សហជីពសរីកម្មករនឹងដង្ហែញត្តិ១ ម៉ឺនស្នាមមេដៃ នៅថ្ងៃផ្តើមយុទ្ធនាការបោះឆ្នោត
សហជីពសេរីកម្មកររបស់លោក ជា មុនី មិនទាន់បានទទួលការឆ្លើយតបពីសាលាក្រុង ក្នុងការអនុញ្ញាតឲ្យជួបជុំគ្នា នៅឡើយ។ លោក ជាមុនី គ្រោងនឹងដឹកនាំកម្មករ ជួបជុំតវ៉ាលើបញ្ហារោងកាត់ដេរ សាប៊្រីណា នៅព្រឹកថ្ងៃទី២៧ មិថុនា នៅទីលានប្រជាធិបតេយ្យ។ ទីលានប្រជាធិបតេយ្យ ដែលនៅថ្ងៃទី២៧មិថុនា គណបក្សសង្គ្រោះជាតិ យកធ្វើជាកន្លែងជួបជុំ បើកយុទ្ធនាការឃោសនាបោះឆ្នោត។
ចុះផ្សាយនៅថ្ងៃ៖
ស្តាប់ - ០២:២៥
ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី បានថ្លែងជាថ្មី ថា លោកនឹងដឹកនាំអ្នកសហជីព និងកម្មករចំនួន ២៥០នាក់ ធ្វើបាតុកម្មដើម្បីសុំឲ្យមានការដោះលែងសកម្មជនសហជីពរបស់លោក នៅក្នុង ករណីវិវាទមួយ នៅរោងចក្រកាត់ដេរ សាប្រ៊ីណា នៅថ្ងៃទី ២៧ ខែមិថុនា ខាងមុខ។
ប្រធានសហជីពរូបនេះបាននិយាយថា លោកមិនទាន់បានទទួលការអនុញ្ញាតណាមួយនៅឡើយ ពីសាលាក្រុងភ្នំពេញ បន្ទាប់ពី បានដាក់ពាក្យស្នើសុំ កាលពីសប្តាហ៍មុន។ តាមគម្រោងមេដឹកនាំសហជីពសេរីកម្មករ និងត្រូវជួបជុំគ្នា នៅទីលាន ប្រជាធិបតេយ្យ ហើយដង្ហែញត្តិទៅកាន់ស្ថានទូតអាមេរិក និងស្ថានទូតអង់គ្លេសប្រចាំ នៅប្រទេសកម្ពុជា ជាការបញ្ចប់។ ក៏ប៉ុន្តែ ការរៀបចំដង្ហែក្បួនរបស់សហជីពសេរីកម្មករ ជួនចំគ្នានឹងគម្រោងរបស់ គណបក្សសង្គ្រោះជាតិ ដែលបានជ្រើសរើសយកទីលានប្រជាធិបតេយ្យ ជាកន្លែងជួបជុំគ្នា ដើម្បីដង្ហែក្បួនធំ ឃោសនារកសម្លេងឆ្នោត ថ្ងៃដំបូង គឺថ្ងៃទី ២៧ មិថុនា។
ទោះជាយ៉ាងនេះក្តី លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជាបានអះអាងថា ការធ្វើបាតុកម្មតវ៉ារបស់លោក មិនជាប់ទាក់ទង ទៅហ្នឹងព្រឹត្តិការណ៍ដង្ហែក្បួនរបស់គណបក្សនយោបាយ នៅពេលបោះឆ្នោតនោះទេ ដោយលោកបញ្ជាក់ថា ជាសហជីពឯករាជ្យ ហើយធ្វើដើម្បី ឲ្យមានការដោះស្រាយអ្វីដែលលោកទាមទារប៉ុណ្ណោះ។
ទាក់ទងនឹងវិវាទ រោងចក្រ កាលពីពេលកន្លងទៅនេះ លោក ជា មុន្នី ក៏បានសរសេរលិខិតមួយទៅកាន់ ក្រុមហ៊ុន Nike តាមរយៈស្ថានទូតអាមេរិកប្រចាំ នៅកម្ពុជាដើម្បី សុំឲ្យស្ថានទូតបញ្ជូនសារ ទៅកាន់ក្រុមហ៊ុនNike ដែលមាន ទីស្នាក់ការនៅសហរដ្ឋអាមេរិក។ ជាមួយគ្នានេះ ក្រុមហ៊ុន Nike ដែលល្បីល្បាញខាងផលិតផលកីឡាលើពិភពលោក កាលពីថ្ងៃទី ៣០ ឧសភា កន្លងទៅនេះ ក៏បានសរសេរលិខិត ដូចៗគ្នាចំនួន ២ច្បាប់ ទៅកាន់រដ្ឋមន្ត្រីក្រសួងការងារ និង រដ្ឋមន្ត្រីក្រសួងពាណិជ្ជកម្មកម្ពុជា ដោយសម្តែងពីការព្រួយបារម្ភពីហេតុការណ៍ដែលបានកើតឡើងទាំងនេះ។
សូមរំលឹកថា កាលពីដើមខែ មិថុនាកន្លងទៅនេះ កម្មកររោងចក្រសាប្រ៊ីណា បានធ្វើកូដកម្មដ៏ធំមួយ នៅពីមុខរោងចក្រស្ថិតនៅ ក្នុងទឹកដី ខេត្តកំពង់ស្ពឺ ប្រកបដោយអំពើហឹង្សា។
បន្ទាប់ពីនោះ សកម្មជនសហជីព និងកម្មកររបស់សហជីពសេរីនៃព្រះរាជាណាចក្រកម្ពុជាចំនួន៨នាក់ ត្រូវបានសមត្ថកិច្ចចាប់ខ្លួន និងចេញដីការចាប់ខ្លួន ពីបទបង្កបំផ្លិចបំផ្លាញទ្រព្យសម្បត្តិក្រុមហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ