បញ្ហាដីធ្លីគឺជារបៀបវារៈបន្ទាន់របស់គណបក្សទាំងពីរ
ក្រោយជម្លោះនយោបាយបានបិទបញ្ចប់ បញ្ហាជម្លោះដីធ្លីរបស់បានក្លាយជារបៀបវារៈនាំមុខគេរបស់គណបក្សប្រជាជនកម្ពុជា និងគណបក្សសង្គ្រោះជាតិ។ នៅថ្ងៃសុក្រនេះលោកនាយករដ្ឋមន្ត្រីហ៊ុនបានកោះប្រជុំគណៈអចិន្ត្រៃយ៍ គណៈរដ្ឋមន្ត្រីជាបន្ទាន់ស្តីពីការដោះស្រាយបញ្ហាដីធ្លី។ ដោយឡែកមេដឹកនាំគណបក្សប្រឆាំងវិញបានលិខិត២ផ្សេងគ្នាជូនលោកនាយករដ្ឋមន្ត្រីក្នុងបញ្ហាដីធ្លីផងដែរ។
ចុះផ្សាយនៅថ្ងៃ៖
ស្តាប់ - ០២:៥០
ប្រមុខរដ្ឋាភិបាលកម្ពុជាលោកហ៊ុន សែន បានកោះប្រជុំគណៈអចិន្ត្រៃយនៃរដ្ឋមន្ត្រីរបស់ខ្លួនភ្លាមៗដើម្បីជជែកស្វែងរកដំណោះស្រាយបញ្ហាដីធ្លីដែលកំពុងបន្តផ្ទុះនៅតំបន់មួយចំនួន។ ជម្លោះដីធ្លីដែល បានបន្តកើតឡើងជាជំងឺរ៉ាំរ៉ៃមួយ។
ដោយឡែកមេដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា នៅថ្ងៃទី២១សីហា បានចេញលិខិតដាច់ដោយឡែកពីគ្នាជូនលោកនាយករដ្ឋមន្ត្រីហ៊ុន សែន ទាក់ទងបញ្ហាដីធ្លី។ លោក សម រង្ស៊ី បានសរសេរគាំទ្រប្រសាសន៍របស់លោកនាយករដ្ឋមន្ត្រីហ៊ុនសែនស្តីពីដំណោះស្រាយចំពោះវិវាទដីធ្លី។
ក្នុងលិខិតរបស់ខ្លួន លោក សម រង្ស៊ី បានបញ្ជាក់ថា “បើសម្តេចមិនយល់ទាស់ទេ ថ្នាក់ដឹកនាំ និងតំណាងរាស្ត្រមកពីគណបក្សសង្គ្រោះជាតិ នឹងផ្តល់ជូនសម្តេចនិងរដ្ឋាភិបាល នូវព័ត៌មាន របាយការណ៍ និងញត្តិដែលទទួលបានពីប្រជាពលរដ្ឋ។ ប្រធានគណបក្សសង្គ្រោះជាតិបានគូសបញ្ជាក់បន្ថែមថា លោក ក៏អាចសហការជាមួយនឹងរដ្ឋាភិបាល ក្នុងន័យស្វែងរកការអភិវឌ្ឍពិតប្រាកដសម្រាប់ពលរដ្ឋកម្ពុជាយូរអង្វែង ក្នុងការកត់សំគាល់មើលទៅលើវិនិយោគត្រឹមត្រូវ និងវិនិយោគគិនដែលមិនត្រឹមត្រូវ។
ដោយឡែកលោក កឹម សុខាអនុប្រធានគណបក្សសង្គ្រោះជាតិ ដែលប្រើឈ្មោះក្នុងនាមជាតំណាងរាស្ត្រមណ្ឌលកំពង់ចាមជាលើកដំបូង បានស្នើសុំឱ្យលោកនាយករដ្ឋមន្ត្រីហ៊ុន សែន ពិនិត្យលទ្ធភាពដោះលែងប្រជាពលរដ្ឋដែលកំពុងជាប់ឃុំឃាំងក្នុងពន្ធនាគារដោយសារការតវ៉ាបញ្ហាទំនាស់ដីធ្លី។ លោក កឹម សុខាបានបញ្ជាក់ថា បញ្ហានេះបានកើតឡើងពីការមិនអនុវត្តត្រឹមត្រូវពីអាជ្ញាធរថ្នាក់ក្រោម និងការមិនផ្តល់ភាពយុត្តិធម៌របស់តុលាការ។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិបានបញ្ជាក់ប្រាប់វិទ្យុបារាំងអន្តរជាតិថា បញ្ហាដីសម្បទាន ៩៩ឆ្នាំដែលបាននិងកំពុងប៉ះពាលដល់ប្រជាពលរដ្ឋ គឺជាបញ្ហាចំពោះមុខដែលត្រូវរួមគ្នាដោះស្រាយ។ ក្រៅពីនេះបញ្ហាអំពើពុករលួយ និងបញ្ហាអសកម្មនៃសេវាសាធារណៈរបស់រដ្ឋ រួមទាំងបញ្ហាប្រព័ន្ធយុត្តិធម៌ក៏ជាការងារជំហ៊ានបន្ទាប់របស់គណបក្សសង្គ្រោះជាតិក្នុងនាមជាបក្សធំទី២ក្នុងសភា។ នេះបើតាមលោកយ៉ែម បុញ្ញឫទ្ធិដដែល។ យ៉ាងណាក៏ដោយអ្នកនាំពាក្យរូបនេះ បានលើកឡើងថាការផ្តល់យោបល់ និងឯកសារដល់រដ្ឋាភិបាលនោះគឺជាភារៈកិច្ចរបស់គណបក្សដែលមានសំឡេងក្នុងសភា ប៉ុន្តែការអនុវត្តយ៉ាងណានោះ គឺអាស្រ័យលើរដ្ឋាភិបាល។
ដោយឡែកលោកផៃស៊ីផាន អ្នកនាំពាក្យទីស្តីការគណៈរដ្ឋមន្ត្រីបានលើកឡើងថា ការដោះស្រាយបញ្ហាដីធ្លីជាបន្ទាន់នេះ គឺជាភារៈកិច្ចរបស់រដ្ឋាភិបាលអាណត្តិទី៥នេះដែលត្រូវដោះស្រាយដោយផ្អែកលើសកម្មភាពជាធំ ហើយមិនមែនជាកាសន្យាខ្យល់នោះទេ។ តាមរយៈការប្រកាសដោះស្រាយជាបន្ទាន់នេះ រដ្ឋាភិបាលដែលដឹកនាំដោយគណបក្សប្រជាជនកម្ពុជារំពឹងថា នឹងអាចដោះស្រាយបញ្ហាដីធ្លីជូនប្រជាពលរដ្ឋបាន តាមរយៈការបោសសំអាតមន្ត្រីខិលខូច ។
សូមបញ្ជាក់ជូនថា រយៈពេលចុងក្រោយនេះ តំណាងរាស្ត្រគណបក្សប្រជាជនកម្ពុជាបានផ្តើមចុះជួបជាមួយប្រជាពលរដ្ឋដែលមានវិវាទដីធ្លី ខណៈដែលគណបក្សសង្គ្រោះជាតិបន្តសកម្មភាពចុះជួបប្រជាពលរដ្ឋរងគ្រោះទាំងនោះជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ