តការជំរុញឲ្យរោងចក្រដែលខ្លួនបញ្ជាទិញគោរពលក្ខខណ្ឌការងារផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ