រដ្ឋាភិបាលបង្ហាញពីវិធានការទប់ស្កាត់តម្លៃស្រូវអង្ករ
បន្ទាប់ពីតម្លៃស្រូវ អង្ករកម្ពុជាបានចាប់ផ្ដើមធ្លាក់ចុះចាប់តាំងពីពាក់កណ្ដាលខែ កញ្ញា ឆ្នាំ២០១៦ មកថ្មីៗនេះភាគីពាក់ព័ន្ធបានដាក់ចេញផែនការមួយចំនួនដើម្បីស្រោចស្រង់តម្លៃស្រូវ អង្ករកម្ពុជាឲ្យបានទាន់ពេលវេលា។ វិធានការទាំងនោះគឺផ្ដោតសំខាន់ទៅលើកការជំរុញការប្រមូលទិញស្រូវ និង សម្ងួតស្រូវទុកនារដូវប្រមូលផល។ តែសម្រាប់អ្នកជំនាញបានបន្ថែមយោបល់ថា រដ្ឋាភិបាលគួរតែយកចិត្តទុកដាក់លើតម្លៃប្រកួតប្រជែងថ្លៃដើមនិងការរកទីផ្សារសម្រាប់នាំចេញរយៈពេលវែង។
ចុះផ្សាយនៅថ្ងៃ៖
ស្តាប់ - ០២:០៤
ការដាក់ចេញនូវផែនការថ្មីដើម្បីលើកស្ទួយតម្លៃស្រូវ អង្គរកម្ពុជាឲ្យបានទាន់ពេលវេលានេះរួមមាន ការបន្តលុបបំបាត់កុងត្រូលជជុះនិងការបង់ប្រាក់ក្រៅផ្លូវការ។ ការសម្របសម្រួលជាមួយសមាគមធនាគាររិក និងសមាគមមីក្រូហិរញ្ញវត្ថុ ដើម្បីបញ្ចុះអត្រាការប្រាក់បន្ថែមទៀត និងផ្តល់ភាព អនុគ្រោះដល់កសិករពេលជួបលំបាកផ្សេងៗ។ ការសម្រួលសម្រួលជាមួយ ប្រទេសជិតខាងឲ្យបន្តទិញកសិផលពីកម្ពុជា និងខិតខំបើកទីផ្សារជាមួយប្រទេសដទៃទៀត ក្រៅពីប្រទេសដៃគូពាណិជ្ជកម្ម ដែលមាននាពេលបច្ចុប្បន្ន។
បន្ថែមពីលើនេះទៀតគឺជំរុញការប្រើប្រាស់កម្មវិធីពិសេស របស់រាជរដ្ឋាភិបាល ដែលមានទឹកប្រាក់ចំនួន២៧លានដុល្លារអាមេរិក ក្នុងការជំរុញការ ប្រមូលទិញស្រូវ និងការនាំចេញ។ ក៏មានដែរការ ជំរុញគម្រោងវិនិយោគពិសេសរបស់រាជរដ្ឋាភិបាលក្នុងទំហំប្រមាណ ១៥លានដុល្លារ សំដៅបង្កើនសមត្ថភាពឡសម្ងួត និងឃ្លាំងស្តុក។
សូមបញ្ជាក់ថា វិធានការដាក់ចេញការទប់ស្កាត់តម្លៃស្រូវអង្ករនេះ ធ្វើឡើងនៅក្នុងកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ដឹកនាំដោយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុនៅថ្ងៃទី១៦កុម្ភៈ។
តែសម្រាប់លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាមានយោបល់ថា រដ្ឋាភិបាលគួរតែយកចិត្តទុកដាក់ទៅការប្រកួតប្រជែងតម្លៃថ្លៃដើម។ តម្លៃថ្លៃដើមដែលអង្ករកម្ពុជាសម្រេចបានមានតម្លៃខ្ពស់ជាងប្រទេសថៃនិងវៀតណាមសម្រាប់ការនាំចេញ។ម្យ៉ាងទៀតទីផ្សារនៃការនាំចេញអង្ករកម្ពុជាមានរយៈពេលខ្លី ដែលផ្ទុយពីប្រទេសជិតខាងកម្ពុជាបានចុះកិច្ចព្រមព្រៀងនាំចេញក្នុងរយៈពេលយូរ។
គួររម្លឹកថា កម្ពុជាក្នុងឆ្នាំ២០១៦បានជួបប្រទះវិបត្តិនៃតម្លៃស្រូវធ្លាក់ចុះមិនធ្លាប់មានដោយមូលហេតុត្រូវបានរដ្ឋាភិបាលអះអាងថា កសិករផលិតលើសការរំពឹងទុក។ កាលណោះក៏មានដែរបាតុកម្មចាក់ស្រូវចោលនៅខេត្តបាត់ដំបងទាមទារឲ្យរដ្ឋាភិបាលដោះស្រាយបញ្ហាស្រូវធ្លាក់ថ្លៃនេះជាបន្ទាន់។ ហើយរដ្ឋាភិបាលបានបញ្ចេញថវិកា២៧លានដុល្លារដោះស្រាយលើបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ