តម្លៃស្រូវនឹងធ្លាក់ថ្លៃនៅរដូវច្រូតកាត់ឆ្នាំនេះ
អង្គការសង្គមស៊ីវិល ធ្វើការលើវិស័យកសិកម្មបានបង្ហើបថាតម្លៃស្រូវ ដែលត្រូវប្រមូលផលក្នុងរដូវច្រូតកាត់នេះ អាចនឹងត្រូវធ្លាក់ថ្លៃជាងឆ្នាំមុន ដោយសារតែទិន្នផលស្រូវមានការកើនឡើងជាងឆ្នាំ ២០១៥។ ការទស្សទាយពីតម្លៃស្រូវនេះ ធ្វើឡើងចំពេលការប្រមូលស្រូវវស្សាកំពុងតែប្រព្រឹត្តិទៅ។
ចុះផ្សាយនៅថ្ងៃ៖
ស្តាប់ - ០២:០០
លោកសម វិទូ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា CEDAC បានបញ្ជាក់ថា តម្លៃស្រូវអាចនឹងមានការធ្លាក់ចុះវិញ ពោលគឺវាមិនអាចឡើងលើសពី ១០០រៀលទេ សម្រាប់ប្រភេទស្រូវក្រអូប ដូចជាស្រូវផ្កាម្លិះ និងផ្ការំដួលជាដើម។
លោកបន្ថែមថារដ្ឋាភិបាលត្រូវមានវិធានការសំខាន់ ទាក់ទងនឹងការបញ្ចេញទុនទប់ស្កាត់ការធ្លាក់ថ្លៃស្រូវ និងត្រូវទិញស្រូវទុក ចំណែកកសិករ មិនត្រូវបង្ខំលក់នៅរដូវនេះទេ គាត់អាចស្តុបទុករហូតដល់ខែឧសភា ឬខែមិថុនា ដើម្បីលក់ចេញ។
ចំណែកលោកហ៊ឹម ខទៀត អ្នកនាំពាក្យសហព័ន្ធស្រូវអង្ករកម្ពុជាបានថ្លែងប្រាប់វិទ្យុបារាំងអន្តរជាតិថា ទន្និផលស្រូវឆ្នាំនេះនឹងលើសពីឆ្នាំមុន ដោយសារតែភ្លៀងល្អ ហើយស្រូវធ្វើបានគ្រប់ខេត្តទាំងអស់ក្នុងប្រទេសកម្ពុជា។
លោកបញ្ជាក់ថា តម្លៃស្រូវអាចនឹងធ្លាក់ចុះតិចតួចតាមទ្រឹស្តីសេដ្ឋកិច្ច តែបើតម្រូវការ ឬការនាំចេញទៅក្រៅប្រទេសច្រើននោះគេអាចទប់តម្លៃស្រូវមិនឲ្យធ្លាក់ចុះបាន។ ចំពោះស្រូវស្ងួតបច្ចុប្បន្ន គឺមានតម្លៃប្រមាណ ៩០០រៀល សម្រាប់ផ្ការំដួល និងផ្កាម្លិះ ដែលអាចមានតម្លៃទាបជាងឆ្នាំមុន ១០០រៀល។ នេះបើតាមអ្នកនាំពាក្យសហព័ន្ធស្រូវអង្ករកម្ពុជា។
អ្នកនាំពាក្យក្រសួងកសិកម្មលោកឡោ រស្មីបានបញ្ជាក់ថាការប្រមូលផលស្រូវដើមរដូវវស្សា បានប្រមាណ ៦៦២ពាន់ហិកតា លើផ្ទៃដីប្រមាណ ២លាន៥៩៧ពាន់ហិកតា ហើយបរិមាណទិន្នផលកើនឡើងលើសពីឆ្នាំមុន។ លោកបន្ថែមថាបញ្ហាធ្លាក់ថ្លៃស្រូវនេះ គឺតែងតែកើតឡើងជារៀងរាល់ពេលប្រមូលផលស្រូវ ហើយក្រសួងនឹងប្រជុំចាត់វិធានការនៅក្នុងសប្តាហ៍នេះ។ ប៉ុន្តែក្រសួងកសិកម្មក៏ដូចជាប្រមុខរដ្ឋាភិបាលកម្ពុជាធ្លាប់បានអំពាវនាវឲ្យប្រជាកសិករហាលស្រូវឲ្យស្ងួត ហើយទុកដាក់សម្រាប់លក់នៅពេលដែលតម្លៃស្រូវកើនឡើងវិញ។
សូមបញ្ជាក់ថារដ្ឋាភិបាលកម្ពុជាកាលពីចុងខែកញ្ញា បានទម្លាក់កញ្ចប់ថវិកាប្រមាណ ២៧លានដុល្លារអាមេរិក ដើម្បីសង្រ្គោះតម្លៃស្រូវក្នុងប្រទេសកម្ពុជា ដែលកំពុងធ្លាក់ថ្លៃ។ ក្រោយពីពេលទម្លាក់កញ្ចប់ថវិកានេះរដ្ឋាភិបាល ក៏បានអំពាវនាវឲ្យមានការទិញអង្ករ ដើម្បីឲ្យរោងម៉ាស៊ីនអាចមានលទ្ធភាពទិញស្រូវបានច្រើនបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ